ក្រុងប៉ារីស: សហព័ន្ធបាល់ទាត់អឺរ៉ុប (UEFA) កាលពីថ្ងៃពុធ បានប្រកាសឲ្យដឹងថា មានគម្រោងបន្តរក្សាបែបផែនការប្រកួតទូទាំងទ្វីបដដែល សម្រាប់ព្រឹត្តិការណ៍ Euro 2020 ដែលត្រូវបានពន្យារពេល ក្រោយប្រធានរបស់ស្ថាប័នលោក Aleksander Ceferin ថ្មីៗនេះ បានព្រលយពាក្យថា ចំនួនទីក្រុងដែលត្រូវជ្រើសរើសធ្វើម្ចាស់ផ្ទះអាចនឹងត្រូវកាត់បន្ថយខ្លះ។
ក្នុងសេចក្ដីប្រកាសមួយរបស់ខ្លួន UEFA បានឲ្យដឹងថា៖ «ទីក្រុងម្ចាស់ផ្ទះ ដែលបានកំណត់ពីខាងដើមចំនួន ១២ ត្រូវបានអះអាងថាជាកន្លែងសម្រាប់រៀបចំការប្រកួតចុងក្រោយ នារដូវក្ដៅនៃឆ្នាំ ២០២១»។
ព្រឹត្តិការណ៍ Euro 2020 ដែលជាការប្រកួតដណ្ដើមពានរង្វាន់សម្រាប់ក្រុមជម្រើសជាតិនៅតំបន់អឺរ៉ុប នៅតែមានឈ្មោះដូចដើមដដែល បើទោះជាត្រូវបានលើកពេលទៅធ្វើនៅឆ្នាំ២០២១ក៏ដោយ ហើយពេលនេះ កំពុងត្រូវបានយកចិត្តទុកយ៉ាងពេញទំហឹង ស្របពេលការពន្យារពេលការប្រកួតរយៈពេល ១២ខែ គឺជាការម្រេចដ៏ធំដំបូងរបស់ UEFA ដោសារតែវិបត្តិនៃវីរុសកូរ៉ូណា កើនឡើងជាលំដាប់។
ទាក់ទងនឹងការសម្រេចនេះ UEFA បានប្រាប់ថា៖ « UEFA បានធ្វើការជ្រើសរើសដ៏សែនពិបាកមួយ ក្នុងការសម្រេចពន្យារការប្រកួតប្រជែងព្រឹត្តិការណ៍ Euro 2020។ តែការធ្វើបែបនេះ យើងបានបង្កើតនូវចន្លោះទំនេរ ដែលអនុញ្ញាតិឲ្យការប្រកួតប្រជែងរបស់ក្លិបអាជីព ក្នុងប្រទេសទាំងអស់ទូទាំងតំបន់ ចាប់ផ្ដើមឡើងវិញ ខណៈដែលអាចធ្វើទៅបាន និងលេងបញ្ចប់រដូវកាលរបស់ពួកគេ»។
UEFA បានបោះចោលទម្លាប់ដែលផ្ដល់សិទ្ធិឲ្យប្រទេស ១ ឬ ២ ធ្វើជាម្ចាស់ផ្ទះរៀបចំកម្មវិធីប្រកួត ជាមួយនឹងការជ្រើសរើសក្រុងរហូតទៅ ១២ ជំនួសវិញ ចាប់ពីក្រុងដែលមានចម្ងាយឆ្ងាយពីគ្នា ដូចក្រុងបាគូ និងឌូប្ល៊ីន។ បែបផែនដ៏ឆ្គាំឆ្គងនេះ បានធ្វើឲ្យស្ថាប័នគ្រប់គ្រងបាល់វិស័យបាល់ទាត់អឺរ៉ុបមួយនេះ ពង្រីកកិត្យានុភាព ដោយការរៀបចំការប្រកួតពេញទាំងទ្វីប។
តែយ៉ាងណាក្នុងកិច្ចសម្ភាសន៍មួយជាមួយទូរទស្សន៍ beIN Sports លោក Ceferin ថ្មីៗនេះ បានបញ្ជាក់ពីការមានបញ្ហាខ្លះជាមួយក្រុងដែលមិនបា្រប់ឈ្មោះចំនួន ៣ ដោយលោកប្រធានរូបនេះថ្លែងថា៖ «ជាគោលការណ៍ យើងពិតជាត្រូវរៀបចំក្នុងក្រុងចំនួន ១២។ តែបើមិនដូច្នោះទេ យើងត្រៀមធ្វើឡើងតែនៅទីក្រុង ១០, ៨ ឬក៏ ៩ ប៉ុណ្ណោះ»៕ AFP/VN