The Phnom Penh Post Search

Search form




Logo of Phnom Penh Post newspaper Phnom Penh Post - ការ​ប៉ះ​ទង្គិច​ធ្វើ​ឲ្យ​ស្លាប់-របួស​បាតុករ




ការ​ប៉ះ​ទង្គិច​ធ្វើ​ឲ្យ​ស្លាប់-របួស​បាតុករ

ការ​ប៉ះ​ទង្គិច​ធ្វើ​ឲ្យ​ស្លាប់-របួស​បាតុករ

Content image - Phnom Penh Post

ភ្នំពេញៈ យ៉ាង​ហោច​ណាស់​យុវជន​ម្នាក់​ត្រូវ​បាន​គេ​ឃើញ​ស្លាប់​នៅ​ក្នុង​ថ្លុក ឈាម និង​ពីរ​នាក់​ទៀត ត្រូវ​បាន​រង​របួស​បាក់​ភ្លៅ និង​បែក​ក្បាល និង​ជា​ច្រើន​នាក់​ទៀត ត្រូវ​បាន​ចាប់​ខ្លួន នៅ​ក្នុង​ការ​ប៉ះ​ទង្គិច​គ្នា រវាង​សមត្ថកិច្ច និង​ក្រុម​បាតុករ​នៅ​ម្តុំ​ស្ពាន​អាកាស​ក្បាល​ថ្នល់​កាល​ពី​ម៉ោង​ប្រមាណ ជា​ជាង ៧ យប់​មិញ។

ការ​ប៉ះ​ទង្គិច​គ្នា ដែល​សាក្សី​ឃើញ​ហេតុ​ការណ៍​បាន​អះអាង​ថា សមត្ថកិច្ច​បាន​បាញ់​គ្រាប់​បែក​ផ្សែង​បង្ហូរ​ទឹក​ភ្នែក​និង​គ្រាប់​កាំភ្លើង​ពិត​នេះ គឺ​បាន​កើត​ឡើង​បន្ទាប់​ពី​មាន​ការ​ប៉ះ​ទង្គិច​គ្នា​មួយ​ប្រាវ នៅ​ខាង​មុខ​វត្ត ឧណ្ណាលោម កាល​ពី​រសៀល​ថ្ងៃ​ម្សិលមិញ​ដែល​បណ្តាល​ឲ្យ​មនុស្ស​យ៉ាង​ហោច​ណាស់ ៤ នាក់​ផ្សេង​ទៀត​រង​របួស។

លោក ឆេង សុភ័ស មន្ត្រី​ស៊ើប​អង្កេត​ជាន់​ខ្ពស់​អង្គការ​សិទ្ធិ​មនុស្ស លីកាដូ បាន​ឲ្យ ដឹង​កាល​ពី​យប់​មិញ​ថា នៅ​ពេល​មាន​ការ​ប៉ះ​ទង្គិច​គ្នា គេ​ឃើញ​យុវជន​ម្នាក់​បាន​ស្លាប់​នៅ​មុខ​ហាង ៣៣៣ ក្បែរ​ស្ពាន​អាកាស​ក្បាល​ថ្នល់​ខណៈ​យុវជន ជាច្រើន​នាក់​ទៀត​បាន​រង​របួស ហើយ​មនុស្ស​ជាច្រើន ត្រូវ​បាន​សមត្ថកិច្ច​ចាប់​ខ្លួន​។ លោក​បាន​បញ្ជាក់​ថា៖ «យុវជន​ដែល​ស្លាប់​មាន​ហូរ​ឈាម​ពុំ​ស្គាល់​អត្ត​សញ្ញាណ​ទេ មាន​អាយុ​ប្រហែល ២០ ឆ្នាំ​មាន​ស្នាម​រន្ធ​មួយ​នៅ​ត្រង់​ក្បាល។ ចំណែក​យុវជន​ដែល​រង​របួស​បាក់​ភ្លៅ​មាន​ឈ្មោះ ទាវ សំណាង អាយុ ២៤ ឆ្នាំ និង​យុវជន​រង​របួស​ក្បាល​ឈ្មោះថៃ ម៉ូវ អាយុ ២៥ ឆ្នាំ»។

