ក្រុងញូវយ៉ក: ការប្រកួតវាយកូនបាល់ (តេន្នីស) កម្មវិធី US Open នៅសហរដ្ឋអាមេរិកនឹងដំណើរការទៅដូចការគ្រោងទុក ដោយរង់ចាំតែការអនុម័តរបស់រដ្ឋាភិបាលជាផ្លូវការប៉ុណ្ណោះ។ នេះបើតាមសេក្ដីរាយការណ៍របស់កាសែត New York Times កាលពីថ្ងៃចន្ទ។
កាសែតខាងលើបានស្រង់សម្ដីរបស់មន្ត្រីកីឡាតេន្នីស ៤ រូប ដែលបាននិយាយក្នុងលក្ខខណ្ឌមិនបញ្ចេញឈ្មោះដោយប្រាប់ថា ព្រឹត្តិការណ៍ដណ្ដើមពាន Grand Slam នេះ នឹងកើតមានជាធម្មតា តាមគម្រោង នៅចុងខែសីហា និងដើមខែកញ្ញា។ ស្ថានភាពជុំវិញការប្រកួត ត្រូវស្ថិតក្នុងភាពមិនច្បាស់លាស់អស់ជាច្រើនសប្ដាហ៍ ដោយសារក្រុងញូវយ៉ក កំពុងប្រយុទ្ធប្រឆាំងជាមួយវីរុសកូរ៉ណា ខណៈកីឡាករឆ្នើមៗមួយចំនួន បានសម្ដែងភាពមិនប្រាកដប្រជាចំពោះការលេងក្នុងកម្មវិធីនេះ។
សេចក្ដីរាយការណ៍របស់កាសែតដដែល បានឲ្យដឹងថា ព្រឹត្តិការណ៍នេះ នឹងត្រូវប្រារព្ធឡើង ដោយឥតមានអ្នកគាំទ្រ នៅឯទីលាន នាមជ្ឈមណ្ឌល Flushing Meadows ពីថ្ងៃទី ៣១ ខែ សីហា ដល់ថ្ងៃទី ១៣ ខែ កញ្ញា ក្រោយទទួលបានការគាំទ្រពីខាងសហព័ន្ធតេន្នីសអាជីព (ATP) និងសហព័ន្ធតេន្នីសនារី (WTA) ហើយជាមួយគ្នានេះ សហព័ន្ធតេន្នីសអាមេរិក (USTA) អាចនឹងប្រកាសពីការសម្រេច នៅចុងសប្ដាហ៍នេះ។
ក្រោមគោលការណ៍សុវត្ថិភាពដែលដាក់ចេញកីឡាករក្នុងកម្មវិធី US Open ទាំងអស់ នឹងត្រូវដាក់ឲ្យនៅឯសណ្ឋាគារមួយ ក្រៅតំបន់ Manhattan ហើយនឹងអនុញ្ញាតិឲ្យយកសមាជិកតែម្នាក់គត់សម្រាប់ជួយខ្លួនចូលទៅក្នុងព្រឹត្តិការណ៍នេះ។ ការប្រកួតវគ្គជម្រុះប្រភេទទោល នឹងត្រូវមានតិចជាងមុន ខណៈប្រភេទគូ នឹងត្រូវកាត់បន្ថយពី ៦៤ មកត្រឹម ២៤ គូ។
ប្រធានទំនាក់ទំនងកីឡាកររបស់ USTA លោក Eric Butorac បានប្រាប់កីឡាការរបស់ ATP និង WTA អំឡុងការជួបគ្នាតាមទូរស័ព្ទ កាលពីសប្ដាហ៍មុនថា៖ «នេះជាពិភពលោក ដែលយើងរស់នៅ។ យើងជឿថា នេះជាផែនការដ៏ល្អមួយ និងជឿថា វាល្អសម្រាប់សិស័យកីឡានេះ។ វាប្រសើរចំពោះសេដ្ឋកិច្ចកីឡាតេន្នីស ដោយបង្កើតការងារសម្រាប់អ្នកទាំងអស់គ្នា គ្រូបង្វឹក អ្នកអត្ថាធិប្បាយ ព្រមទាំងសម្រាប់មនុស្សជាច្រើនទៀត»៕ AFP/VN