ភ្នំពេញៈ សហព័ន្ធកីឡាវាយកូនបាល់កម្ពុជា នឹងយកការប្រកួតកីឡាវាយកូនបាល់ជ្រើសរើសជើងឯកថ្នាក់ជាតិ ឆ្នាំ ២០១៨ ដែលនឹងត្រូវធ្វើពីថ្ងៃទី ២១ ដល់ទី ២៤ ខែធ្នូ ខាងមុខនេះ ជាការប្រកួតដំណាច់ឆ្នាំចុងក្រោយ ដើម្បីជ្រើសរើសយកយុវជនថ្នាល មានទេពកោសល្យ និងសមត្ថភាព សម្រាប់ដាក់ចូលហ្វឹកហាត់ក្នុង ក្រុមថ្នាលជម្រើសជាតិត្រៀមការប្រកួតស៊ីហ្គេម ឆ្នាំ ២០២៣ ដែលត្រូវធ្វើនៅកម្ពុជា។
លោក ជា ពៅ គ្រូបង្វឹកជម្រើសជាតិកីឡាវាយកូនបាល់ បានប្រាប់ កាលពីថ្ងៃពុធថា គិតមកដល់ពេលនេះ មានក្លិបចំនួន ៩ បានចូលរួម និងមានអត្តពលិកចំនួន ៥៦ នាក់ ក្នុងនោះមានយុវជនជាង ៣០ នាក់ គឺចំនួនយុវជននេះ មានការកើនឡើងជាងឆ្នាំមុនជាង ២០ ភាគរយ ហើយពួកគេត្រូវប្រកួតប្រជែង នៅលើវិញ្ញាសាចំនួន ៥។
លោកបាននិយាយថា៖ «ការកើនឡើងចំនួនយុវជននៅឆ្នាំនេះ វាស្របទៅតាមការចង់បានរបស់សហព័ន្ធ ព្រោះការប្រកួតជើងឯកថ្នាក់ជាតិនេះ យើងផ្តោតខ្លាំងទៅលើក្រុមយុវជន ដើម្បីយើងអាចជ្រើសរើសបានអ្នកមានទេពកោសល្យ ដាក់ចូលហ្វឹកហាត់ក្នុងក្រុមថ្នាលជម្រើសជាតិ ត្រៀមការប្រកួតស៊ីហ្គេម ឆ្នាំ ២០២៣»។
លោក ជា ពៅ ដែលជាអគ្គលេខាធិការរងសហព័ន្ធកីឡាវាយកូនបាល់កម្ពុជាផងនោះបានចាត់ទុកការកើនឡើងនៃចំនួនយុវជនចូលរួមនេះថា ជាចំណុចជោគជ័យមួយរបស់សហព័ន្ធ ព្រោះសហព័ន្ធ មានផែនការជ្រើសរើសយុវជនមានទេពកោសល្យ ទៅហ្វឹកហាត់ និងចូលរួមប្រកួត នៅក្រៅប្រទេស ហើយក្រសួងអប់រំ យុវជន និងកីឡា និងគណៈកម្មាធិការជាតិអូឡាំពិកកម្ពុជា (NOCC) ក៏មានផែនការបញ្ជូនអត្តពលិករបស់សហព័ន្ធកីឡា ជាតិនីមួយៗ ទៅហ្វឹកហាត់នៅក្រៅប្រទេសត្រៀមស៊ីហ្គេម ឆ្នាំ ២០២៣ ដូចគ្នា។
លោកបានបន្ថែមថា៖ «ការកើនឡើងចំនួនយុវជននេះ បានធ្វើឲ្យយើងមានសង្ឃឹមច្រើន ព្រោះនៅក្នុងឆ្នាំ ២០១៩ ខាងមុខនេះ សហព័ន្ធរបស់យើង មានផែនការបញ្ជូនយុវជនទៅហ្វឹកហាត់នៅក្រៅប្រទេស ហើយយើងក៏នឹងបញ្ជូនពួកគាត់ឲ្យចូលរួមប្រកួតគ្រប់ព្រឹត្តិការណ៍ ដែលសហព័ន្ធកីឡាវាយកូនបាល់អន្តរជាតិ និងបណ្តាប្រទេសផ្សេងៗបានរៀបចំ ផងដែរ គឺយើងនឹងតម្រង់ទិសឲ្យពួកគេចូលរួមឲ្យបានច្រើន ព្រោះក្រសួងអប់រំ និង NOCC ក៏មាន គម្រោងបញ្ជូនក្រុមយុវជនមកពីសហព័ន្ធជាតិ ទៅហ្វឹកហាត់នៅជប៉ុន កូរ៉េខាងត្បូង និងប្រទេសចិនផងដែរ»។
លោកបានបញ្ជាក់ថា៖ «សហព័ន្ធរបស់យើង បានដាក់ចំនួនអត្តពលិកទៅ ក្រសួង និង NOCC រួចហើយ គឺយើងមានផែនការបញ្ជូនកីឡាករ ៤ នាក់ និងកីឡាការិនី ២ នាក់ ទៅហាត់នៅក្រៅប្រទេស ដើម្បីត្រៀមលក្ខណសម្បត្តិការប្រកួតស៊ីហ្គេម ឆ្នាំ ២០២៣ ឲ្យបានល្អ អ៊ីចឹងការប្រកួតថ្នាក់ជាតិលើកនេះ ដើម្បីយើងជ្រើសរើសក្រុមយុវជនមានបទពិសោធល្អ និងមានសមត្ថភាពកម្រិតខ្ពស់»។
គួរបញ្ជាក់ថា សហព័ន្ធកីឡាវាយកូនបាល់កម្ពុជា ត្រូវបានអនុញ្ញាតឲ្យមានការប្រមូលផ្តុំក្រុមថ្នាលជម្រើសជាតិចំនួន ៨ នាក់ និងគ្រូ ២ នាក់ ក្នុងឆ្នាំ ២០១៨ នេះ ប៉ុន្តែនៅឆ្នាំ ២០១៩ សហព័ន្ធមួយនេះ គ្រោងស្នើសុំទៅក្រសួងអប់រំ ឲ្យមានការបន្ថែមអត្តពលិក ២ នាក់ទៀត ហើយក្រុមថ្នាលចំនួន ៨ នាក់ ក៏អាចនឹងមានការផ្លាស់ប្តូរដាក់អ្នកថ្មីផងដែរ បើសិនជាអ្នកចាស់ មិនខំប្រឹងហាត់ និងគោរពវិន័យមិនបានល្អ ពេលប្រមូលផ្តុំនោះ ព្រោះសហព័ន្ធកីឡាវាយកូនបាល់កម្ពុជា ចង់ឲ្យក្រុមថ្នាលមានសមត្ថភាពពិតប្រាកដ អាចដណ្តើមបានមេដាយជូនជាតិ នៅស៊ីហ្គេម ឆ្នាំ ២០២៣៕