តាម​សេចក្តី​រាយការណ៍​ផ្សេង​ទៀត​ថា នៅ​មាន​យុវជន​រង​របួស​ជាច្រើន​ត្រូវ​គេ​បញ្ជូន​ទៅ​មន្ទីរពេទ្យ​នៅ​ច្បារអំពៅ។

ក្នុង​ព្រឹត្តការណ៍​ដែល​ធ្វើ​ឲ្យ​ល្អក់​កករ ដល់​បាតុកម្ម​អហិង្សា​ពេញ​មួយ​ថ្ងៃ​ដែល​រៀបចំ​ឡើង​ដោយ​គណបក្ស​សង្គ្រោះ​ជាតិ នគរបាល​បាន​ប្រើ​ប្រាស់​កាណុង​ទឹក និង​បាន​បាញ់​គ្រាប់​បែក​ផ្សែង​បង្ហូរ​ទឹក​ភ្នែក មក​លើ​បាតុករ​រាប់​រយ​នាក់។ អាជ្ញាធរ​បាន​ទប់​ទល់​នឹង​ការ​រើ​យក​របង​លួស​បន្លា​ទៅ​ទម្លាក់​ចូល​ក្នុង​ទន្លេ​សាប ដោយ​បាតុករ​មួយ​ក្រុម​តូច។

បាតុករ​បាន​ឆ្លើយ​តប​នឹង​ការ​បាញ់​ទឹក​ដោយ​គប់​ដុំ​ថ្ម និង​ស្បែក​ជើង​ទៅ​លើ​កង​កម្លាំង​សមត្ថកិច្ច​ដែល​នាំ​ឲ្យ​មាន​ការ​បាញ់​គ្រាប់​ផ្សែង​បង្ហូរ​ទឹក​ភ្នែក​រាប់​សិប​គ្រាប់​ពី​កម្លាំង​សមត្ថកិច្ច។

បុរស​ម្នាក់​បាន​ជាប់​ខ្លួន​នឹង​លួស​បន្លា​ខណៈ​ដែល​នគរបាល បាន​បន្ត​បាញ់​ទឹក​មក​លើ​គាត់ ហើយ​បាន​ប្រញាប់​ប្រញាល់ ចេញ​ពី​កន្លែង​ប៉ះទង្គិច​នោះ។

បុគ្គលិក​សង្គ្រោះ​បន្ទាន់​ដែល​ព្យាបាល​បុរស​នោះ បាន​ថ្លែង​តមក​ថា បើ​ទោះ​ជា​ទឹក​ចូល​ក្នុង​សួត​គាត់​ក៏​ដោយ ក៏​ប៉ុន្តែ​គាត់​ត្រូវ​បាន​បញ្ជូន​ទៅ​មន្ទីរពេទ្យ​ភ្លាមៗ ដោយ​គ្មាន​របួស​ធ្ងន់​ធ្ងរ​ទេ។ បុគ្គលិក​សង្គ្រោះ​ដែល​ប្រាប់​តែ​នាម​ខ្លួន​ថ្លែង​ថា បាតុករ​សរុប​បី​នាក់ ត្រូវ​បាន​ព្យាបាល​ដោយ​ក្រុម​របស់​លោក។

ក្រោយ​មក កង​រាជ​អាវុធហត្ថ បាន​បញ្ជាក់​ថា មន្រ្តី​នគរបាល​ម្នាក់​ក៏​បាន​រង​របួស​ផង​ដែរ ដោយ​សារ​ដុំ​ថ្ម​គប់​ពី​បាតុករ។

ព្រឹត្តិការណ៍​នេះ​ខុស​ពី​បរិយាកាស ដូច​ពិធី​នៅ​សួន​សេរីភាព កាល​ពី​ព្រឹក​ម្សិលមិញ នៅ​ពេល​អ្នក​គាំទ្រ​គណបក្ស​ប្រឆាំង​រាប់​ម៉ឺន​នាក់ បាន​ប្រមូល​ផ្តុំ​គ្នា​ដើម្បី​ស្តាប់​មេ​ដឹក​នាំ​គណបក្ស​សង្គ្រោះ​ជាតិ ចាប់​ផ្តើម​បាតុកម្ម​ដែល​គ្រោង​ធ្វើ​រយៈ​ពេល ៣ ថ្ងៃ។

