ភ្នំពេញ៖ ការប្រកួតបាល់ទាត់ពានរង្វាន់ Soccer League ឆ្នាំ ២០១៩ បាននិងកំពុងធ្វើការប្រកួតប្រជែងគ្នានៅលើទីលានចំនួន ៦ ហើយព្រឹត្តិការណ៍ ដែលមានក្រុមចូលរួមច្រើនបំផុតនេះ ត្រូវបានប្រធានសហភាពសហព័ន្ធយុវជនកម្ពុជា និងអ្នករៀបចំបានចាត់ទុកថា ជាស្ពានរឹតចំណងមិត្តភាព សាមគ្គីភាពរវាងយុវជន ដែលមកពីអង្គភាព និងស្ថាប័នខុសៗគ្នា ព្រមទាំងជាឱកាសក្នុងការពង្រឹងសមត្ថភាពកីឡាករវ័យក្មេងក្នុងការត្រៀមទៅស៊ីហ្គេម លើកទី ៣២ ឆ្នាំ ២០២៣ ដែលកម្ពុជាត្រូវធ្វើម្ចាស់ផ្ទះ។
លោក ហ៊ុន ម៉ានី ប្រធានសហភាពសហព័ន្ធយុវជនកម្ពុជាបានថ្លែងនៅក្នុងពិធីបើកការប្រកួតនៅកីឡដ្ឋានវិសាខាកាលពីថ្ងៃ សៅរ៍ថា៖ «គោលបំណងនៃការប្រកួតនេះ គឺដើម្បីបង្កើនឱកាសសម្រាប់យុវជនកម្ពុជាក្នុងការជួបជុំគ្នារឹតចំណងមិត្តភាព សាមគ្គីភាព និងបង្កើនកិច្ចសហប្រតិបត្តិការរវាងគ្នា និងគ្នាតាមរយៈការប្រកួត Soccer League»។
លោកបានបន្ថែមថា៖ «ឱកាសនៃការលេងកីឡា នឹងផ្តល់ឲ្យយុវជន ដែលមកពីអង្គភាពស្ថាប័នខុសៗគ្នា មានមុខងារ និងវិជ្ជាជីវៈផ្សេងៗគ្នា បានបង្កើត និងបង្កើនចំណងមិត្តភាពសាមគ្គីភាពក្នុងចំណោមយុវជន ព្រមទាំងឈ្វេងយល់ពីគ្នា និងស្គាល់គ្នាទៅវិញទៅមកដើម្បីក្លាយទៅជាបណ្តាញទំនាក់ទំនងមួយ ដែលរួបរួមគ្នាក្នុងបរិយាកាសស្និទ្ធស្នាល ចេះអត់ឱន អធ្យាស្រ័យ និងគោរពគ្នាទៅវិញទៅមក»។
សម្រាប់ការប្រកួតដណ្តើមពានរង្វាន់ Soccer League ឆ្នាំ ២០១៩ នេះ មានក្រុមចូលរួមរហូតដល់ ៧២ ក្រុម គឺលើសកាលពីឆ្នាំមុនចំនួន ១២ ក្រុម ហើយនៅក្នុងចំណោមក្រុមទាំង ៧២ នេះ គឺមានមកពីសមាគមសហភាពសហព័ន្ធយុវជនកម្ពុជាចំនួន ១៤ ក្រុម គ្រឹះស្ថានឧត្តមសិក្សា ១ ក្រុម ស្ថាប័នអង្គភាព និងក្រុមហ៊ុននានា ៥៧ ក្រុម។
ក្រុមទាំង ៧២ នេះ ត្រូវបានបែងចែកការប្រកួតជា ១៦ ពូល ហើយការប្រកួតជម្រុះប្រចាំពូលនីមួយៗ ត្រូវបានធ្វើឡើងតាំងពីថ្ងៃទី ២ ខែវិច្ឆិកា នៅលើទីលានកីឡដ្ឋានវិសាខា, ពហុកីឡដ្ឋានជាតិអូឡាំពិក, ស្តាតចាស់, KMH, អគ្គិសនីកម្ពុជា និងអូបេន ដើម្បីស្វែងរកក្រុមលេខ ១ តាមពូលនីមួយៗ ឡើងទៅប្រកួតនៅវគ្គខ្វែង ១៦ ក្រុម រហូតដល់វគ្គផ្តាច់ព្រ័ត្រ ខណៈព្រឹត្តិការណ៍នេះ ក្រុមម្ចាស់ជើងឯក នឹងទទួលបានប្រាក់រង្វាន់ច្រើនជាងមុន គឺ ២០ លានរៀល ក្រុមលេខ ២ បាន ១០ លានរៀល ក្រុមលេខ ៣ បាន ៥ លាន ព្រមទាំងរង្វាន់ផ្សេងៗទៀត។
ជាមួយការប្រកួតនេះដែរ លោក ស សុខា អនុប្រធានសហភាពសហព័ន្ធយុវជនកម្ពុជា និងជាប្រធានគ្រប់គ្រងការប្រកួតពាននេះ បានចាត់ទុកការប្រកួត Soccer League ឆ្នាំ ២០១៩ នេះ ថាជាការផ្តល់ឱកាសឲ្យយុវជនបានបញ្ចេញសមត្ថភាព និងស្នាដៃ ដើម្បីពង្រឹងសមត្ថភាពរបស់ពួកគេ និងជំរុញលើកកម្ពស់សកម្មភាពកីឡា ត្រៀមឆ្ពោះទៅធ្វើជាម្ចាស់ផ្ទះ ការប្រកួតស៊ីហ្គេម ឆ្នាំ ២០២៣ ជាមួយរាជរដ្ឋាភិបាលកម្ពុជា។
លោក ស សុខា បានថ្លែងថា៖ «ការប្រកួតពានរង្វាន់នេះ ធ្វើឡើងដើម្បីជំរុញ និងលើកកម្ពស់វិស័យកីឡាជាតិឲ្យកាន់តែរីកចម្រើន និងរឹងមាំថែមទៀត ក្នុងស្មារតីសាមគ្គីភាពរវាងស្រទាប់យុវជន និងក្រុមការងារ ដើម្បីចូលរួមចំណែកជាមួយរាជរដ្ឋាភិបាលកម្ពុជា ខណៈដែលវិស័យកីឡាកម្ពុជា កំពុងតែរីកចម្រើន និងមានប្រជាប្រិយភាពខ្ពស់។ ម្យ៉ាងទៀត ការប្រកួតនេះ បានផ្តល់ឱកាសឲ្យក្លិប សមាគម មហាគ្រួសារ ក្រុមយុវជន គ្រឹះស្ថានឧត្តមសិក្សា អង្គភាព និងក្រុមហ៊ុននានា មានឱកាសបានបញ្ចេញសមត្ថភាព និងស្នាដៃ ប្រកួតដណ្តើមពានរង្វាន់នេះ និងជំរុញលើកកម្ពស់សម្រាប់ត្រៀមខ្លួនទៅស៊ីហ្គេម ឆ្នាំ ២០២៣»៕