.jpg)
Suarez សម្ដែងការខកចិត្ត ក្រោយស៊ុតបាល់ខុសគោលដៅ អំឡុងពេលលេងឱ្យក្រុម Barca កន្លងមក។ AFP
បាសេឡូណា៖ ក្រុម Atletico Madrid (Atletico) កាលពីយប់ថ្ងៃពុធ បានប្រកាសពីការមានសមាជិកថ្មី គឺ Luis Suarez របស់ក្រុម Barcelona (Barca) ដែលការអះអាងនេះបង្ហាញថា ខ្សែប្រយុទ្ធសញ្ជាតិអ៊ុយរូហ្គាយនឹងបន្តនៅក្របខ័ណ្ឌ La Liga អេស្ប៉ាញទៀត ជាជាងទៅចូលរួមជាមួយក្រុម Juventus នៅអ៊ីតាលី។
Barca ឲ្យដឹងថា Atletico ព្រមព្រៀងចំណាយ ៦ លានអឺរ៉ូ ($៧ លាន) សម្រាប់តម្លៃខ្លួន Suarez ដែលបានចាកចេញពីការហ្វឹកហាត់ចុងក្រោយទាំងទឹកភ្នែកនៅថ្ងៃពុធ ពេលត្រូវប្រាប់ថា មិនត្រូវបានគ្រូបង្វឹកថ្មី លោក Ronald Koeman ទុកជាជម្រើសឡើយ ខណៈកុងត្រារបស់កីឡាករវ័យ ៣៣ ឆ្នាំរូបនេះ ជាមួយក្លិបនៅកាតាឡាន់សល់ ១ ឆ្នាំទៀត។
Atletico ឲ្យដឹងក្នុងសេចក្ដីប្រកាសថា៖ «ក្លិប Atletico Madrid និង Barcelona បានព្រមព្រៀងជាមួយគ្នាហើយ សម្រាប់ការផ្ទេរយក Luis Suarez ដោយរង់ចាំតែការពិនិត្យសុខភាព និងការយល់ព្រមផ្លូវការក្នុងកុងត្រាថ្មីសម្រាប់ខ្សែប្រយុទ្ធអន្តរជាតិអ៊ុយរូហ្គាយជាមួយក្លិបយើងប៉ុណ្ណោះ»។
ឯ Barca ជូនដំណើរ Suarez ជាមួយសារខ្លីៗថា៖ «ក្លិប Barcelona សុំធ្វើការអរគុណចំពោះកីឡាករសម្រាប់ការលះបង់ និងសូមឲ្យគេទទួលបានជោគជ័យនាពេលអនាគត»។
Suarez នឹងទៅជំនួស Alvaro Morata នៅតំបន់ខាងលើរបស់ Atletico ក្រោយខ្សែប្រយុទ្ធសញ្ជាតិអេស្ប៉ាញ ធ្វើដំណើរទៅពាក់ឯកសណ្ឋានរបស់ក្រុម Juventus ក្នុងលក្ខខណ្ឌខ្ចីជើង ១ រដូវកាល អមដោយជម្រើសទិញផ្ដាច់។
កីឡាករ Suarez ដែលក្លាយជាកីឡាករ Barca ក្នុងឆ្នាំ ២០១៤ ដោយផ្ទេរពី Liverpool ចាកចេញដោយបន្សល់នូវសមិទ្ធផលសម្រាប់ក្លិបយ៉ាងច្រើន ដែលគេរួមចំណែក ដូចជាពាន Champions League ១ លើក ព្រមទាំងពានក្នុងស្រុក La Liga និង Copa del Rey ៤ ដងដូចគ្នា ហើយគេ ក៏ជាអ្នកស៊ុតបញ្ចូលទីបានច្រើនទី៣ ផងដែរនៅ Barca ជាមួយនឹងគ្រាប់បាល់ ១៩៨ គ្រាប់ តាមពីក្រោយ Cesar Rodriguez (២៣២ គ្រាប់) និង Lionel Messi (៦៣៤ គ្រាប់)។
ការប្រកាសនេះ ធ្វើឲ្យ Suarez ក្លាយជាខ្សែប្រយុទ្ធទី៣ នៅប៉ុន្មានឆ្នាំចុងក្រោយ ដែលក្លិបគូប្រជែងនៅ La Liga ទាំង ២ ផ្ទេរពីគ្នា ដោយកីឡាករ David Villa ត្រូវលក់ទៅ Atletico ក្នុងឆ្នាំ ២០១៣ ខណៈ Antoine Griezmann ត្រូវBarca ទិញ កាលពីឆ្នាំមុន។
មុនមានកិច្ចព្រមព្រៀងនេះ បណ្ដាញព័ត៌មានជាច្រើនបានផ្សព្វផ្សាយព្រោងព្រាតថា Suarez កំពុងមានទំនាក់ទំនងផ្លាស់ទៅកាន់ក្លិប Juventus នៅក្របខ័ណ្ឌ Serie A ហើយបានចូលប្រលងយកសញ្ជាតិអ៊ីតាលី ដើម្បីបានលិខិតឆ្លងដែនអឺរ៉ុប ហើយមានសិទ្ធិលេងក្នុងនាមជាកីឡាករអឺរ៉ុប ដោយសារកូតាបញ្ចូលកីឡាករមិនមានសញ្ជាតិអឺរ៉ុបរបស់ក្រុមនៅក្រុងទូរីនបានពេញអស់ហើយ។
តែយ៉ាងណាក្ដី ក្រុមរដ្ឋអាជ្ញានៅអ៊ីតាលីបានប្រាប់កាលពីថ្ងៃអង្គារថា ខ្លួនមានភ័ស្តុតាងដែលបង្ហាញថា ការប្រឡងភាសារបស់ Suarez ដើម្បីបានសញ្ជាតិអ៊ីតាលីនោះ ត្រូវបានរៀបចំទាំងអស់ពោល គឺមានអ្នកជួយធ្វើឱ្យ៕ AFP/VN