មេ​ដឹក​នាំ​គណបក្ស​ប្រឆាំង បាន​លើក​ឡើង​ជា​ថ្មី​នូវ​សេចក្តី​អំពាវនាវ​ឲ្យ​បើក​ការ​ស៊ើប​អង្កេត​គួរ ឲ្យ​ទុក​ចិត្ត​បាន​លើ​ភាព​មិន​ប្រក្រតី​នៃ​ការ​បោះឆ្នោត ដែល​លោក កឹម សុខា អនុ​ប្រធាន បាន​ប្រើ​ប្រាស់​សេចក្តី​ថ្លែង​របស់​ស្ថានទូត​ដែល​ស្នើ​ឲ្យ​ធ្វើ​ការ​ស៊ើប​អង្កេត​ថា​ជា​ភ័ស្តុតាង​ដែល​សហគមន៍​អន្តរជាតិ​មិន​ទទួល​ស្គាល់​លទ្ធផល​បោះឆ្នោត។

លោក​បន្ថែម​ថា៖ «ប្រទេស​ដែល​មាន​ប្រជាធិបតេយ្យ ប្រទេស​ដែល​យុតិ្តធម៌​នៅ​ទូទាំង​ពិភពលោក ប្រទេស​ទាំង​នោះ​មិន​សរសេរ​លិខិត​អបអរ​សាទរ​គណបក្ស​ប្រជាជន​ទេ»។

ទន្ទឹម​នឹង​នេះ លោក សម រង្ស៊ី ប្រធាន​គណបក្ស​រិះគន់​គណៈកម្មាធិការ​ជាតិ​រៀបចំ​ការ​បោះឆ្នោត​និង​ក្រុម​ប្រឹក្សា​ធម្មនុញ្ញ​យ៉ាង​ខ្លាំង​ជា​ស្ថាប័ន​ពីរ​ដែល​ទទួល​ភារកិច្ច​ដោះស្រាយ បណ្តឹង​បោះឆ្នោត​ដែល​ស្ថិត​ក្រោម​ការ​បញ្ជា​របស់​បក្ស​កាន់​អំណាច។ លោក​ក៏​បាន​ថ្លែង​ដែរ​ថា បាតុកម្ម​នឹង​បន្ត​ទាល់​តែ​រក​បាន​យុត្តិធម៌​ជូន​អ្នក​បោះឆ្នោត។

កាល​ពី​យប់​ម្សិលមិញ បន្ទាប់​ពី​ព្រឹត្តិការណ៍​នៅ​វិថី ព្រះស៊ីសុវត្ថិ និង​ព្រះ នរោត្តម លោក សម រង្ស៊ី បាន​អះអាង​ថា បាតុកម្ម​របស់​គណបក្ស​ប្រឆាំង​នឹង​បន្ត បើ​ទោះ​ជា​មាន​ព្រឹតិ្តការណ៍​ហិង្សា​ដាច់​ដោយ​ឡែក​ក៏​ដោយ។

លោក​ឲ្យ​ដឹង​ទៀត​ថា ៖ «យើង​ជា​មនុស្ស​ចម្លែក​ក្នុង​ព្រឹតិ្តការណ៍​នេះ យើង​មិន​ពាក់​ព័ន្ធ​ទាល់​តែ​សោះ​។ ខ្ញុំ​បាន​ទៅ​កន្លែង​នោះ ដើម្បី​ថ្កោល​ទោស​អ្នក​ទាំង​ឡាយ​ដែល​ចូល​រួម​ប្រើ​ហិង្សា ព្រោះ​នេះ​ផ្ទុយ​នឹង​គោល​ជំហរ​អហិង្សា​របស់​យើង»។

