ក្រុងឡុងដ៍: លោក Ole Gunnar Solskjaer នឹងមិនបោះបង់ក្ដីសង្ឃឹម ដែលក្រុមបិសាចក្រហម Manchester United របស់ខ្លួន អាចតាមប្រជែងជាមួយក្រុមមេឃខៀវ Manchester City ដើម្បីដណ្ដើមពានក្របខ័ណ្ឌ Premier League ទោះបីជាក្រុមនៅទីកំពូលតារាង កំពុងមានទម្រង់លេងយ៉ាងល្អឥតខ្ជោះក៏ដោយ។
Man City បានបន្ថែមគម្លាតនាំមុខដាច់រហូតដល់ទៅ ១០ ពិន្ទុ លើក្រុមគូប្រជែងក្នុងក្រុងតែ ១ របស់ខ្លួន បន្ទាប់ពីធ្វើដំណើរទៅយកជ័យជម្នះពីក្រុមម្ចាស់ផ្ទះ Arsenal ក្នុងលទ្ធផល ១-០ ដែលវាក៏ជាការឈ្នះ ១៨ ហ្គេមបន្តបន្ទាប់គ្នា សម្រាប់ក្រុមរបស់លោក Pep Guardiola ពីការប្រកួតគ្រប់កម្មវិធីទាំងអស់ផងដែរ។
ជាមួយគ្នានេះ ទម្រង់លេងម្ដងឡើងម្ដងចុះរបស់ក្រុម Man United ខ្លួនឯងផ្ទាល់ ក៏បានរួមចំណែកជួយឱ្យមានគម្លាតដ៏ឆ្ងាយនេះដែរ តែក្រុមបិសាចក្រហម បានយកឈ្នះក្រុម Newcastle ៣-១ ដែលវាជាការស្គាល់ ៣ ពិន្ទុ ជាលើកទី២ ក្នុងចំណោម ៦ ប្រកួតចុងក្រោយក្នុងលីគ។
គ្រូបង្វឹករបស់ក្រុម Man United លោក Solskjaer បានថ្លែងថា៖ «យើងត្រូវតែទៅឱ្យដល់ទីនោះ ទោះអាច ឬមិនអាច។ គ្រប់ពេល ដែលយើងទទួលបាន ៣ ពិន្ទុ យើងបានធ្វើកិច្ចការរបស់យើងរួចហើយ ហើយនោះជាអ្វី ដែលយើងត្រូវធ្វើ និងត្រូវតាមអ្វីដែលក្រុមដទៃកំពុងធ្វើ»។
លោក Solskjaer បានធ្វើការផ្លាស់ប្ដូរកីឡាករដល់ទៅ ៥ រូប ពីជម្រើស ១១ នាក់ដំបូង ដែលបង្ហាញទម្រង់លេងដ៏គួរឱ្យចាប់អារម្មណ៍ ដោយការបំបាក់ក្រុម Real Sociedad ៤-០ ក្នុងប្រកួត នៅក្របខ័ណ្ឌ Europa League កាលពីយប់ថ្ងៃព្រហស្បតិ៍ ហើយសំណាងល្អ ដែលអត់មានកំហុសកើតឡើង សម្រាប់ការដកកីឡាកររបស់ក្រុមម្ចាស់ផ្ទះនេះ។
លោក Solskjaer បានបន្ថែមថា៖ «យើងត្រូវតែរកវិធី ដើម្បីឈ្នះការប្រកួត នៅវគ្គទី២។ វគ្គដំបូង យើងលេងមិនដល់ស្ដង់ដា ដែលយើងចង់បាននោះទេ។ ប្រហែលដោយសារក្រុម Newcastle។ ប្រហែលដោយសារអ្វី ដែលយើងបានធ្វើ នៅសប្ដាហ៍នេះ។ យើងបានសុំឱ្យពួកគេ ឡើងឱ្យដល់ចំណុចកំពូល ដូចក្នុងប្រកួតនៅមុនហ្នឹង តែវាធ្វើយើងត្រូវចប់តង់ទី១ ទើបអាចប្រមូលកម្លាំង និងថាមពលរបស់យើងឡើងវិញបាន»។
ក្រោយបញ្ចប់ការប្រកួតសប្ដាហ៍ទី២៥ នេះ ក្រុមគូប្រជែងក្នុងក្រុងមេនឆែសស្ទ័រជាមួយគ្នា Man City និង Man United ឈរនៅលំដាប់ទី១ និងទី២ ដោយមាន ៥៩ ពិន្ទុ និង ៤៩ ពិន្ទុ ខណៈក្រុមការពារជើងឯកហង្សក្រហម Liverpool ធ្លាក់ទៅដល់ចំណាត់ថ្នាក់ទី៦ មាន ៤០ ពិន្ទុ៕ AFP/VN