.jpg)
ប៉ារីស៖ Iga Swiatek ម្ចាស់ជើងឯកពាន French Open 2020 បង្ហាញមុខក្នុងចំណោមកីឡាការិនីលំដាប់កំពូលទាំង ២០ រូប លើកដំបូងកាលពីថ្ងៃចន្ទ ដោយបានឡើងទៅដល់ចំណាត់ថ្នាក់ល្អបំផុតរបស់ពិភពលោកទី ១៧ ក្នុងតារាងចំណាត់ថ្នាក់របស់សហព័ន្ធកីឡាវាយកូនបាល់ (តិន្នីស) នារី (WTA)។
កីឡាករ Rafael Nadal មិនបានឡើងទៅទីកំពូលក្នុងតារាងចំណាត់ថ្នាក់របស់សហព័ន្ធកីឡាវាយកូនបាល់ផ្នែកបុរស (ATP) ឡើយ ទោះឈ្នះ Novak Djokovic ៦-០ ៦-២ និង ៧-៥ អំឡុងការប្រកួតវគ្គផ្ដាច់ព្រ័ត្រកាលពីថ្ងៃអាទិត្យ ដើម្បីលើកពាននៅ Roland Garros នាក្រុងប៉ារីស ប្រទេសបារាំង ជាលើកទី ១៣ និងជាលើកទី ២០ សម្រាប់ការឈ្នះពានលំដាប់ Grand Slam ក៏ដោយ។
Djokovic ដែលឈ្នះពានកម្មវិធី Australian Open នៅអូស្ត្រាលីកាលពីខែកុម្ភៈ ឈរលេខ ១ ពិភពលោកដដែល ដោយ Nadal នៅលេខ ២ បន្តបន្ទាប់ដោយម្ចាស់ជើងឯក US Open នៅអាមេរិក កីឡាករ Dominic Thiem និង Roger Federer។
កីឡាការិនី Swiatek វ័យ ១៩ ឆ្នាំ ចូលប្រកួតនៅ French Open ជាមួយនឹងលេខ ៥៤ មុននឹងក្លាយជាជើងឯកផ្នែកនារីដែលមានចំណាត់ថ្នាក់ទាបបំផុតក្នុងព្រឹត្តិការណ៍ Grand Slam លើទីលានដីក្រហម។
ជ័យជម្នះលើកីឡាការិនី Sofia Kenin ៦-៤ និង ៦-១ នៅថ្ងៃសៅរ៍ ធ្វើឱ្យ Swiatek ក្លាយជាជើងឯកពានលំដាប់កំពូលឯកត្តជនលើកដំបូង ហើយក៏ធ្វើឱ្យក្លាយជាអត្តពលិកប៉ូឡូញទី១ ដែលបានឈ្នះពានសម្រាប់វិញ្ញាសាវាយទោលផងដែរ។
ចំណាត់ថ្នាក់ទីកំពូលទាំង ៣ ផ្នែកនារីនៅដដែល ដោយកីឡាការិនី Ashleigh Barty ឈរទី ១, Simona Halep លេខ ២ និង Naomi Osaka លេខ ៣៕ AFP/VN
