.jpg)
Cavani ស៊ុតគ្រាប់ដំបូងរបស់ខ្លួនឱ្យ United ឈ្នះ Everton ៣-១។ AFP
ក្រុងឡុងដ៍៖ លោក Ole Gunnar Solskjaer បានលើកឡើងពីការរៀបចំកាលវិភាគប្រកួតរបស់ក្រុម Manchester United (United) ទល់នឹង Everton កាលពីថ្ងៃសៅរ៍ថា ជារឿងលេងសើចទាំងស្រុង ខណៈ Chelsea បំបាក់ Sheffield United ៤-១ ឡើងទៅឈរលេខ ៣ ក្នុងតារាងពិន្ទុក្របខ័ណ្ឌ Premier League។
United បន្ថយសម្ពាធឱ្យអ្នកចាត់ការរបស់ពួកគេ ដោយការយកជ័យជម្នះ ៣-១ ក្នុងប្រកួត ដែលចាប់ផ្តើមលឿន នៅកីឡដ្ឋាន Goodison Park តែបុរសសញ្ជាតិន័រវែស សម្ដែងការខឹងសម្បាយ៉ាងខ្លាំងចំពោះប្រធានគ្រប់គ្រងលីគ ដោយសារក្រុមមានកីឡាកររបួសច្រើន។
ការចាប់អារម្មណ៍សំខាន់ នៅថ្ងៃសៅរ៍ គឺថា តើ United អាចស្ដារមុខមាត់បានវិញ ឬអត់ ពីការបរាជ័យជាបន្តបន្ទាប់ ដែលបានធ្វើឱ្យមានការសង្ស័យជាថ្មីអំពីតួនាទីរបស់លោក Solskjaer នៅក្លិបនេះ។
United ទើបបានវិលត្រឡប់មកពីលេងនៅ Champions League ដែលខ្លួនចាញ់ក្រុមម្ចាស់ផ្ទះ Istanbul Basaksehir នៅព្រឹកព្រលឹមថ្ងៃព្រហស្បតិ៍ តែនៅត្រូវលេង ឯ Goodison Park នាម៉ោង ១២:៣០ នាទីរសៀលថ្ងៃសៅរ៍ទៀត។
ប្រកួតនេះ Bruno Fernandes ស៊ុត ២ គ្រាប់ ហើយកីឡាករចំណូលថ្មី Edinson Cavani បានចាប់ផ្ដើមបើកបញ្ជីកំណត់ត្រាចុះគ្រាប់បាល់ដំបូង ខណៈ United តាមពីក្រោយរហូតយកឈ្នះលើក្រុមម្ចាស់ផ្ទះ ដែលជាក្រុមនាំមុខគេក្នុងតារាងនៅដើមរដូវកាលនេះ។
តែលោក Solskjaer រិះគន់សម្រាប់ការកែប្រែឆាប់រហ័សនេះថា បណ្ដាលឱ្យកីឡាកររបស់ខ្លួនមានរបួស ដូចជា Luke Shaw (សរសៃពួរ) Victor Lindelof (ខ្នង) និង Marcus Rashford (ស្មា)។
លោក Solskjaer និយាយថា៖ «តើអ្នករំពឹងថា កីឡាករនឹងលេងឱ្យបានល្អអស់ពីសម្ថភាពយ៉ាងដូចម្ដេច ពេលអ្នកឱ្យពួកគេចេញទៅធ្វើការប្រកួតនៅម៉ោង ១២:៣០ នាទីរសៀល? ពិតជាគួរឱ្យអស់សំណើច»។
គ្រូបង្វឹកវ័យ ៤៧ ឆ្នាំបានបន្ថែមថា៖ «កីឡាករយើងដូចត្រូវរៀបចំឱ្យចាញ់នៅថ្ងៃនេះ ជាមួយពេលវេលាប្រកួត។ ខ្ញុំជំរុញឱ្យក្លិបតវ៉ា ដើម្បីឱ្យយើងមានឱកាសយ៉ាងហោចណាស់ក៏ពាក់កណ្ដាលដែរ តែវាក៏បរាជ័យ»។
ចំណែក Chelsea ហាក់បានទទួលផលពីការចំណាយប្រាក់ទិញកីឡាករថ្លៃៗ នារដូវក្ដៅនេះហើយ បន្ទាប់ពីបានវាយបកយកឈ្នះក្រុមភ្ញៀវ Sheffield United ៤-១ ឡើងទៅលេខ ៣ ក្នុងតារាងលីគកំពូលអង់គ្លេស ដោយមាន ១៥ ពិន្ទុ ពោលគឺតាមពីក្រោយក្រុមទី ១ Southampton តែ ១ ពិន្ទុប៉ុណ្ណោះ គិតត្រឹមថ្ងៃអាទិត្យ។
ក្រុមរបស់លោក Frank Lampard ដែលមិនចាញ់ ៦ ប្រកួត នៅ Premier League នោះ ត្រូវក្រុមភ្ញៀវនាំមុខមុន នៅ Stamford Bridge នេះ ពេល David McGoldrick ប្រើកែងជើងស៊ុតបញ្ចូលទីយ៉ាងស្អាត។
តែតោខៀវតាមស្មើវិញ ដោយ Tammy Abraham ហើយបន្ទាប់មក Ben Chilwell និង Thiago Silva ព្រមទាំង Timo Werner ធ្វើសម្រេចម្នាក់ ១ គ្រាប់ បន្តបន្ទាប់គ្នា ជួយឱ្យក្រុមបាន ៣ ពិន្ទុ ពីប្រកួត នាសប្ដាហ៍ទី ៨ របស់ខ្លួននេះ។
Lampard ថា៖ «យើងនៅទី ៣។ កីឡាករទាំងអស់ ស័ក្តិសមទទួលបានការកោតសរសើរ។ ពួកគេធ្វើបានល្អមែនទែន។ វាគួរឱ្យរីករាយ ដែលបានឃើញនូវទិដ្ឋភាពហ្នឹង»៕ AFP/VN
