.jpg)
លោក Marcelino ដែលត្រូវបានបណ្ដេញជាគ្រូបង្វឹកនៅក្លិប Valencia កាលពីថ្ងៃពុធ។ រូបថត AFP
ក្រុងម៉ា្រឌីដ៖ ក្លិប Valencia បានប្រកាសបណ្ដេញគ្រូបង្វឹកលោក Marcelino ពីថ្ងៃពុធ គឺមិនដល់ ១ សប្ដាហ៍មុនពេលពួកគេនឹងបើកការប្រកួតក្របខ័ណ្ឌ Champions League ប្រកួតជាមួយក្រុម Chelsea។
ក្រោយពីបណ្ដេញគ្រូបង្វឹកដោយជោគជ័យហើយ ក្រុម Valencia បានតែងតាំងអតីតជំនួយការគ្រូបង្វឹកនៅក្លិប Real Madrid គឺលោក Albert Celades ឲ្យធ្វើជាគ្រូបង្វឹកថ្មី។
គ្រូបង្វឹកអាយុ ៥៤ ឆ្នាំ ដែលត្រូវបានបណ្ដេញចេញនេះបានចូលរួមនឹងក្លិបនេះនៅឆ្នាំ ២០១៧ ដែលពេលនោះក្លិប Valencia បានប្រឹងប្រែងឡើងឲ្យផុតពីចំណាត់ថ្នាក់ទី ១២ នៅក្នុងក្របខ័ណ្ឌអេស្ប៉ាញ La Liga។
ប៉ុន្តែក្នុងរយៈពេល ២ រដូវកាលពេញរបស់គាត់ក្នុងគ្រាលំបាកនោះ គ្រូបង្វឹករូបនេះបានដឹកនាំក្លិប Valencia ឡើងដល់ចំណុចទី ៤ និងមានឱកាសបានលេងនៅក្របខ័ណ្ឌ Champions League ហើយក្នុងរដូវកាលចុងក្រោយរបស់គាត់ គឺគាត់បានជួយឲ្យក្លិបនេះលើកពាន Copa Del Rey ដែលជាពានរង្វាន់សំខាន់លើកដំបូងរបស់ក្លិបនេះក្នុងរយៈពេល ១១ ឆ្នាំ។
ក្លិប Valencia បាននិយាយថា៖ «ក្លិប Valencia CF កាលពីថ្ងៃពុធបានប្រាប់លោក Marcelino Garcia Toral ថា គាត់ត្រូវបានបណ្ដេញចេញជាគ្រូបង្វឹកនៃក្រុមដំបូងហើយ»។
ក្លិបដដែលនេះបានបន្ថែមថា៖ «ក្លិបនេះសូមថ្លែងអំណរគុណចំពោះស្នាដៃ និងការលះបង់ពេលវេលាដ៏មានតម្លៃរបស់អ្នកជាមួយក្លិបនេះ ហើយសូមជូនពរឲ្យអ្នកទទួលបានជោគជ័យដ៏អស្ចារ្យបំផុតក្នុងពេលអនាគត»។
លោក Marcelino គឺជាគ្រូបង្វឹកលើកទី ១ ដែលត្រូវបានបណ្ដេញចេញពីក្របខ័ណ្ឌកំពូលអេស្ប៉ាញនៅរដូវកាលនេះ។
ក្រុម Valencia បានចាប់ផ្ដើមយុទ្ធនាការប្រកួតក្របខ័ណ្ឌ La Liga របស់ខ្លួនយ៉ាងយឺតយ៉ាវដោយសារពួកគេបានប្រកួតស្មើគ្នាជាមួយក្រុម Real Sociedad ក្នុងទឹកដីខ្លួនឯង និងចាញ់ក្រុម Celta Vigo ប៉ុន្តែបានល្អប្រសើរវិញ ក្រោយពីបានឈ្នះក្រុម Real Mallorca ២-០ មុនពេលសម្រាកសម្រាប់ការប្រកួតអន្តរជាតិ។
គ្រូបង្វឹកថ្មីលោក Celades អាយុ ៤៣ ឆ្នាំបានចុះកុងត្រារហូតដល់ចុងខែមិថុនា ឆ្នាំ ២០២១ ហើយក្លិប Valencia បានបញ្ជាក់ថា គ្រូបង្វឹករូបនេះបានចាប់ផ្ដើមធ្វើការបង្វឹកកីឡាករជាលើកដំបូងរបស់គាត់កាលពីថ្ងៃពុធ។
ក្រុមថ្មីរបស់លោក Celades នឹងធ្វើដំណើរទៅកីឡដ្ឋាន Stamford Bridge របស់ក្លិប Chelsea នៅថ្ងៃអង្គារដើម្បីប្រកួតបើកឆាកក្នុងពូល H នៃក្របខ័ណ្ឌ Champions League ក្រោយពីប្រឈមនឹងម្ចាស់ជើងឯក La Liga នៅថ្ងៃសៅរ៍ហើយ៕ AFP/SN
