.jpg)
Swiatek ថើបពានក្នុងកម្មវិធី French Open 2020 ដែលនាងឈ្នះលើកដំបូង ក្រោយផ្ដួលគូប្រកួត។ AFP
ក្រុងប៉ារីស: កីឡាការិនីសញ្ជាតិប៉ូឡូញ Iga Swiatek បានជួយឱ្យប្រទេសរបស់នាង ស្គាល់ពាន Grand Slam ឯកត្តជន ជាលើកដំបូង កាលពីថ្ងៃសៅរ៍ ពេលដែលនាងអាចផ្ដួលគូប្រជែងរបស់ខ្លួន គឺកីឡាការិនីអាមេរិក Sofia Kenin ក្នុងលទ្ធផល ៦-៤ និង ៦-១ នៅវគ្គផ្ដាច់ព្រ័ត្រ ដើម្បីក្លាយជាអត្តពលិកក្មេងបំផុតឈ្នះពានរង្វាន់កីឡាវាយកូនបាល់ (តិន្នីស) ក្នុងកម្មវិធី French Open ផ្នែកនារី គិតតាំងពីឆ្នាំ ១៩៩២ មក។
កីឡាការិនី Swiatek វ័យ ១៩ឆ្នាំ ដែលស្ថិតនៅចំណាត់ថ្នាក់ពិភពលោកទាបបំផុត (លេខ ៥៤) បានឈ្នះពាន នៅ Roland Garros ក្នុងយុគសម័យទំនើបនេះ គឺជាម្ចាស់ជើងឯកពានកម្មវិធីធំ មិនធ្លាប់មានទី ៩ ក្នុងចំណោមព្រឹត្តិការណ៍ Grand Slam ១៤ លើក កន្លងមកនេះ។
«ប្រហែល វាត្រូវតែបែបនោះ ពោលគឺអ្នកមានចំណាត់ថ្នាក់ទាប ត្រូវបានឈ្នះពាន Grand Slam ។ កីឡាវាយតិន្នីសផ្នែកនារី ពេលនេះ ប្លែកៗម៉េចមិនដឹង»។ នេះជាសម្ដីរបស់កីឡាការិនី Swiatek ដែលនឹងឡើងទៅដល់ចំណាត់ថ្នាក់ទី ១៧ ពិភពលោក ក្រោយទទួលបានជ័យជម្នះនេះ។
កីឡាការិនី Swiatek បន្តទៀតថា៖ «ខ្ញុំមិនដឹងថា មានអ្វីកើតឡើងនោះឡើយ។ វាធ្វើឱ្យខ្ញុំរំភើបខ្លាំងណាស់ ហើយដូចជា ចម្លែកមែនទែន។ ២ ឆ្នាំមុន ខ្ញុំឈ្នះពាន Grand Slam ផ្នែកយុវជន នៅ Wimbledon ហើយពេលនេះ ខ្ញុំឈ្នះទីនេះទៀត។ មានអារម្មណ៍ដូចពេលវេលាលឿនមែនទែន»។
សមិទ្ធផលនេះ បានធ្វើឱ្យ Swiatek បំបែកប្រវត្តិសាស្ត្ររបស់មិត្តរួមជាតិ Jadwiga Jedrzejowska ដែលជាអ្នកវាយកូនបាល់របស់ប្រទេសប៉ូឡូញដ៏ឆ្នើម ១ រូប កាលពីសម័យសង្គ្រាមលោក ពេលដែលអតីតកីឡាការិនីរូបនោះ បញ្ចប់នៅចំណាត់ថ្នាក់ជើងឯករង នៅក្រុង ប៉ារីស នេះ ក្នុងឆ្នាំ ១៩៣៩។
កីឡាការិនី Swiatek បន្ថែមទៀតថា៖ «ខ្ញុំមានមោទនភាពចំពោះខ្លួនឯងណាស់ ដោយខ្ញុំបានធ្វើនូវកិច្ចការដ៏ល្អបំផុតមួយ នៅ ២ សប្តាហ៍ចុងក្រោយនេះ។ ខ្ញុំមិនរំពឹងថា នឹងឈ្នះពានរង្វាន់នេះទេ។ វាពិតជាអស្ចារ្យណាស់សម្រាប់ខ្ញុំ។ ខ្ញុំមានអារម្មណ៍ដូចជាខ្ញុំបង្កើតប្រវត្តិសាស្ត្រ»។
ជោគជ័យនេះ ក៏បាននាំឱ្យ Swiatek ក្លាយជាម្ចាស់ជយលាភីកម្មវិធី French Open ផ្នែកនារីក្មេងជាងគេបំផុតផងដែរ គិតតាំងពីអតីតកីឡាការិនី Monica Seles ធ្វើបាន កាលពី ២៨ឆ្នាំមុន ហើយនាង គឺជាកីឡាការិនី ប៉ូឡូញ ទី ២ ដែលឡើងដល់វគ្គផ្ដាច់ព្រ័ត្រពាន Grand Slam សម្រាប់យុគសម័យ Open នេះ បន្ទាប់ពី Agnieszka Radwanska ធ្វើបានក្នុងឆ្នាំ ២០១២ នៅ Wimbledon ។ កម្មវិធីមុនៗ Swiatek មិនដែលឆ្លងផុតវគ្គ ១៦ នាក់ឡើយ។
ចំណែកកីឡាការិនីវ័យ ២១ ឆ្នាំ Kenin ដែលជាម្ចាស់ជើងឯកកម្មវិធី Australian Open 2020 បានប្រឹងប្រែងយ៉ាងខ្លាំង ដើម្បីអាចក្លាយជាស្ត្រីទី ១ ដែលអាចកាន់ពានលំដាប់ Grand Slam ដល់ទៅ ២ ក្នុងឆ្នាំតែ១ ចាប់តាំងពី Angelique Kerber សម្រេចបានបែបហ្នឹង ក្នុងឆ្នាំ ២០១៦ តែចុងក្រោយមិនទទួលបានដូចបំណងឡើយ៕ AFP/VN
