.jpg)
(ពីឆ្វេងទៅស្តាំ) Max Verstappen របស់ Red Bull កីឡាករ Lewis Hamilton របស់ Mercedes និងកីឡាករ Kimi Raikkonnen។ AFP
ក្រុងសៅប៉ូឡូ: កីឡាករប្រណាំងរថយន្តសញ្ជាតិហូឡង់ Max Verstappen ត្រូវបានចោទប្រកាន់ព្យាយាមដាល់ទៅលើ គូប្រជែងសញ្ជាតិបារាំងរបស់គេគឺកីឡាករ Esteban Ocon ក្រោយពីការប៉ះទង្គិចគ្នាដ៏ចម្រូងចម្រាស ក្នុងព្រឹត្តិការណ៍ Brazilian Grand Prix កាលពីថ្ងៃអាទិត្យ ខណៈដែលម្ចាស់ជើងឯកពិភពលោក ៥ សម័យកាល Lewis Hamilton បានឈ្នះការប្រណាំងនេះ។
តារាឆ្នើម Verstappen របស់ក្រុម Red Bull ត្រូវបានគេឃើញនៅលើកញ្ចក់ទូរទស្សន៍ថា បានរុញទៅលើកីឡាករ Ocon របស់ក្រុម Force India ៣ លើក និងត្រូវបានចោទប្រកាន់ថា បានគំរាមវាយទៅលើ Ocon ក្រោយពីកីឡាករទាំង ២ បានប៉ះទង្គិចគ្នានៅលើទីលាន។ ការប៉ះទង្គិចគ្នាក្នុងជុំទី ៤៤ ក្នុងចំណោមការប្រណាំងទាំង ៧២ ជុំ នៅលើទីលានផ្លូវខ្វាត់ខ្វែង Interlagos បានធ្វើឲ្យ Verstappen ចាញ់ក្នុងការប្រណាំង ហើយរូបគេត្រូវតែទទួលយកការបញ្ចប់ត្រឹមចំណាត់ថ្នាក់លេខ ២។
កីឡាករសញ្ជាតិហូឡង់វ័យ ២១ ឆ្នាំរូបនេះ បានបញ្ជាក់ កាលពីមុនថា រូបគេមិនបានជួបកីឡាករ Ocon នៅកន្លែងចតរថយន្តឡើយ ក្រោយពីការប្រណាំងនេះ ប៉ុន្តែមិនបានព្យាយាមគេចពីរូបគេឡើយ ក្នុងបន្ទប់ថ្លឹងទម្ងន់របស់អ្នកបើកបរ ដែលជាកន្លែង Verstappen បានដើរសំដៅទៅកាន់ Ocon។ Ocon បានឲ្យដឹងថា៖ «យើងបានស្ថិតក្នុងបន្ទប់ថ្លឹងទម្ងន់។ រូបគេចង់ដាល់ខ្ញុំ។ គេបានរុញខ្ញុំ ហើយរូបគេចង់បង្កអំពើហិង្សា។ វាមិនមែនជាទង្វើរបស់កីឡាករអាជីពឡើយ»។
Ocon បានបញ្ជាក់ថា ការប្រជែងរបស់គេជាមួយនឹង Verstappen កើតឡើងជាយូរមកហើយ និងបាននិយាយថា កីឡាកររូបនេះ «នៅតែរក្សាអាកប្បកិរិយាដដែល»។
Ocon បានប្រាប់ទូរទស្សន៍ Sky Sports ថា៖ «ខ្ញុំបានដេញតាមពីក្រោយ Max ២ ជុំ។ នៅជុំទី ១ ខ្ញុំមានល្បឿនលឿនជាង ហើយនៅជុំទី ២ ខ្ញុំកាន់តែមានល្បឿនលឿនជាងមុន។ លក្ខខណ្ឌច្បាប់បង្ហាញថា អ្នកត្រូវបានអនុញ្ញាតឲ្យធ្វើការប្រជែងបាន។ ខ្ញុំស៊ាំទៅនឹងការប្រជែងជាមួយនឹង Max។ រូបគេតែងតែស្ថិតក្នុងឥរិយាបថដូចគ្នា។ វាកើតឡើង ៣ ទៅ ៤ ឆ្នាំមកហើយ»។
Ocon ត្រូវបានដាក់ពិន័យឲ្យឈប់រយៈពេល ១០ វិនាទី សម្រាប់ការបង្កឲ្យមានការប៉ះទង្គិចនេះ។ ម្ចាស់ជើងឯកពិភពលោក ៥ សម័យកាល Hamilton បានបើកបរឲ្យក្រុម Mercedes របស់គេឈ្នះការប្រណាំង Brazilian Grand Prix ខណៈដែលជ័យជម្នះនេះ បានជួយឲ្យក្រុមរបស់គេឈ្នះពានរង្វាន់ពិភពលោកផ្នែកផលិត សម្រាប់រដូវកាលទី ៥ ជាប់ៗគ្នា។
កីឡាករសញ្ជាតិអង់គ្លេសវ័យ ៣៣ ឆ្នាំរូបនេះ បានដណ្តើមយកប្រៀបទៅលើការប៉ះទង្គិចគ្នា ដែលនាំឲ្យ Verstappen បាត់បង់ការនាំមុខ នៅជិតបញ្ចប់ការប្រកួត ដើម្បីបង្ខំឲ្យកីឡាករនៃក្រុម Red Bull បញ្ចប់ក្នុងចំណាត់ថ្នាក់លេខ ២។
Kimi Raikkonen បានបញ្ចប់ក្នុងចំណាត់ថ្នាក់លេខ ៣ ក្នុងការប្រណាំងជាលើកទី ១៥០ របស់គេសម្រាប់ក្រុម Ferrari ដោយនាំមុខលើកីឡាករ Daniel Ricciardo របស់ក្រុម Red Bull កីឡាករ Valtteri Bottas របស់ Mercedes និង Sebastian Vettel របស់ក្រុម Ferrari៕
