.jpg)
កាយវិការអបអរនេះហើយធ្វើឲ្យ Ronaldo កំពុងមានបញ្ហា។ AFP
អ៊ីតាលីៈ សហភាពបាល់ទាត់អឺរ៉ុបហៅកាត់ថា UEFA កាលពីថ្ងៃចន្ទបានបើកការស៊ើបអង្កេតលើករណីរបស់ខ្សែប្រយុទ្ធ Cristiano Ronaldo ដែលបានបង្ហាញកាយវិការមិនសមរម្យ បន្ទាប់ពីរូបគេបានស៊ុតបាល់បញ្ចូលទីទៅលើក្រុម Atletico Madrid ដើម្បីនាំជ័យជម្នះត្រឡប់មកឲ្យក្រុម Juventus វិញក្នុងវគ្គ ១៦ ក្រុមចុងក្រោយនៃក្របខ័ណ្ឌ Champions League កាលពីសប្តាហ៍មុន។
គណៈកម្មការបាល់ទាត់អឺរ៉ុបបាននិយាយថា Ronaldo កំពុងប្រឈមមុខនឹងការចោទប្រកាន់ពីបទ «ប្រព្រឹត្តអំពើមិនសមរម្យ» ក្រោយពីរូបគេបានធ្វើតម្រាប់តាមលោក Diego Simeone គ្រូបង្វឹកក្រុម Atletico Madrid ដោយពើងខ្លួនទៅមុខហើយយកដៃទាំង ២ ក្ដោបប្រដាប់ភេទ នៅពេល Juventus បានយកឈ្នះក្រុម Atletico Madrid ៣-០ កាលពីថ្ងៃអង្គារសប្ដាហ៍មុន ដើម្បីឡើងទៅវគ្គបន្តក្នុងលទ្ធផលឈ្នះទាំង ២ ជើង ៣-២។
ក្រោយពីបានស៊ុតបាល់ពិន័យ ១១ ម៉ែត្របញ្ចូលទីរួចហើយ Ronaldo បានបែរមុខទៅរកអ្នកគាំទ្រក្រុម Atletico ហើយបានធ្វើកាយវិការដូចគ្រូបង្វឹកលោក Simeone ដែលបានធ្វើដាក់អ្នកគាំទ្រ Juventus នៅពេលលោកបានដឹកនាំក្រុម Atletico យកឈ្នះក្រុម Juventus ២-០ កាលពីជើងទី ១ ខណៈការស៊ើបអង្កេតនេះនឹងបង្ហាញលទ្ធផលដោយសហភាពបាល់ទាត់អឺរ៉ុបនៅថ្ងៃទី ២១ ខែមីនាខាងមុខ។
ជាមួយការទម្លាក់ Atletico ក្នុងការប្រកួតវគ្គ ១៦ ក្រុមនោះបានជួយឲ្យក្រុម Juventus ឡើងមកក្រុម Ajax របស់ប្រទេសហូឡង់នៅក្នុងវគ្គ ៨ ក្រុមចុងក្រោយក្នុងក្របខណ្ឌ Champions League ហើយវគ្គនេះតម្រូវឲ្យក្រុមទាំង ២ ប្រកួតគ្នា ២ ជើងផងដែរ គឺជើងទី ១ នៅថ្ងៃទី ១១ ខែមេសានៅទីក្រុងអេមស្ទើដេម ប្រទេសហូឡង់ និងជើងទី ២ នៅថ្ងៃទី ១៦ ខែមេសានៅទីក្រុងទូរីន ប្រទេសអ៊ីតាលី។
យ៉ាងណាក៏ដោយជុំវិញការស៊ើបអង្កេតទៅលើការប្រើកាយវិការមិនសមរម្យរបស់ Ronaldo ទៅលើអ្នកគាំទ្រក្រុម Atletico នេះ លោក Massimiliano Allegri ដែលជាគ្រូបង្វឹករបស់ក្រុម Juventus មានការជឿជាក់ថា Ronaldo នឹងមិនត្រូវបានពិន័យ ឬផ្អាកការប្រកួតនោះទេ។
លោក Allegri បានបញ្ជាក់ថា៖ «ខ្ញុំគិតថាគ្រប់គ្នាមានសិទ្ធិធ្វើកាយវិការតាមចំណូលចិត្តរបស់ខ្លួននៅលើទីលានប្រកួត និងនៅកន្លែងអង្គុយមើលបាល់។ ខ្ញុំដូចជាមិនឃើញអ្វីខុសប្លែកនោះទេត្រឹមតែបញ្ចេញទង្វើផ្សេងៗនោះ ព្រោះគេមិនបានហាមឃាត់ឡើយ»។
គួររំឭកថាគ្រូបង្វឹកក្រុម Atletico លោក Simeone ត្រូវបានសហភាពបាល់ទាត់អឺរ៉ុបធ្វើការពិន័យជាប្រាក់ចំនួន ២ ម៉ឺនអឺរ៉ូ (២ ម៉ឺន ២ ពាន់ដុល្លារ) ចំពោះការប្រើកាយវិការមិនសមរម្យរបស់លោកស្រដៀងគ្នានឹង Ronaldo នេះដែរ ទៅលើអ្នកគាំទ្រក្រុម Juventus។
ជុំវិញបញ្ហានេះគ្រូបង្វឹកជនជាតិអាហ្សង់ទីនលោក Simeone បាននិយាយសំដៅទៅលើ Ronaldo យ៉ាងដូច្នេះថា៖ «គាត់នឹងបានឃើញពីរបៀបដែលខ្ញុំបានធ្វើនៅកីឡដ្ឋាន Wanda Metropolitano ហើយខ្ញុំកំពុងព្យាយាមបង្ហាញលក្ខណៈរបស់គាត់»។
ម្ចាស់ជើងឯកក្របខ័ណ្ឌ Champions League ៥ជំនាន់ Ronaldo គឺជាអ្នកស៊ុតបញ្ចូលទីបានច្រើនជាងគេក្នុងការប្រកួតពានអឺរ៉ុបបានចំនួន ១២៤ គ្រាប់ក្នុងការប្រកួតចំនួន ១៦០៕ SN
