ក្រុងឡុងដ៍៖ ក្រុម Tottenham Hotspur បានដេញតាមពីក្រោយនៃការនាំមុខ ២ គ្រាប់ រហូតយកឈ្នះទៅលើក្រុម Olympiakos ក្នុងលទ្ធផល ៤-២ និងបានឡើងទៅវគ្គ ១៦ ក្រុមចុងក្រោយនៃក្របខ័ណ្ឌ Champions League នៅក្នុងការដឹកនាំរបស់គ្រូបង្វឹកថ្មី គឺលោក Jose Mourinho កាលពីថ្ងៃអង្គារ។
ក្លិប Spurs គឺជាក្រុមមួយក្នុងចំណោម ៣ ក្រុមទៀត ដែលបានឡើងទៅវគ្គ ១៦ ក្រុមចុងក្រោយដែលនៅសល់ ១ ប្រកួតទៀត ខណៈក្រុម Man City និងក្រុម Real Madrid ក៏បានឡើងទៅវគ្គ ១៦ ចុងក្រោយដែរ។
វាមើលទៅដូចជាវាមិនមែនជារាត្រីល្អសម្រាប់ក្រុម Tottenham នោះទេនៅពេលពួកគេត្រូវបានគូប្រជែងនាំមុខ ២-០ នៅក្នុងរយៈពេល ១៩ នាទី ដោយខ្សែប្រយុទ្ធ Youssef El Arabi ជាមួយកីឡាករ Ruben Semedo រកបានម្នាក់ ១ គ្រាប់ សម្រាប់ក្រុមភ្ញៀវ Olympiakos។
ប៉ុន្តែកីឡាករ Dele Alli រកបាន ១ គ្រាប់ សម្រាប់ក្រុម Spurs នៅមុនពេលសម្រាក ហើយកីឡាករ Lucas Moura បានបញ្ជូនបាល់ឲ្យកីឡាករ Harry Kane ស៊ុតបញ្ចូលទីដើម្បីតាមស្មើវិញនៅរយៈពេល ៥ នាទី ក្រោយពីសម្រាកនៅតង់ទី ១។
លុះដល់នាទី ៧៣ ខ្សែប្រយុទ្ធ Serge Aurier រកបាន ១ គ្រាប់ទៀត ដើម្បីនាំមុខក្រុមភ្ញៀវ ៣-២ វិញម្ដងមុនពេលកីឡាករ Kane បានតែតបញ្ចូលទី ១ គ្រាប់ទៀត ក្រោយពីទទួលបានបាល់ពីការស៊ុត free-kick របស់កីឡាករ Christian Eriksen ដែលបានបង្ហាញខ្លួនលើកទី ២៤ និងជាកីឡាករលឿនបំផុតក្នុងការរកបាន ២០ គ្រាប់ នៅក្នុងប្រវត្តិសាស្ត្រក្របខ័ណ្ឌ Champions League។
លោក Mourinho គ្រូបង្វឹកក្លិប Spurs បានប្រាប់ BT Sport ថា៖ «ក្មេងប្រុសទាំងនេះបានផ្ដល់អ្វីគ្រប់យ៉ាងដែលមានអារម្មណ៍ល្អ ហើយយើងមានការប្រកួតលំបាកដែលត្រូវធ្វើជាច្រើនទៀត។ យើងអាចសម្លឹងឃើញការប្រកួតក្រុម Bayern Munich ដោយខ្សែចក្ខុផ្សេងទៀត»។
ក្រុម Spurs នឹងបញ្ចប់ត្រឹមលេខ ២ ក្នុងពូល B ដោយតាមពីក្រោយក្រុម Bayern នៅថ្ងៃចុងក្រោយរបស់ពួកគេដែលបានឈ្នះទាំង ៥ លើកនៃក្របខ័ណ្ឌអឺរ៉ុបនៅរដូវកាលនេះ ខណៈកីឡាករ Lewandowski រកបាន ៤ គ្រាប់ ក្នុងការប្រកួតដែលក្រុម Bayern បានឈ្នះក្រុម FK Crvena Zvezda ៦-០ កាលពីថ្ងៃអង្គារ។
ខ្សែប្រយុទ្ធប៉ូឡូញ Lewandowski បានប្រាប់ Sky អាល្លឺម៉ង់ថា៖ «ខ្ញុំសប្បាយចិត្តខ្លាំងណាស់នៅពេលខ្ញុំរកបាន ៤ គ្រាប់ តែម្នាក់ឯងបែបនេះ ហើយយើងឈ្នះទៀត»។
ទន្ទឹមនោះដែរ ក្លិប Man City របស់លោក Pep Guardiola ទទួលបានពិន្ទុដែលពួកគេត្រូវការ ដើម្បីបោះជំហានទៅមុខថែមទៀតនៅក្នុងពូល C ក្រោយពីប្រកួតស្មើជាមួយក្រុម Shakhtar Donetsk ១-១ នៅពេលកីឡាករ Ilkay Gundogan រកបានគ្រាប់បាល់បើកឆាកនៅនាទី ៥៦ ប៉ុន្តែត្រូវបានកីឡាករ Manor Solomon ជួយឲ្យក្លិបអ៊ុយក្រែននេះ តាមស្មើវិញក្នុងនាទីទី ៦៩។
លោក Guardiola បាននិយាយថា៖ «ដំណាក់កាលប្រកួតក្នុងពូល គឺតែងតែមានការលំបាក ប៉ុន្តែគោលដៅគឺត្រូវឡើងទៅវគ្គបន្ត ហើយយើងធ្វើបានសម្រេចរួចហើយ»។
ជ័យជម្នះនេះបានធ្វើឲ្យក្រុម Man City ឈរនៅលើកំពូលតារាងនៃពូល C មាន ១១ ពិន្ទុ ក្នុង ៥ ប្រកួត ខណៈក្រុម Shakhtar ឈរនៅចំណាត់ថ្នាក់លេខ ២ ដេញតាមពីក្រោយក្រុម Man City ៥ ពិន្ទុ៕ AFP/SN