ក្រុងឡុងដ៍: កិច្ចប្រឹងប្រែងឲ្យមានការចាប់ផ្ដើមជាថ្មីនៃក្របខ័ណ្ឌ Premier League របស់ប្រទេសអង់គ្លេស ទទួលបានភាពល្អប្រសើរមួយកម្រិតទៀតហើយគិតត្រឹមថ្ងៃពុធ ដោយសារមានមនុស្សតែម្នាក់ប៉ុណ្ណោះ ដែលវិជ្ជមាន ក្នងចំណោមលទ្ធផលតេស្តទាំង ១ ១៩៧ នាក់ សម្រាប់ការពិនិត្យរកវីរុសកូរ៉ូណាដំណាក់កាលចុងក្រោយ។
អ្នកដែលទទួលបានលទ្ធផលវិជ្ជមាននោះ គឺជាមនុស្សរបស់ក្រុមមាន់ខ្នាយមាស Tottenham Hotspur (Spurs) ដោយមិនត្រូវបានប្រាប់ឲ្យដឹងថា តើអ្នកនោះ ជាកីឡាករ ឬបុគ្គលិកបម្រើការទូទៅនោះឡើយ តែគ្រាន់តែដឹងថា ពេលនេះ បុគ្គលរូបនោះ ត្រូវបានដាក់ឲ្យនៅដាច់ពីអ្នកដទៃរយៈពេល ៧ ថ្ងៃ។
ក្នុងសេចក្ដីប្រកាសរបស់ខ្លួនក្លិប Spurs បានឲ្យដឹងថា៖ «យើងត្រូវបានខាង Premier League ប្រាប់ថា ក្រុមយើងទទួលបានលទ្ធផលវិជ្ជមាននៃជំងឺកូវីដ ១៩ ចំនួន ១ ករណី សម្រាប់ការធ្វើតេស្តដំណាក់កាលចុងក្រោយ នៅឯកន្លែងហ្វឹកហាត់របស់យើង។ ដោយសារការរក្សាការសម្ងាត់របស់ពេទ្យ ឈ្មោះរបស់អ្នកឆ្លងនោះ នឹងមិនត្រូវបានប្រាប់ឲ្យដឹងឡើយ»។
សេចក្ដីប្រកាសរបស់ក្លិប ដែលមានទីតាំងនៅក្រុងឡុងដ៍មួយនេះ បានឲ្យដឹងទៀតថា៖ «ឥឡូវហ្នឹង បុគ្គលម្នាក់នោះ មិនមានបង្ហាញរោគសញ្ញាអ្វីទេ ហើយពេលនេះ នឹងត្រូវដាក់ឲ្យនៅដាច់ដោយឡែករយៈពេល ៧ ថ្ងែ ស្របតាមការណែនាំអ្នកគ្រប់គ្រងក្របខ័ណ្ឌ Premier League។ សម្រាប់ក្លិបរបស់យើងនឹងបន្តអនុវត្តយ៉ាងតឹងរ៉ឹង ដើម្បីត្រៀមចាំការចាប់ផ្ដើមឡើងវិញរបស់ Premier League ចំពោះវិធានការហ្វឹកហាត់ ដែលនឹងធានាបានថា កន្លែងហ្វឹកហាត់របស់យើង នៅតែមានសុវត្ថិភាព និងបរិយាកាសការងារ ដែលគ្មានការឆ្លងវីរុស»។
កីឡាករ និងបុគ្គលិកទាំងអស់ ក្នុងក្លិប នៅក្របខ័ណ្ឌ Premier League បានធ្វើតេស្ត កាលពីថ្ងៃចន្ទ និងអង្គារ ហើយលទ្ធផលវិជ្ជមានក្នុងចំនួនតិចតួចបែបនេះ កំពុងបង្ហាញនូវសញ្ញាល្អមួយទៀត សម្រាប់ក្របខ័ណ្ឌដ៏ល្បីលើលោកមួយនេះ ខណៈខ្លួនកំពុងព្យាយាមបញ្ចប់យុទ្ធនាការ ដែលត្រូវបានផ្អាក។ មកទល់ពេលនេះ ការធ្វើតេស្តទាំង ៥ លើក ឃើញថា មានលទ្ធផលវិជ្ជមានសរុប ១៣ ករណី ក្នុងចំណោមការធ្វើតេស្ត ៥ ០៧៩ នាក់។
ជាមួយគ្នានេះ កីឡាករ និងបុគ្គលិករបស់ Premier League ត្រូវធ្វើតេស្ត ២ ដង ក្នុង ១ សប្ដាហ៍ ខណៈខាងលីកប៉ុនប៉ងឲ្យមានការចាប់ផ្ដើមវិញ នៅថ្ងៃទី១៧ ខែមិថុនា នេះ ក្រោយការផ្អាកក្នុងខែមីនា ដោយសារការរាតត្បាតនៃជំងឺខាងលើ ហើយពាក់ព័ន្ធនឹងតេស្តចុងក្រោយនេះ ក្នុងសេចក្ដីប្រកាសរបស់ខ្លួនក្របខ័ណ្ឌ Premier League បានសរសេររៀបរាប់ថា៖ «ក្របខ័ណ្ឌ Premier League ថ្ងៃនេះ អាចធ្វើការអះអាងថា ថ្ងៃចន្ទ ទី ១ និងថ្ងៃអង្គារ ទី ២ ខែមិថុនា សម្រាប់ការធ្វើតេស្តចំពោះកីឡាករ និងបុគ្គលិករបស់ក្លិប ចំនួន ១ ១៩៧ នាក់ ដើម្បីរកជំងឺកូវីដ ១៩ ឃើញថាមានអ្នកវិជ្ជមានតែមួយករណីប៉ុណ្ណោះ»៕ AFP/VN