លោក​បញ្ជាក់​ថា៖ «ដូច្នេះ វា​មិន​ផ្លាស់​ប្តូរ​អ្វី​ទេ ចំពោះ​គម្រោង​របស់​យើង​ក្នុង​ការ​រៀបចំ​បាតុកម្ម​រយៈ​ពេល ៣ ថ្ងៃ»។

លោក ជួន សុវណ្ណ ស្នងការ​នគរបាល​រាជធានី​ភ្នំពេញ បាន​បន្ទោស​គណបក្ស​សង្គ្រោះ​ជាតិ ចំពោះ​ការ​ផ្ទុះ​ហិង្សា កាល​ពី​ម្សិលមិញ ដោយ​ថ្លែង​ថា អ្នក​មាន​វត្តមាន​មើល​ឃើញ​ថា សកម្មភាព​ហិង្សា​ត្រូវ​បាន​បង្ក​ឡើង​ដោយ​ក្រុម​បាតុករ។

លោក​បន្តថា៖ «នគរបាល​បាន​ដាក់​របង​លួស ដើម្បី​ការពារ​ព្រះ​មហាក្សត្រ... [ខណៈ] ដែល [មនុស្ស​ប្រមូល​ផ្តុំ​គ្នា​] មិន​ឆ្ងាយ​ពី​ព្រះ​បរម​រាជវាំង​។ សាលា​ក្រុង​បាន​ប្រាប់​បក្ស​សង្គ្រោះ​ជាតិ​រួច​ហើយ​ថា ពួកគេ​ត្រូវ​អនុញ្ញាត​ឲ្យ​ធ្វើ​បាតុកម្ម​អហិង្សា​នៅ​សួន​សេរីភាព តើ​ហេតុ​អ្វី​វា​កើត​ឡើង​នៅ​មុខ​វត្ត ឧណ្ណាលោម?»។

130916_01a
បាតុករម្នាក់នេះរងនូវការបាញ់ទឹកដាក់ពីកងកម្លាំងសមត្ថកិច្ចនៅក្នុងការធើ្វបាតុកម្មនៅមុខវត្តឧណ្ណាលោមកាលពីថ្ងៃអាទិត្យម្សិលមិញ ផា លីណា

លោក ជួន សុវណ្ណ បាន​ថ្លែង​បន្ត​ថា ការ​ដាក់​របាំង​ត្រូវ​បាន​រៀបចំ​ឡើង​ដើម្បី​ការពារ​ប្រជាជន ហើយ​បើ​ទោះ​បី​ជា​បាតុករ​កប់​ដុំ​ថ្ម​ក៏​ដោយ​ក៏​នគរបាល​របស់​យើង​នៅ​តែ​អត់ធ្មត់។

លោក​ថ្លែង​ថា៖ «យើង​អត់​ធ្មត់​យើង​មិន​បាន​បង្ក្រាប​ទេ ... យើង​ប្រើ​តែ​គ្រាប់​បែក​ផ្សែង​ប៉ុណ្ណោះ ដូច្នេះ វា​នឹង​មិន​ប៉ះពាល់​ដល់​បាតុករ​ឬ​ធ្វើ​ឲ្យ​គេ​របួស​ទេ»។

ភាព​តាន​តឹង​បាន​កើត​ឡើង​នៅ​កន្លែង​ដាក់​របាំង​របស់​នគរបាល​ចាប់​ពី​ថ្ងៃ​ជិត​ត្រង់​ម្សិលមិញ នៅ​ពេល​ដែល​មេ​ដឹក​នាំ​គណបក្ស សម រង្ស៊ី និង​លោក កឹម សុខា បាន​ដឹក​នាំ​បាតុករ​ហែ​ក្បួន​ទៅ​មុខ​ព្រះ​បរម​រាជវាំង។

នៅ​ពេល​ប្រឈម​នឹង​របាំង​បិទ​ផ្លូវ នៅ​ពេល​នោះ​បាតុករ​បាន​ព្យាយាម​ដក​របាំង​លួស​ចេញ​នៅ​ចំពោះ​មុខ​កង​រាជ​អាវុធហត្ថ ដែល​មាន​កាន់​ខែល កំាភ្លើង​បាញ់​ឧស្ម័ន និង​ដំបង។

