The Phnom Penh Post Search

Search form

Logo of Phnom Penh Post newspaper Phnom Penh Post - នាំ​ខ្លួន​សកម្មជន​បក្ស​ប្រឆាំង​រឿង​ចែក​ឯកសារ​ស្ទង់​មតិ​មិន​ពិត

នាំ​ខ្លួន​សកម្មជន​បក្ស​ប្រឆាំង​រឿង​ចែក​ឯកសារ​ស្ទង់​មតិ​មិន​ពិត

នាំ​ខ្លួន​សកម្មជន​បក្ស​ប្រឆាំង​រឿង​ចែក​ឯកសារ​ស្ទង់​មតិ​មិន​ពិត

130719_04
យុវជនដែលគាំទ្រគណបក្សសង្គ្រោះជាតិក្នុងយុទ្ធនាការឃោសនាបោះឆ្នោត

ព្រៃវែងៈ សកម្មជន​គណបក្ស​សង្គ្រោះ​ជាតិ​ម្នាក់​នៅ​ក្នុង​ស្រុក កញ្ចៀច ត្រូវ​បាន​នគរបាល​នាំ​ខ្លួន​ទៅ​សាក​សួរ​ពាក់​ព័ន្ធ​នឹង​ការ​ចែក​ចាយ​ឯកសារ​ស្ទង់​មតិ​ក្លែង​ក្លាយ ប្រើ​ឈ្មោះ​វិទ្យាស្ថាន IRI របស់​អាមេរិក​ដែល​បាន​ព្យាករ​ថា ការ​បោះឆ្នោត​នៅ​ថ្ងៃ​ទី ២៨ ខែ​កក្កដា គណបក្ស​សង្គ្រោះ​ជាតិ នឹង​ទទួល​បាន​អាសនៈ​ក្នុង​រដ្ឋសភា​ចំនួន ៦៤ ហើយ​គណបក្ស​ប្រជាជន​កម្ពុជា​នឹង​ទទួល​បាន​អាសនៈ​ចំនួន ៥៩។

ការ​នាំ​ខ្លួន​ទៅ​សាក​សួរ​នេះ បាន​កើត​ឡើង​តែ​មួយ​ថ្ងៃ​ប៉ុណ្ណោះ បន្ទាប់​ពី​សកម្មជន​គណបក្ស​សង្គ្រោះ​ជាតិ​ម្នាក់ នៅ​ក្នុង​ខេត្ត​កណ្តាល ត្រូវ​បាន​តុលាការ​ចោទ​ប្រកាន់ និង​បញ្ជូន​ទៅ​ឃុំ​ខ្លួន​នៅ​ពន្ធនាគារ ពាក់​ព័ន្ធ​ទៅ​នឹង​ការ​ប្រើ​អំពើ​ហិង្សា​ទៅ​លើ​សកម្មជន​គណបក្ស​ប្រជាជន នៅ​ពេល​មាន​ការ​ប៉ះ​ទង្គិច​គ្នា​ក្នុង​យុទ្ធនាការ​ឃោសនា​បោះឆ្នោត។

លោក ឈាន បូ អាយុ ៥៨ឆ្នាំ ជំទប់​ទី ២ ឃុំ​ត្នោត មក​ពី​គណបក្ស​សម រង្ស៊ី និង​ជា​សកម្មជន​គណបក្ស​សង្គ្រោះ​ជាតិ ត្រូវ​បាន​សមត្ថកិច្ច​ឃាត់​ខ្លួន នៅ​វេលា ម៉ោង ៨ និង ៤០ នាទី​ព្រឹក ម្សិលមិញ ខណៈ​កំពុង​ចែក​ចាយ​ឯកសារ​ថត​ចម្លង ស្ទង់​មតិ​ក្លែង​ក្លាយ។

