ក្រុងឡុងដ៍៖ កីឡាករបម្រុង Andriy Yarmolenko បានបង្ហាញវត្តមានដ៏កម្រមួយសម្រាប់ក្រុមញញួរធំ West Ham United ជាមួយនឹងការស៊ុតបញ្ចូលទីនៅចុងម៉ោង ១ គ្រាប់ ជួយឲ្យក្រុមរបស់ទទួលបានជ័យជម្នះដ៏មានតម្លៃបំផុតក្នុងលទ្ធផល ៣-២ នៅទឹកដីខ្លួនឯង អំឡុងការប្រកួតនៃក្របខ័ណ្ឌកំពូល Premier League ជាមួយក្រុមតោខៀវ Chelsea កាលពីថ្ងៃពុធ។
ខ្សែប្រយុទ្ធអន្តរជាតិអ៊ុយក្រែន Yarmolenko ដែលបានលេងជាលើកដំបូង ក្នុងរយៈពេល ៦ ខែ នាមជាកីឡាករបម្រុង ពេលក្រុម West Ham ប្រកួតចាញ់ក្រុម Wolverhampton ២-០ ត្រូវបានប្ដូរចូលនៅនាទីទី ៧៨ ពេលក្រុមទាំង ២ ដែលកំពុងតតាំងគ្នាសម្រាប់ជំនួបនៃក្រុមក្នុងក្រុងតែមួយមានលទ្ធផល ២-២។
ដោយសារក្រុមភ្ញៀវ Chelsea ធ្វើការវាយសម្រុកចង់ឈ្នះនៅចុងម៉ោង ពេលមានឱកាសវាយបកវិញ ដៃគូប្រយុទ្ធរបស់ក្រុមញញួរធំ សហការគ្នាបានយ៉ាងល្អ ដោយកីឡាករ Pablo Fornals បញ្ជូនបាល់ឲ្យទៅ Yarmolenko ដែលព្យាយាមបណ្ដើរបាល់គេចខ្សែការពារ Antonio Rudiger មុននឹងស៊ុតបាល់ផុតដៃអ្នកចាំទី Kepa Arrizabalaga ទម្លុះសំណាញ់ទីបានសម្រេចនៅនាទីទី ៨៩។
ទោះការប្រកួតនេះ មិនមានអ្នកគាំទ្រក្រុម West Ham ក្នុងកីឡដ្ឋាន London Stadium ក៏ពិតមែន តែសម្រែកដ៏រីករាយរបស់កីឡាករទាំងអស់ ដែលបញ្ចេញយ៉ាងកងរំពងពេញទីលានទទេស្អាតនោះ បានបង្ហាញឲ្យឃើញថា ជោគជ័យនេះ ពិតជាមានអត្ថន័យណាស់សម្រាប់ពួកគេ ព្រោះនេះជា ៣ ពិន្ទុដ៏សំខាន់ ដែលអាចជួយឲ្យពួកគេ មានសង្ឃឹមកាន់តែខ្ពស់ក្នុងការបន្តជីវិតនៅលីកកំពូលរបស់អង់គ្លេស។
ក្រោយចប់ការប្រកួត អ្នកចាត់ការរបស់ក្រុម West Ham លោក David Moyes បាននិយាយថា៖ «ខ្ញុំដឹងថា Yarmolenko អាចស៊ុតបញ្ចូលទីបាន។ គេគឺជាកីឡាករមានប្រវត្តិល្អមា្នក់។ ខ្ញុំមានអារម្មណ៍ថា ជាពេលវេលាសមរម្យ ដើម្បីធ្វើការផ្លាស់ប្ដូរ។ យើងបានស្ថិតក្នុងស្ថានភាពតានតឹងនាពេលនោះ ក្នុងលទ្ធផល ២-២ តែកីឡាករទាំងអស់នាំគ្នាប្រឹងប្រែងមិនព្រមលះបង់នោះឡើយ ហើយទីបំផុត យើងទទួលបានលទ្ធផលល្អមួយ»។
ពាក់ព័ន្ធនឹងពិន្ទុ ដើម្បីគេចផុតពីតំបន់ត្រូវកាត់ចោល លោក Moyes បានប្រាប់បន្តទៀតថា៖ «ប្រសិនបើអ្នកអាចដណ្ដើមបាន ៤០ ពិន្ទុ នោះអ្នកនឹងមានសុវត្ថិភាពនៅ Premier League ដូច្នេះយើងត្រូវតែព្យាយាមធ្វើឲ្យបានដល់ពិន្ទុប៉ុណ្ណឹង។ អ៊ីចឹងវាមានន័យថា យើងត្រូវការជ័យជម្នះ ៣ ដងទៀត»។
ដោយសារតែក្រុមគូប្រជែង ដែលចង់រស់រានដូចគ្នាមានទម្រង់លេងមិនល្អដែរ ទើបធ្វើឲ្យ West Ham ឡើងផុតពីតំបន់ដែលត្រូវកាត់ចោល បើទោះជាបរាជ័យដល់ទៅ ៣ ដងផ្ទួនៗ ដោយគ្មានគ្រាប់បាល់សូម្បី ១ គ្រាប់ក៏ដោយ តែការឈ្នះនេះ បានរុញពួកគេទៅនៅពីលើក្រុម Watford ឈរក្នុងចំណាត់ទី ១៦ ដោយមាន ៣០ ពិន្ទុ ពោលគឺមាន ៣ ពិន្ទុពីតំបន់ដែលគ្មានសិទ្ធិលេងនៅក្របខ័ណ្ឌទី១។
ចំណែកក្រុម Chelsea ក្រោយបរាជ័យ ធ្វើឲ្យបាត់ឱកាសឡើងទៅលេខ ៣ ឈរពីលើក្រុម Leicester City ហើយសំខាន់ទៀតនោះ តំណែងក្រុមកំពូលទាំង ៤ (Top4) ក៏កំពុងចាប់ផ្ដើមមានសញ្ញាមិនល្អដែរ ខណៈក្រុម Manchester United និង Wolverhampton តាមពីក្រោយយ៉ាងប្រកៀកប្រកិត៕ AFP/VN