បើ​ទោះ​ជា​ពួក​គេ​បាន​អំណត់​អត់ធ្មត់ និង​អនុញ្ញាត​ឲ្យ​បាតុករ​ឆ្លង​កាត់​របាំង​លើក​ដំបូង​ក៏​នៅ​ក្រោយ​មក​កង​រាជ​អាវុធហត្ថ​មិន​បាន​បង្ហាញ​ភាព​អត់ធ្មត់​ទៀត​ដែរ ពេល​ដែល​បាតុករ​មួយ​ក្រុម​តូច​ត្រឡប់​មក​វិញ​នៅ​ម៉ោង​ប្រហែល ៣ រសៀល​ហើយ​ក៏​ចាប់​ផ្តើម​បិទ​របាំង​ផ្លូវ​ឡើង​វិញ។

លោក ជួន សុវណ្ណ បាន​ថ្លែង​ថា៖ «នៅ​ពេល​ថ្ងៃ​ត្រង់​បាតុករ​បាន​បំពាន​ទៅ​លើ​អាជ្ញាធរ​ម្តង​ហើយ​នៅ​តាម​ផ្លូវ​ទៅ​ព្រះ​បរម​រាជវាំង​។ នៅ​ពេល​នោះ​យើង​បាន​អនុញ្ញាត​ឲ្យ [លោក សម រង្ស៊ី ធ្វើ​ការ​បន់​ស្រន់​នៅ​មុខ​ព្រះ​បរម​រាជវាំង] ប៉ុន្តែ បន្ទាប់​មក​គាត់​ក៏​ត្រឡប់​ទៅ​ទីលាន​ប្រជាធិបតេយ្យ​វិញ ប៉ុន្តែ​ក្រុម​អ្នក​គាំទ្រ​គាត់​មិន​ត្រឡប់​ទៅ​វិញ​ទេ»។

យ៉ាង​ណា​ក៏​ដោយ​គណបក្ស​សង្គ្រោះ​ជាតិ​ពី​ព្រលប់​ថ្ងៃ​ម្សិលមិញ​បាន​ចេញ​សេចក្តី​ថ្លែង​ការណ៍​បន្ទាន់​មួយ​ធ្វើ​ការ​បដិសេធ​មិន ទទួល​ស្គាល់​ចំពោះ​ទង្វើ​ទាំង​ឡាយ​ដែល​បង្ក​ឲ្យ​មាន​អំពើ​ហិង្សា​នៅ​ក្នុង​សង្គម​ឡើយ ដោយ​ហេតុ​ថា នៅ​ក្នុង​ឱកាស​បាតុកម្ម​អហិង្សា​កាល​ពី​ម្សិលមិញ មាន​ជន​ឱកាស​និយម​មួយ​ក្តាប់​តូច បាន​ដើរ​បង្ក​ចលាចល ដូចជា​លើក​បន្លា​លួស​បោះ​ក្នុង​ទន្លេ និង​មាន​ជន​ខ្លះ​ដើរ​ស្រែក​ឡូឡា បង្ក​សកម្មភាព​ញុះ​ញង់ នៅ​តាម​ទី​សាធារណៈ​ផ្សេងៗ​។ គណបក្ស​សង្គ្រោះ​ជាតិ​គូស​បញ្ជាក់​ថា ខ្លួន​ធ្វើ​បាតុកម្ម​អហិង្សា​នៅ​ទីលាន​ប្រជាធិបតេយ្យ «ដូច្នេះ ចំពោះ​ទង្វើ​របស់​ជន​ឱកាស​និយម​ទាំង​ឡាយ​ណា​ដែល​ដើរ បង្ក​បញ្ហា​និង​ចលាចល​ផ្សេងៗ នៅ​ក្រៅ​ទីលាន​ប្រជាធិបតេយ្យ គណបក្ស​សង្គ្រោះ​ជាតិ ប្រកាស​បដិសេធ​មិន​ទទួល​ខុស​ត្រូវ​ឡើយ ហើយ​អំពាវនាវ​ឲ្យ​អាជ្ញាធរ​មាន​សមត្ថកិច្ច​ចាត់​វិធានការ​តាម​ផ្លូវ​ច្បាប់​ឱ្យ​បាន​ម៉ឺងម៉ាត់ ចំពោះ​ជន​ឱកាស​និយម​ទាំង​នោះ»។

