ភ្នំពេញ: ក្រុមហ៊ុន Khmer Beverages ដែលមានផលិតផលភេសជ្ជៈ Wurkz បានរៀបចំព្រឹត្តិការណ៍កីឡាប្រដាល់លក្ខណៈដណ្តើមខ្សែក្រវាត់អន្តរជាតិទម្ងន់ ៦៣,៥ គីឡូក្រាម ខណៈកីឡាករល្បីៗរបស់ព្រះរាជាណាចក្រកម្ពុជាចំនួន ៤ នាក់ និងកីឡាករមកពីប្រទេសថៃ ៤ នាក់ នឹងត្រូវដាក់ឲ្យប្រកួតជម្រុះឆ្ពោះទៅដណ្តើមខ្សែក្រវាត់ និងទឹកប្រាក់ចំនួន ៥០០០ដុ ល្លារអាមេរិក នៅសង្វៀនអាស៊ីអាគ្នេយ៍។ នេះតាមការប្រកាសជាផ្លូវការក្នុងសន្និសីទសារព័ត៌មានកាលពីព្រឹកថ្ងៃព្រហស្បតិ៍ ទី ៣១ ខែឧសភា ឆ្នាំ ២០១៨ នៅឯរោងចក្រស្រាបៀរកម្ពុជា ខណ្ឌដង្កោ រាជធានីភ្នំពេញ។
លោកអ៊ឹម សុធារិទ្ធ នាយកទំនាក់ទំនងនៃក្រុមហ៊ុនជីបម៉ុងគ្រុប មានប្រសាសន៍ថា៖ «នេះជាលើកដំបូងដែលក្រុមហ៊ុន Khmer Beverages ដែលមានផលិតផលភេសជ្ជៈ Wurkz បានរៀបចំព្រឹត្តិការណ៍កីឡាប្រដាល់លក្ខណៈដណ្តើមខ្សែក្រវាត់អន្តរជាតិ ប៉ុន្តែកន្លងមក ក្រុមហ៊ុនបានជួយឧបត្ថម្ភកម្មវិធីប្រដាល់ដណ្តើមខ្សែក្រវាត់នេះចំនួន ៤ ឆ្នាំមកហើយ រួមមានការប្រកួតដណ្តើមខ្សែក្រវាត់ស្រាបៀរកម្ពុជា និង Baley Black ដែលជាផលិតផលរបស់ក្រុមហ៊ុនតែមួយ»។
លោកបានបន្តថា៖ «ក្រុមហ៊ុនមានទស្សនៈទូលំទូលាយក្នុងការជួយឧបត្ថម្ភគាំទ្រក្នុងសកម្មភាពវិស័យកីឡាជាច្រើន ពិសេសកីឡាប្រដាល់នេះតែម្តង»។
លោក រាជ សុផែន ប្រធានបច្ចេកទេសប្រចាំសង្វៀនប្រដាល់អាស៊ីអាគ្នេយ៍បានប្រកាស ឲ្យដឹងថា៖ «កីឡាករកម្ពជាមាន ៤ រូប ហើយកីឡាករថៃមាន ៤ រូប ដោយប្រកួតជម្រុះវិលជុំសន្សំពិន្ទុ ដោយកីឡាករម្នាក់ៗជួប ប្រកួត ៤ លើក ខណៈខ្មែរមិនប៉ះជាមួយខ្មែរ ឬកីឡាករថៃមិនប៉ះជាមួយថៃឡើយ ហើយសរុប ពិន្ទុយកកីឡាករថៃម្នាក់ និងកីឡាករខ្មែរម្នាក់ដែលមានពិន្ទុខ្ពស់ជាងគេ ទៅវគ្គផ្តាច់ព្រ័ត្រដណ្តើមយកខ្សែក្រវាត់ និងទឹកប្រាក់ចំនួន ៥០០០ ដុល្លារតែម្តង។
លោក ញាន សុធី គណៈកម្មការផ្គូផ្គង បានឲ្យដឹងថា៖ «សមាសភាពអ្នកប្រដាល់កម្ពុជាមាន ៤ រូប។ ទី១ កីឡាករទេស ជីវ៉ា មកពីក្លិបកងពលលេខ ៧០ មានបទពិសោធប្រកួតបាន ៦៨ លើក។ ទី២ កីឡាករវ៉េង សុភ័ក្ត្រ មកពីក្លិបកងទ័ពឆត្រយោង ៩១១ មានបទពិសោធប្រកួតបាន ៨១ លើក។ ទី៣ កីឡាករឌុម កែវដា មកពីក្លិបមកុដរាជសីហ៍មានបទពិសោធប្រកួតចំនួន ៨៩ លើក និង ទី៤ កីឡាករឡុង សំណាង មកពីសាលវ័ន្តកីឡា មានបទពិសោធចំនួន ៧៦ លើក»។
ចំណែកកីឡាករថៃមានកីឡាករជើងចាស់ Loom Leng មានបទពិសោធប្រកួតបានចំនួន ៧៩ លើក។ ទី២ Phayak Lek មានបទពិសោធប្រកួតបានចំនួន ៨១ លើក។ ទី៣ កីឡាករចំណូលថ្មី Pek Thieng មានបទពិសោធប្រកួតបានចំនួន ៥៨ លើក និងទី៤ កីឡាករ Fa Nemith មានបទពិសោធ ប្រកួតបានចំនួន ៦៥ លើក៕