ក្រុងប៊ែន: UEFA ត្រៀមសម្រេចនៅសប្ដាហ៍ក្រោយថា តើនឹងបញ្ចប់ការប្រកួតប្រជែងនៃក្របខ័ណ្ឌ Champions League និង Europa League រដូវកាលនេះ យ៉ាងដូចម្ដេច ក្រោយផ្អាកតាំងពីខែមីនា ដោយសារការរីករាលដាលនៃវីរុសកូរ៉ូណា។ នេះបើតាមស្ថាប័នគ្រប់គ្រងបាល់ទាត់អឺរ៉ុប ឲ្យដឹងនៅថ្ងៃព្រហស្បតិ៍នេះ។
UEFA បានឲ្យដឹង នៅក្នុងសេចក្តីថ្លែងការណ៍មួយថា គណៈកម្មាធិការប្រតិបត្តិរបស់ខ្លួននឹងជួបប្រជុំគ្នាតាមរយៈវីដេអូខនហ្វឺរ៉ែនមួយនៅថ្ងៃទី ១៧ ខែមិថុនា ដែលរបៀបវារៈនេះ នឹងរួមបញ្ចូលទាំងការប្រកួតវគ្គ ១៦ ក្រុម នាពេលខាងមុខ និងការកំណត់ ដែលមានទំនាក់ទំនងគ្នា សម្រាប់ការប្រកួតទាំង ២ កម្មវិធីនេះ។
ការប្រកួតវគ្គផ្តាច់ព្រ័ត្រនៃក្របខ័ណ្ឌ Champions League ត្រូវបានគ្រោងធ្វើនៅទីក្រុងអ៊ីស្តង់ប៊ុល ប្រទេសតួកគី ហើយ Europa League នៅក្រុង Gdansk ប្រទេសប៉ូឡូញ តែកាលពីខែមុន UEFA បានប្រាប់ថា មានជម្រើសជាច្រើន កំពុងត្រូវបានយកមកពិចារណា ដើម្បីបញ្ចប់ទាំងស្រុងសម្រាប់ការប្រកួតប្រជែងទាំង២ ក្របខ័ណ្ឌនេះ។
ជម្រើសទាំងនេះ អាចរួមបញ្ចូលទាំងការប្រកួតជុំនៅសល់របស់ក្របខ័ណ្ឌនីមួយៗ នៅក្នុងទឹកដីតែមួយ ហើយកាត់បន្ថយការប្រកួតវគ្គ ៨ក្រុមចុងក្រោយ និងវគ្គពាក់កណ្តាលផ្តាច់ព្រ័ត្រពី ២ ជើងមកតែ ១ ជើង។ ការប្រកួតជើងទី ២ នៃក្របខ័ណ្ឌ Champions League ក្នុងវគ្គ ១៦ ក្រុមចុងក្រោយ នៅតែត្រូវការការប្រកួត ខណៈក្រុម Atletico Madrid, Paris St Germain, Atalanta និង RB Leipzig បានកក់កៅអីរបស់ពួកគេរួចហើយ នៅវគ្គ ៨ ក្រុមចុងក្រោយ។
ក្នុងក្របខ័ណ្ឌ Europa League ការប្រកួតទាំងជើងទី ២ វគ្គ ១៦ ក្រុមចុងក្រោយ នៅតែត្រូវរៀបចំឡើង។ អភិបាលក្រុងម៉ាឌ្រីដ បាននិយាយកាលពីថ្ងៃអង្គារថា រាជធានីអេស្ប៉ាញ កំពុងពិភាក្សាអំពីការធ្វើជាម្ចាស់ផ្ទះនៃការប្រកួតវគ្គផ្តាច់ព្រ័ត្រក្របខ័ណ្ឌ Champions League ប្រសិនបើត្រូវបានផ្លាស់ប្តូរពីទីអ៊ីស្តង់ប៊ុល៕ AFP/VN