អតីត​ទាហាន ម្នាក់លោក អ៊ុក សុវណ្ណរិទ្ធ អាយុ ៥៥ ឆ្នាំ​បាន​ថ្លែង​ថា លោក​ជឿ​ថា​ប្រជាជន​នាំ​គ្នា​យក​របាំង​ចេញ ពីព្រោះ​ពួក​គេ​ចង់​ត្រឡប់​ទៅ​ផ្ទះ​ដែល​នៅ​ខាង​ក្រោយ​កន្លែង​ដាក់​របាំង។

លោក​បន្ត​ថា៖ «ខ្ញុំ​ខឹង​ខ្លាំង​ណាស់ នៅ​ពេល​ខ្ញុំ​ឃើញ​ពួក​គេ​ប្រព្រឹត្ត​អំពើ​ហិង្សា​ទៅ​លើ​មនុស្ស​ធម្មតា​ដូចនេះ ពីព្រោះ​ខ្ញុំ​ធ្លាប់​ជា​ទាហាន​ដែរ ប៉ុន្តែ ខ្ញុំ​មិន​ដែល​ធ្វើ​អ្វី​ទៅ​លើ​ពលរដ្ឋ​សាមញ្ញ​ទេ»។

បន្ទាប់​ពី​ការ​សងសឹក​របស់​នគរបាល ដែល​បណ្តាល​ឲ្យ​អ្នក​ឈរ​មើល​រាប់​រយ​នាក់​រួម​ទាំង​ភ្ញៀវ​ទេសចរ​អ្នក​សង្កេត​ការណ៍ របស់​អង្គការ​ក្រៅ​រដ្ឋាភិបាល​និង​អ្នក​កាសែត​រត់​គេច ក្រុម​មន្រ្តី​ពី​ការិយាល័យ​ឧត្តម​ស្នងការ​សហ​ប្រជាជាតិ​ទទួល​បន្ទុក ខាង​សិទ្ធិ​មនុស្ស បាន​មក​ដល់ ហើយ​ចត​ឡាន​នៅ​មុខ​របាំង​ដែល​ដាក់​រាំង​ជា​ថ្មី​ទាំង​នោះ។

មន្រ្តី​អង្គការ​សហ​ប្រជាជាតិ បន្ទាប់​មក​ជួប​ពិភាក្សា​ជាមួយ​ស្នងការ​នគរបាល​រាជធានី​លោក ជួន សុវណ្ណ នៅ​រង្គសាល​ជិត​នោះ ដើម្បី​រក​ដំណោះស្រាយ​ដែល​អំឡុង​ពេល​នោះ​លោក សម រង្ស៊ី ក៏​បាន​ទៅ​ដល់​កន្លែង​កើត​ហេតុ​ដែរ។

មន្រ្តី​អង្គការ​សហ​ប្រជាជាតិ​បដិសេធ មិន​ធ្វើ​អត្ថាធិប្បាយ​អំពី​លទ្ធផល​ជួប​ចរចា​នោះ​ទេ។

លោក សម រង្ស៊ី ថ្លែង​ថា៖ «ខ្ញុំ​សូម​អំពាវនាវ​ទៅ​ក្រុម​យុវជន​នេះ​ឬ​បណ្តា​ជន​ដទៃ​ទៀត​ឲ្យ បញ្ឈប់​អំពើ​ហិង្សា​ជា​បន្ទាន់​...​ខ្ញុំ​ថ្កោល​ទោស​នរណា​ក៏​ដោយ​ដែល​ប្រើ​ហិង្សា...សូម​បញ្ឈប់​ហើយ​ទៅ​ផ្ទះ​វិញ​វា​គ្រប់​គ្រាន់​ហើយ។ តែ​បើ​នរណា​ម្នាក់​ចង់​ស្តាប់​តន្រ្តី សូម​ទៅ​កាន់​នៅ​ទីលាន​ប្រជាធិបតេយ្យ​ដើម្បី​រីក​រាយ​សប្បាយ​ដោយ​សន្តិវិធី»។

