ក្រុងម៉ុងតេវីដេអូ៖ អ្នករកគ្រាប់បាល់បានច្រើនជាងគេក្នុងក្រុមជម្រើសជាតិអ៊ុយរូហ្គាយ Luis Suarez ទទួលបានលទ្ធផលវិជ្ជមាននៃជំងឺកូវីដ ១៩ ហើយនឹងត្រូវខកខានក្នុងប្រកួត ដែលត្រូវប៉ះជាមួយប្រេស៊ីល សម្រាប់វគ្គជម្រុះ World Cup។ នេះបើតាមការឱ្យដឹងពីសំណាក់ថ្នាក់ដឹកនាំបាល់ទាត់របស់ជាតិកាលពីថ្ងៃចន្ទ។
តេស្តវិជ្ជមាននេះ ក៏តម្រូវឱ្យ Suarez នឹងអវត្តមានផងដែរជាមួយក្លិប Atletico Madrid ដែលត្រូវធ្វើការប្រកួតនៅក្របខ័ណ្ឌ La Liga របស់អេស្ប៉ាញទល់នឹងក្រុម Barcelona ដែលវាជាលើកដំបូងរបស់គេ ក្នុងការប្រឈមជាមួយក្លិបចាស់របស់ខ្លួន។
សហព័ន្ធបាល់ទាត់ប្រទេសអ៊ុយរូហ្គាយ បានចេញសេចក្ដីប្រកាសថា៖ «តេស្តត្រូវបានធ្វើចំពោះសមាជិកទាំងអស់នៃក្រុមជម្រើសជាតិ ដោយជាលទ្ធផលឃើញថា កីឡាករ Luis Suarez និង Rodrigo Munoz ព្រមទាំងមន្ត្រី ១ រូប លោក Matias Faral សុទ្ធតែវិជ្ជមានជំងឺកូវីដ ១៩»។
សហព័ន្ធក៏បន្ថែមទៀតថា៖ «អ្នកទាំង ៣ មានសុខភាពល្អជាធម្មតាទេ»។ កាលពីថ្ងៃសៅរ៍ ខ្សែការពារ Matias Vina ក៏តេស្តវិជ្ជមានដែរ ក្រោយការប្រកួត ដែលអ៊ុយរូហ្គាយឈ្នះក្រុមកូឡុំប៊ី ៣-០ នាក្រុង Barranquilla។
ក្រុមអ៊ុយរ៉ូហ្គាយ ដែលអត់ដែលឈ្នះប្រេស៊ីលសោះ តាំងពីឆ្នាំ ២០០១ មក សង្ឃឹមថា នឹងអាចទាញផលចំណេញពីការអវត្តមានរបស់កីឡាករឆ្នើម Neymar ពេលប៉ះគ្នានៅក្រុងម៉ុងតេវីដេអូ នាព្រឹកថ្ងៃពុធ។
សម្រាប់ការប្រកួតវគ្គជម្រុះ World Cup 2022 នៅប្រទេសកាតា ប្រចាំតំបន់អាមេរិកឡាទីននេះ ក្រោយបញ្ចប់ ៣ ប្រកួតកន្លងទៅ ឃើញថា ក្រុមប្រេស៊ីលឈរនៅលេខ ដោយមាន ៩ ពិន្ទុ ខណៈអាហ្សង់ទីន មាន ៧ ពិន្ទុ នៅលេខ ២ ហើយក្រុមអេក្វាទ័រ និងក្រុមអ៊ុយរូហ្គាយ នៅតាមលំដាប់ទី៣ និងទី៤ មាន ៦ ពិន្ទុដូចគ្នា៕ AFP/VN