.jpg)
Hazard ត្រូវរបួសនិងត្រូវបានគ្រាហ៍ចេញពីទីលានក្នុងការប្រកួតពានអឺរ៉ុបកាលពីរាត្រីថ្ងៃអង្គារ។ រូប AFP
ក្រុងម៉ា្រឌីដ៖ លោក Zinedine Zidane បាននិយាយថា គាត់មានការព្រួយបារម្ភពីរបួសកជើងរបស់ខ្សែប្រយុទ្ធ Eden Hazard ក្នុងការប្រកួតស្មើគ្នា ជាមួយក្រុម PSG ២-២ ខណៈពួកគេនឹងត្រូវប្រកួតជាមួយក្រុម Barcelona ក្នុងរយៈពេល ៣ សប្ដាហ៍ទៀត។
ខ្សែប្រយុទ្ធ Hazard ត្រូវបានបញ្ជូនចេញពីទីលានប្រកួតនៅតង់ទី ២ នៅកីឡដ្ឋាន Santiago Bernadeu ជាទីដែលក្រុម Real បាននាំមុខ ២ គ្រាប់ នៅក្នុងក្របខ័ណ្ឌ Champions League កាលពីថ្ងៃអង្គារ។
លោក Zidane ដែលក្រុមរបស់គាត់ឈរនៅលេខ ២ នៅក្នុងពូល A នោះ មានការព្រួយបារម្ភយ៉ាងខ្លាំងចំពោះស្ថានភាពរបួសរបស់កីឡាកររូបនេះ។
គ្រូបង្វឹករូបនេះបានប្រាប់ Movistar ថា៖ «មែនហើយ វាគួរឲ្យបារម្ភខ្លាំងណាស់» ដោយគាត់បានបន្ថែមក្នុងសន្និសីទកាសែតថា៖ «វាពិតជាការរងរបួសខុសពីធម្មតាទៅទៀត ប៉ុន្តែខ្ញុំសង្ឃឹមថា វានឹងធូរស្បើយទៅចុះ ហើយខ្ញុំអាចបញ្ជាក់ពីស្ថានភាពរបួសនេះនៅឡើយទេ»។
គ្រូបង្វឹកសញ្ជាតិបារាំងរូបនេះបានបន្ថែមថា៖ «ឥឡូវនេះយើងត្រូវធ្វើតេស្តសិន ហើយយើងនឹងដឹងនៅពេលក្រោយទៀត»។
ក្នុងការប្រកួតនេះ កីឡាករ Karim Benzenma រកបាន ២ គ្រាប់ ជួយឲ្យក្រុមម្ចាស់ផ្ទះនាំមុខក្រុមភ្ញៀវ PSG ២-០ ក្នុងនាទីទី ៧៩ ប៉ុន្តែកីឡាករ Kylian Mbappe និងកីឡាករ Pablo Sarabia រកបានម្នាក់ ១ គ្រាប់ ជួយឲ្យក្រុមភ្ញៀវតាមស្មើ ២-២ ក្នុងនាទីទី ៨៣។
លោក Zidane បាននិយាយថា ទម្រង់លេងរបស់ក្រុម Real គឺគួរឲ្យពេញចិត្តណាស់ ហើយថា៖ «វាជាការប្រកួតអស្ចារ្យមួយរបស់ក្រុមនេះ ប៉ុន្តែយើងត្រូវបង្កើនសមត្ថភាពថែមទៀត។ យើងត្រូវតែពេញចិត្តនឹងការប្រកួតនេះ»។
គ្រូបង្វឹករូបនេះបានបន្ថែមថា៖ «អ្នកមិនអាចពេញចិត្តលទ្ធផលនេះទេ ប៉ុន្តែគ្មានជម្រើសដូច្នេះអ្នកត្រូវតែពេញចិត្តនឹងអ្វីដែលយើងបានធ្វើរយៈពេល ៨០ ឬ ៨៥ នាទីនេះ»៕ AFP/SN
