ក្រុងម៉ុងរ៉េអាល់៖ ទីភ្នាក់ងារប្រឆាំងសារធាតុលើកកម្លាំងពិភពលោក (WADA) បានស្នើសុំឲ្យគេដាក់បំរាមលើប្រទេស រុស្ស៊ី កុំឲ្យចូលរួមព្រឹត្តិការណ៍គ្រប់ប្រភេទទាំងអស់រយៈពេល ៤ ឆ្នាំ ក្រោយពីចោទរដ្ឋាភិបាលក្រុងម៉ូស្គូថា បានក្លែងទិន្នន័យមន្ទីរពិសោធន៍ដែលប្រគល់ទៅឲ្យក្រុមអ្នកស៊ើបអង្កេត។ នេះបើយោងតាមទីភ្នាក់ងារនេះ បានឲ្យដឹងកាលពីថ្ងៃចន្ទ។
របាយការណ៍មួយនិយាយថា គណៈកម្មាធិការត្រួតពិនិត្យការអនុវត្តច្បាប់ (CRC) របស់ទីភ្នាក់ងារ WADA បានអំពាវនាវឱ្យមានការដាក់ទណ្ឌកម្មដែលនឹងត្រូវហាមឃាត់រុស្ស៊ីមិនឲ្យចូលរួមប្រកួតអូឡាំពិកក្រុងតូក្យូនៅឆ្នាំក្រោយ ដែលនឹងត្រូវអនុម័តនៅក្នុងកិច្ចប្រជុំមួយនៅទីក្រុងប៉ារីស ប្រទេស បារាំង នៅថ្ងៃទី ៩ ខែធ្នូ។
គណៈកម្មាធិការ WADA ក៏បានណែនាំឱ្យគេហាមឃាត់ប្រទេស រុស្ស៊ី មិនឱ្យរៀបចំ ឬដេញថ្លៃរៀបចំព្រឹត្តិការណ៍កីឡាអន្តរជាតិសំខាន់ៗសម្រាប់រយៈពេល ៤ ឆ្នាំ ដែលអាចប៉ះពាល់ដល់ឋានៈរបស់ទីក្រុង Saint Petersburg ក្នុងការទទួលរៀបចំព្រឹត្តិការណ៍ Euro ២០២០។
ប្រសិនបើការដាក់ទណ្ឌកម្មនេះត្រូវបានអនុម័តដោយគណៈកម្មាធិការប្រតិបត្តិរបស់ WADA មែននោះ ប្រទេស រុស្ស៊ី អាចប្តឹងជំទាស់នឹងការសម្រេចចិត្តនេះទៅតុលាការអាជ្ញាកណ្តាលសម្រាប់កីឡា។
សំណើសុំដាក់ទណ្ឌកម្មនេះ បានកើតឡើងបន្ទាប់ពីអ្វីដែលក្រុមអ្នកស៊ើបអង្កេត WADA បានចាត់ទុកថាជាករណី «ធ្ងន់ធ្ងរបំផុតមួយ» នៃការមិនគោរពច្បាប់ «ដោយមានលក្ខណៈធ្ងន់ធ្ងរបំផុត»។
ការហាមឃាត់តាមការណែនាំរយៈពេល ៤ ឆ្នាំនេះ បានធ្វើឡើងបន្ទាប់ពីក្រុមអ្នកស៊ើបអង្កេត WADA បានពិនិត្យទិន្នន័យពីមន្ទីរពិសោធន៍សារធាតុលើកកម្លាំងក្រុងម៉ូស្គូ ប្រទេស រុស្ស៊ី ដែលត្រូវបានប្រគល់ឱ្យ WADA កាលពីខែមករា។
ការបង្ហាញទិន្នន័យពេញលេញពីមន្ទីរពិសោធន៍ក្រុងម៉ូស្គូនេះ គឺជាលក្ខខណ្ឌសំខាន់មួយនៃការធ្វើឱ្យមានភាពចម្រូងចម្រាសឡើងវិញរវាងរុស្ស៊ី និងទីភ្នាក់ងារ WADA នៅខែកញ្ញា ឆ្នាំ ២០១៨។
ទីភ្នាក់ងារប្រឆាំងសារធាតុលើកកម្លាំងរបស់រុស្ស៊ី (RUSADA) ត្រូវបានផ្អាកដំណើរការអស់រយៈពេលជិត ៣ ឆ្នាំមកហើយ ពាក់ព័ន្ធនឹងការបង្ហាញកម្មវិធីប្រើប្រាស់សារធាតុលើកកម្លាំងដែលគាំទ្រដោយរដ្ឋដ៏ធំមួយនេះ។
ទោះបីយ៉ាងណា ទីភ្នាក់ងារ WADA បាននិយាយនៅក្នុងរបាយការណ៍របស់ខ្លួនកាលពី ថ្ងៃចន្ទថា ទិន្នន័យដែលប្រគល់ឲ្យនេះបានមានបញ្ហាជាច្រើនដោយចាត់ទុកទិន្នន័យនោះថា គ្មានលក្ខណៈពេញលេញ និងខុសពីច្បាប់ដើម។
របាយការណ៍នេះបាននិយាយថា ការរកឃើញលទ្ធផលមិនត្រឹមត្រូវជាច្រើនត្រូវបានលុបចោល ខណៈទិន្នន័យដើម និងឯកសារ PDF ត្រូវបានលុប។
ខណៈលទ្ធផលដែលត្រូវបានលុបចោលបានកើតឡើងនៅឆ្នាំ ២០១៦ ឬនៅឆ្នាំ ២០១៧ ជាពេលដែលរឿងអាស្រូវនៃសារធាតុលើកកម្លាំងរបស់រុស្ស៊ីបានផ្ទុះឡើងដំបូងនោះ ព័ត៌មានផ្សេងទៀតត្រូវបានលុបនៅខែធ្នូ ឆ្នាំ ២០១៨ ឬខែមករានៃឆ្នាំនេះភ្លាមៗ មុនពេលទិន្នន័យនេះត្រូវបានបញ្ជូនទៅឲ្យទីភ្នាក់ងារ WADA៕ AFP/SN