បើ​ទោះ​ជា​ក្រសួង មហាផ្ទៃ​បាន​ថ្លែង​ថា គណបក្ស​សង្គ្រោះ​ជាតិ​នឹង​ត្រូវ​អនុញ្ញាត​ឲ្យ​ធ្វើ​បាតុកម្ម​តែ​ពី​ម៉ោង ៦ ព្រឹក​ដល់ ៦ ល្ងាច កាល​ពី​ម្សិលមិញ​ក៏​ដោយ ក៏​បាតុករ​រាប់​ពាន់​នាក់ នៅ​ម៉ោង​ជាង ៨ យប់​មិញ​បាន​ព្យាយាម​ធ្វើ​ដំណើរ​ទៅ​ទីលាន​ប្រជាធិបតេយ្យ ដើម្បី​ស្នាក់នៅ​ទី​នោះ​ដែរ។

គណបក្ស​ប្រឆាំង​បាន​ប្រកាស​កាល​ពី​ល្ងាច​ម្សិល​ថា កម្មវិធី​បាតុកម្ម​បាន​បញ្ចប់​ជា​ផ្លូវ​ការ​សម្រាប់​ថ្ងៃ​នេះ ប៉ុន្តែ​ថា បាតុករ​អាច​ទៅ​បោះ​តង់​តាម​ឆន្ទៈ​ផ្ទាល់​បាន។

គណបក្ស​ប្រឆាំង​មុន​នេះ បាន​សន្យា​ទៅ​កាន់​ក្រុម​អ្នក​គាំទ្រ​ខ្លួន ដែល​ភាគ​ច្រើន​នៃ​ពួក​គេ​ជា​អ្នក​ធ្វើ​ដំណើរ​មក​ពី​ខេត្ត​ឆ្ងាយៗ​ថា គណបក្ស​នឹង​រៀបចំ​ឲ្យ​ស្នាក់នៅ​សម្រាប់​ពេល​យប់។

លោក គុច ចាន់ថា អាយុ ៦១ ឆ្នាំ​មក​ពី​ខេត្ត ព្រៃវែង និយាយ​ថា៖ «ខ្ញុំ​មិន​បារម្ភ​អំពី​គ្រោះថ្នាក់​ទេ​។ ខ្ញុំ​បាន​មក​ចូល​រួម​បាតុកម្ម​ដើម្បី​ស្វែង​រក​យុត្តិធម៌​។ ខ្ញុំ​បាន​សម្រេច​មក​ស្នាក់​ទី​នេះ​ចំនួន ៣ ថ្ងៃ»។

បើ​តាម លោក សម រង្ស៊ី គណបក្ស​បាន​ជំរុញ​ឲ្យ​អ្នក​ដែល​មក​ពី​ខេត្ត​ជិត ដូចជា ខេត្ត កណ្តាល ឲ្យ​ត្រឡប់​ទៅ​ផ្ទះ​វិញ។ លោក​បន្ត​ថា អ្នក​មក​ពី​ខេត្ត​ឆ្ងាយៗ កំពុង​ផ្តល់​ការ​ជួយ​សម្រួល​ផ្សេងៗ។

លោក​ថ្លែង​ថា៖ «យើង​កំពុង​ខំ​ប្រឹង​ប្រែង​អស់​ពី​សមត្ថភាព​ជាមួយ​ជំនួយ​សប្បុរស​របស់​ប្រជាជន​ដែល​រស់​នៅ​រាជធានី»៕TK/PS/

រាយការណ៍​បន្ថែមៈ លាង ផាន់ណារ៉ា, Kevin Ponniah, David Boyle,Shane Worrell

អត្ថបទគួរចាប់អារម្មណ៍