ភ្នំពេញៈ គណៈកម្មាធិការជាតិរៀបចំការបោះឆ្នោត(គ.ជ.ប) បានចេញសេចក្ដីបំភ្លឺមួយកាលពីម្សិលមិញ ស្តីពីការផ្អាកវិទ្យុមិនឲ្យផ្សាយបន្តពីវិទ្យុបរទេសនិងការហាមផ្សព្វផ្សាយការងារនិងលទ្ធផលនៃការបោះឆ្នាតនៅក្នុងពេលបោះឆ្នោត នៅថ្ងៃអាទិត្យសប្ដាហ៍ក្រោយ បន្ទាប់ពីក្រសួងព័ត៌មានបានចេញបញ្ជាហាមគ្រប់ប្រព័ន្ធផ្សព្វផ្សាយ កុំឲ្យចាក់ផ្សាយព័ត៌មានរបស់បរទេស ពាក់ព័ន្ធទៅនឹងការបោះឆ្នោត ក្នុងរយៈពេល ៥ ថ្ងៃមុន និងនៅក្នុងថ្ងៃបោះឆ្នោត។
យោង តាមសេចក្ដីបំភ្លឺរបស់ គ.ជ.ប ដែលភ្នំពេញ ប៉ុស្តិ៍ ទទួលបានកាលពីម្សិលមិញឲ្យដឹងថា សាធារណជនមួយចំនួនបានយល់ច្រឡំថា ការផ្អាកវិទ្យុមិនឲ្យផ្សាយបន្តនៅក្នុងអំឡុងពេលបោះឆ្នោតនោះ គឺបានធ្វើឡើងដោយ គ.ជ.ប។ សេចក្តីបំភ្លឺនេះបានបញ្ជាក់ថា៖ «ពាក់ព័ន្ធនឹងការយល់ច្រឡំនេះ គ.ជ.ប សូមបញ្ជាក់ថា គ.ជ.ប មិនបានធ្វើការផ្អាកវិទ្យុមិនឲ្យធ្វើការផ្សាយបន្តនោះទេ។ ប៉ុន្តែ ផ្ទុយទៅវិញ គ.ជ.ប បានចេញគោលការណ៍សម្រាប់ប្រព័ន្ធផ្សព្វផ្សាយព័ត៌មានក្នុងគោលបំណងធ្វើយ៉ាងណាឲ្យការបោះឆ្នោតជ្រើសតាំងតំណាងរាស្រ្តខាងមុខប្រព្រឹត្តទៅដោយសេរី ត្រឹមត្រូវ និងយុត្តិធម៌។
លិខិតនោះបន្តថា គ.ជ.ប បានជំរុញឲ្យគ្រប់ប្រព័ន្ធផ្សព្វផ្សាយទាំងអស់ត្រូវផ្តល់ព័ត៌មាននិងការអប់រំពីការបោះឆ្នោតដែលងាយស្រួលនិងមិនលម្អៀងក្នុងការផ្សាយព័ត៌មានពាក់ព័ន្ធនឹងការបោះឆ្នោត»។
សេចក្ដីថ្លែងការណ៍នេះលើកឡើងថា ម្ចាស់ប្រព័ន្ធផ្សព្វផ្សាយនិងអ្នកគ្រប់គ្រងត្រូវខិតខំចូល រួម ដើម្បីធ្វើឲ្យការបោះឆ្នោតនេះប្រព្រឹត្តទៅដោយសេរី ត្រឹមត្រូវ និងយុត្តិធម៌ តាមរយៈការផ្ដល់ព័ត៌មានពីការបោះឆ្នោត។
អគ្គលេខាធិការ គ.ជ.ប លោក ទេព នីថា បានថ្លែងពីថ្ងៃម្សិលមិញថា គ.ជ.ប មិនដែលបានហាមឃាត់ប្រព័ន្ធផ្សព្វផ្សាយមិនឲ្យចាក់ផ្សាយព័ត៌មាន ពីការបោះឆ្នោតនេះទេ។ លោកថ្លែងថា៖ «យើងចង់បញ្ជាក់កុំឲ្យមានការយល់ច្រឡំពីបញ្ហានេះបន្តទៀត។ គ.ជ.ប មិនដែលហាមឃាត់ពីបញ្ហានេះទេ»។
លោក ទេព នីថា បានបញ្ជាក់ថា ការចាក់ផ្សាយ ឬក៏មិនចាក់ផ្សាយពីការបោះឆ្នោត គឺជាសិទ្ធិពួកគេ។ ប៉ុន្តែយើងបានហាមឃាត់ប្រព័ន្ធផ្សព្វផ្សាយកុំឲ្យចាក់ផ្សាយពីការស្ទង់មតិនិងលទ្ធផលដែលបានពីការស្ទង់មតិពីការបោះឆ្នោតរយៈពេល៥ថ្ងៃមុនការបោះឆ្នោតនិងនៅថ្ងៃបោះឆ្នោត។ គណបក្សទាំងអស់មិនអនុញ្ញាតឲ្យធ្វើការឃោសនាមួយថ្ងៃមុន ថ្ងៃបោះឆ្នោតនិងនៅថ្ងៃបោះឆ្នោតឡើយ។ ប្រព័ន្ធផ្សព្វផ្សាយទាំងអស់ក៏មិនត្រូវផ្សព្វផ្សាយតែភាគីតែម្ខាងៗដែរគឺត្រូវផ្សាយឲ្យអព្យាក្រឹតព្រោះយើងចង់ឲ្យអ្នកបោះឆ្នោតធ្វើការសម្រេចចិត្តបានត្រឹមត្រូវ»៕ PN
