ក្រុងប៉ារីស: លោក Andre Villas-Boas បាននិយាយកាលពីថ្ងៃពុធថា លោកនឹងចាកចេញពីតួនាទីជាគ្រូបង្វឹករបស់ក្រុម Olympique de Marseille (Marseille) ប្រសិនបើត្រូវបានស្នើដោយគណៈគ្រប់គ្រងរបស់ក្លិប បន្ទាប់ពីក្រុមរបស់លោកចាញ់ក្រុម Lens ១-០ នៅផ្ទះខ្លួនឯង កាលពីថ្ងៃពុធ អំឡុងការប្រកួតក្នុងក្របខ័ណ្ឌ Ligue 1 របស់បារាំង។
ក្រុមម្ចាស់ផ្ទះ Marseille ដែលមានលទ្ធផលស្មើដោយគ្មានគ្រាប់បាល់ជាមួយក្រុម Dijon បន្ទាប់ពីចាញ់ក្រុម Paris Saint-Germain នៅ Champions Trophy ហើយក្រោយមក ភ្លាត់ជើងជាមួយក្រុម Nimes នៅលីគទៀត ឥឡូវនេះ ចាប់ផ្ដើមមានបញ្ហាជាថ្មីម្ដងទៀត ពេល ១ គ្រាប់ ដែលទម្លុះសំណាញ់ទីដោយ Simon Banza នៅវគ្គទី២ ជាគ្រាប់ជ័យជម្នះសម្រាប់ក្រុមភ្ញៀវតែម្ដង។
ក្រុម Marseille នៅតែឈរនៅចំណាត់ថ្នាក់តី ៦ ក្នុងតារាង Ligue 1 ហើយបើទោះនៅសល់ ១ ប្រកួតក្នុងដៃក៏ពិតមែន តែត្រូវតាមដល់ទៅ ១០ ពិន្ទុ ពីក្រោយក្រុមលេខ ១ PSG និងក្រុមលេខ ២ Lille ដែលមាន ៤២ ពិន្ទុដូចគ្នា។ គិតទាំងការប្រកួតយប់មិញផង ឃើញថា ក្រុម Marseille ឈ្នះតែ ១ លើកប៉ុណ្ណោះ ក្នុងចំណោម ៨ ប្រកួតចុងក្រោយនៅគ្រប់កម្មវិធីទាំងអស់។
«តួនាទីរបស់ខ្ញុំ គឺច្បាស់ណាស់ស្ថិតនៅលើដៃរបស់អ្នកគ្រប់គ្រង។ ខ្ញុំមិនមែននៅទីនេះ ដើម្បីធ្វើជាឧបសគ្គអ្វីឡើយ»។ នេះជាប្រសាសន៍របស់លោក Villas-Boas អតីតគ្រូបង្វឹករបស់ក្រុមយក្ស ២ នៅអង់គ្លេស គឺ Chelsea និង Tottenham Hotspur។
លោក Villas-Boas ដែលត្រូវដឹកនាំក្រុមទៅផ្ទះរបស់ក្រុម Monaco ថ្ងៃសៅរ៍នេះបានបន្ថែមថា៖ «យើងត្រូវតែធ្វើឱ្យប្រសើរជាងនេះ ពោលគឺរកវិធីដោះស្រាយ កុំឱ្យរបូតគ្រាប់ពីការលើកបាល់ចូលក្នុងតំបន់គ្រោះថ្នាក់ពីស្លាបស្ដាំ និងឆ្វេង។ ខ្ញុំត្រូវតែជឿជាក់លើខ្លួនខ្ញុំផ្ទាល់ ព្រមទាំងកូនក្រុមរបស់ខ្ញុំ ដើម្បីកែប្រែទម្រង់មិនល្អ ដែលមានហូរហែនេះ។ ក្រុម Monaco កំពុងលេងល្អឡើងៗ។ ខ្ញុំកំពុងផ្ដោតលើការរកដំណោះស្រាយ»៕ AFP/VN