ក្រុងឡុងដ៍៖ ក្រុម Manchester United (United) និង Liverpool កំពុងពិភាក្សាជាមួយក្រុមកំពូលដទៃៗទៀត នៅតំបន់អឺរ៉ុប រឿងចូលរួមការប្រកួតកម្មវិធីថ្មីគាំទ្រដោយសហព័ន្ធបាល់ទាត់ពិភពលោក (FIFA)។ នេះបើតាមសេចក្ដីរាយការណ៍របស់ប្រព័ន្ធផ្សព្វផ្សាយ Sky News កាលពីថ្ងៃអង្គារ។
ក្រុម United បានបដិសេធមិនអធិប្បាយចំពោះសេចក្ដីរាយការណ៍នេះ ហើយក្រុម Liverpool មិនបានឆ្លើយតបភ្លាមៗចំពោះសំណើ ដែលសុំឱ្យធ្វើការពន្យល់នោះឡើយ។
បើយោងតាមប្រភពក្នុងរង្វង់បាល់ទាត់ ដែលមិនបញ្ចេញឈ្មោះ Sky News បានឱ្យដឹងថា ក្រុមជាង ១២ មកពីលីគកំពូលៗទាំង ៥ របស់អឺរ៉ុប រួមមាន អង់គ្លេស បារាំង អាល្លឺម៉ង់ អ៊ីតាលី និងអេស្ប៉ាញ កំពុងពិភាក្សាគ្នា ដើម្បីក្លាយជាសមាជិកបង្កើតការប្រកួតប្រជែងថ្មី ដែលឱ្យឈ្មោះថា «European Premier League» ដោយកាលបរិច្ឆេទកំណត់បណ្ដោះអាសន្ន គឺក្នុងឆ្នាំ ២០២២។
សេចក្ដីរាយការណ៍នោះ បន្តថា ហិរញ្ញធិការី (អ្នកជំនាញខាងហិរញ្ញវត្ថុ) កំពុងស្វែងរកកញ្ចប់ទឹកប្រាក់ឧបត្ថម្ភ ៦ ពាន់លានដុល្លារ ដើម្បីចាប់ផ្ដើមដំណើរការកម្មវិធីប្រកួតប្រជែងថ្មីនេះ។
ប្រព័ន្ធផ្សព្វផ្សាយដដែលបានឱ្យដឹងទៀតថា FIFA កំពុងសិក្សាលើរូបមន្តថ្មីមួយ ដែលរំពឹងថា នឹងមានក្រុមចំនួន ១៨ ធ្វើការប្រកួតគ្នា ក្នុងរដូវកាលធម្មតារបស់អឺរ៉ុប មុននឹងឡើងដល់វគ្គប្រកួតកាត់ក្ដី ឬចាញ់ធ្លាក់ តែទាំង FIFA និងស្ថាប័នគ្រប់គ្រងបាល់ទាត់អឺរ៉ុប (UEFA) មិនធ្វើសេចក្ដីអធិប្បាយអ្វីទាំងអស់ចំពោះប្រធានបទនេះ។
អ្នកនាំពាក្យ ១ រូបរបស់ FIFA បានប្រាប់ប្រព័ន្ធផ្សព្វផ្សាយតាមអ៊ីមែលថា៖ «FIFA គ្មានបំណងធ្វើការពន្យល់ និងពាក់ព័ន្ធរាល់ពាក្យចចាមអារ៉ាមចំពោះប្រធានបទ ដែលយូរៗលេចឮម្ដងនេះ ព្រោះគម្រោងផ្លូវការ និងក្របខ័ណ្ឌគតិយុត្តិផ្សេងៗ ដែលមានកំពុងដំណើរការយ៉ាងល្អ ទាំងកម្រិតជាតិ អឺរ៉ុប និងពិភពលោក»។
UEFA ដែលរៀបចំការប្រកួត Champions League មិនបានឆ្លើយតបភ្លាមៗនោះឡើយ តែប្រធានសហព័ន្ធ លោក Aleksander Ceferin បានសម្ដែងការជំទាស់មកជាយូរហើយចំពោះគំនិត ដែលចង់បង្កើតក្របខ័ណ្ឌមិនពាក់ព័ន្ធនឹងអឺរ៉ុប៕ AFP/VN