.jpg)
ពុយ វណ្ណៈ ត្រូវប្រឈមជាមួយ សោម វិឆ័យ នៅក្នុងការប្រកួតវគ្គ ១/២ ផ្តាច់ព្រ័ត្រ នៅ TV5។ រូបថត សហការី
ភ្នំពេញ៖ ការប្រកួតពានរង្វាន់ TV5 Boxing Knock Out Series ក្នុងទម្ងន់ ៦៣,៥ គីឡូក្រាម នឹងបើកដំណើរការប្រកួតវគ្គពាក់កណ្តាលផ្តាច់ព្រ័ត្រនៅលើសង្វៀនប៉ុស្តិ៍លេខ ៥ នាថ្ងៃសៅរ៍នេះ ដោយក្នុងនោះកីឡាករ សោម វិឆ័យ ត្រូវប៉ះ ពុយ វណ្ណៈ ហើយ រិន សារ័ត្ន ត្រូវជួប វ៉ែន ហុងជីវ៉ុង ដើម្បីប្រជែងយកកៅអីវគ្គផ្តាច់ព្រ័ត្រ។
យ៉ាងណាក៏ដោយការជួបប៉ះគ្នារវាង សោម វិឆ័យ របស់ក្លិបវិបុលខណ្ឌពោធិ៍សែនជ័យនិង ពុយ វណ្ណៈ មកពីក្លិបឃ្លាំងមឿងកីឡា គឺគិតមកដល់ពេលនេះ នៅមិនទាន់ច្បាស់នៅឡើយ ព្រោះអាចមានរឿងចម្រូងចម្រាស ដោយសារតែ ពុយ វណ្ណៈ ទើបបានដកពាក្យឈប់ប្រកួត នៅលើសង្វៀន CNC ដោយលើកមូលហេតុថា ឈឺដៃ ប៉ុន្តែគេបែរជាមានឈ្មោះមកប្រកួតក្នុងវគ្គពាក់កណ្តាលផ្តាច់ព្រ័ត្រនេះទៅវិញ។ ហេតុនេះ ពុយ វណ្ណៈ អាចប្រឈមទៅនឹងបទល្មើសក្នុងកិច្ចសន្យាជាមួយ CNC។ ចំពោះដំណោះស្រាយយ៉ាងណានោះ មិនត្រូវបានមន្ត្រីទទួលខុសត្រូវប្រដាល់ នៅសង្វៀន TV5 ទម្លាយឲ្យដឹងនៅឡើយទេ។
ប៉ុន្តែលោក រាជ សុផែន មន្ត្រីព័ត៌មាន និងជាគណៈកម្មការសង្វៀនប៉ុស្តិ៍លេខ ៥ បាននិយាយថា៖ «គិតមកដល់ពេលនេះ ពុយ វណ្ណៈ ត្រូវឡើងប្រកួត ដោយគ្មានបញ្ហាអ្វីទេ ហើយចំពោះរឿងនេះអ្វីៗផ្សេងទៀត គឺ សាមីខ្លួនជាអ្នកដោះស្រាយខ្លួនឯង»។
កីឡាករ សោម វិឆ័យ អាចមានលទ្ធភាពច្រើន ក្នុងការឈ្នះកៅអីទៅវគ្គផ្តាច់ព្រ័ត្រ បើទោះបីជា ពុយ វណ្ណៈ មិនអាចមកប្រកួត ឬមកប្រកួតក៏ដោយ។ ប្រភពមួយសុំមិនបញ្ចេញឈ្មោះប្រាប់ថា ពុយ វណ្ណៈ ទំនងមិនបានហ្វឹកហាត់ជាប់លាប់ទេ ដោយជាប់ក្របខ័ណ្ឌមន្ត្រីនគរបាលនៅខេត្តសៀមរាប ហើយការប្រកួតនេះ ក៏ប្រឈមនឹងសង្វៀន CNC ដែលសុំដកខ្លួន ដោយអះអាងថាឈឺ ប៉ុន្តែបែរជាមកប្រកួតនៅសង្វៀន TV5 បាន។
លោក ឡុង វិបុល គ្រូបង្វឹករបស់ សោម វិឆ័យ ប្រាប់ថា៖ «សោម វិឆ័យ មានភាគរយខ្ពស់ក្នុងការដណ្តើមកៅអីវគ្គផ្តាច់ព្រ័ត្រ ដែលប្រាក់រង្វាន់អមចំនួន ៤ ០០០ ដុល្លារ»។ លោកបន្ថែមថា៖ «សមត្ថភាពរបស់ សោម វិឆ័យ អាចឈានទៅដល់ ព្រោះហ្វឹកហាត់ជាប្រចាំ ហើយបេក្ខភាពដែលត្រូវប៉ះនោះ មិនមែនជាឧបសគ្គធំនោះឡើយ»។
នៅមុនឡើងមកដល់វគ្គ ១/២ ផ្តាច់ព្រ័ត្រនេះ សោម វិឆ័យ បានយកឈ្នះ ផាន រះ ដោយពិន្ទុ រួចបន្តឈ្នះ គង់ សំបូរ និងបានឈ្នះ រឿម វណ្ណៈ នៅក្នុងការប្រកួតជម្រុះដំណាក់កាលទី ៣។ ចំណែក ពុយ វណ្ណៈ បានឈ្នះ លីន សុខឈុន រួចបន្តឈ្នះ សូត្រ ខេវិន ហើយប្រកួតជម្រុះលើកទី ៣ បានឈ្នះ ឡុង បេនលឿន។
សម្រាប់ការជួបគ្នារវាង រិន សារ័ត្ន និង វ៉ែន ហុងជីវ៉ុង គេមានជំនឿថា សារ័ត្ន មានប្រៀប ខណៈដែល ហុងជីវ៉ុង ភាគច្រើនខ្ជីខ្ជាក្នុងការហ្វឹកហាត់ ហើយនៅក្នុងការប្រកួតវគ្គជម្រុះ រិន សារ័ត្ន បានឈ្នះ សល់ ពិសិដ្ឋ ឈ្នះ អ៊ុង កំសត់ និងឈ្នះខាំ សាបាន។ ចំណែក ហុងជីវ៉ុង វិញនៅជុំទី១ ឈ្នះ សុខ សុវណ្ណ ជុំទី២ ឈ្នះ សោម ស៊ីថៃ និងជុំទី៣ ឈ្នះ ណាម ម៉ូរ៉ាក់ ដោយពិន្ទុ។
កីឡាករ វ៉ែន ហុងជីវ៉ុង បានប្រាប់ថា៖ «មានទំនុកចិត្តឈ្នះ ៥០ ភាគរយ ប៉ុន្តែឡើងទៅដឹងតែវ៉ៃ ចំណែករឿងចាញ់ ឬឈ្នះ មិនហ៊ាននិយាយមុនទេ»។
ទោះយ៉ាងណា កីឡាករ វ៉ែន ហុងជីវ៉ុង ល្អជង្គង់ និងចាស់វស្សាជាង ប៉ុន្តែបច្ចេកទេស និងយុទ្ធសាស្ត្រប្រកួតមិនសូវឆ្លាត ព្រមទាំងប្រកួតមិនសូវកាចសាហាវនោះឡើយ ផ្ទុយពីនេះ រិន សារ័ត្ន ជាកីឡាករខ្ចីវស្សាជាង ប៉ុន្តែវ៉ៃមានយុទ្ធសាស្ត្រចេញចូលលឿនព្រមទាំងទឹកចិត្តប្រកួតក្លាហានជាង គឺវ៉ៃមិនប្រចាំឡើយ៕