លោក លាង ស្រ៊ន នាយ​ប៉ុស្តិ៍​នគរបាល ឃុំ ត្នោត​បាន​ឲ្យ​ដឹង​ថា ក្រោយ​ពី​មាន​បញ្ជា​ពី​រាជ​រដ្ឋាភិបាល បង្គាប់​ឲ្យ​ធ្វើ​ការ ស្រាវជ្រាវ និង​ចាប់​ខ្លួន​ជន​សង្ស័យ ដែល​ផលិត ចែក​ចាយ និង​ប្រើ​ប្រាស់​ឯកសារ​ស្ទង់​មតិ​ក្លែង​ក្លាយ ដោយ​ប្រើ​ឈ្មោះ IRI ក្នុង​ការ​បោក​ប្រាស់​សាធារណជន​នៅ​មុន​ដំណើរ​ការ​បោះឆ្នោត កង​កម្លាំង​របស់​លោក​ក៏​បាន​ចុះ​អង្កេត​តាម​មូលដ្ឋាន ហើយ​បាន​ឃើញ​លោក ឈាន បូ កំពុង​ចែក​ចាយ​ឯកសារ​នោះ។ លោក​ថ្លែង​ថា ៖«​យើង​ក៏​បាន​ធ្វើ​ការ​ឃាត់​ខ្លួន​គាត់ ដើម្បី​សាក​សួរ។ គាត់​ប្រាប់​ថា គាត់​បាន​ទទួល​វា ពី​សកម្មជន​ម្នាក់ ឈ្មោះ​ជីវ អ៊ីម ជំទប់​ទី២ ឃុំ​គោក​គង់​លិច ហើយ​គាត់​បាន​យក​វា​ទៅ​ថត​ចម្លង ១០ សន្លឹក​បន្ថែម​ទៀត ចែក​ជូន​ដល់​សកម្មជន ដែល​មក​ចូល​រួម​ការ​ឃោសនា​គណបក្ស​សង្គ្រោះ​ជាតិ»។

លោក​ឲ្យ​ដឹង​ទៀត​ថា លិខិត​នោះ មាន​ស្លាក​សញ្ញា​គណបក្ស ចំនួន​ពីរ​ប៉ុណ្ណោះ គឺ​គណបក្ស​ប្រជាជន និង​គណបក្ស​សង្គ្រោះ​ជាតិ ដោយ​បាន​គណនា​នូវ​ចំនួន​អាសនៈ ដែល​គណបក្ស​ទាំង​ពីរ​ទទួល​បាន​ដែល​ថា​«គណបក្ស​ប្រជាជន​ទទួល​បាន ៥៩ អាសនៈ ហើយ​គណបក្ស​សង្គ្រោះ​ជាតិ ទទួល​បាន ៦៤ អាសនៈ»។ លោក​បញ្ជាក់​ថា៖«នេះ​ជា​ល្បិចកល​របស់​អ្នក​នយោបាយ​នៃ​ក្រុម​ណា​មួយ​ដែល​ធ្វើ​ឡើង​ដើម្បី​ទាក់​ទាញ​ការ​គាំទ្រ​ពី​មហាជន ប៉ុន្តែ​អី្វ​ដែល​ពួកគេ​បាន​ធ្វើ​គឺ​ប្រើ​ឈ្មោះ IRI មក​ក្លែង​បន្លំ ដែល​ធ្វើ​ដូច្នេះ គឺ​ជា​អំពើ​ល្មើស​ច្បាប់​»។ ទោះ​បែប​ណា លោក​បញ្ជាក់​ថា សមត្ថកិច្ច បាន​ដោះ​លែង​លោក ឈាន បូ ឲ្យ​ត្រឡប់​ទៅ​វិញ​ហើយ បន្ទាប់​ពី​បាន​សាក​សួរ និង​ធ្វើ​កំណត់​ហេតុ​រួច​កាល​ពី​ព្រឹក​ថ្ងៃ​ព្រហស្បតិ៍។

លោក ឈាន បូ បាន​ប្រាប់​ភ្នំពេញ ប៉ុស្តិ៍ ក្រោយ​ពី​សមត្ថកិច្ច​បាន​សាក​សួរ​រួច​ថា លោក​ទទួល​ឯកសារ​នោះ​ពី​លោក ជីវ អ៊ីម ជំទប់​ទី ២ ឃុំ​គោក​គង់​លិច កាល​ពី​ថ្ងៃ​ទី ១៣ កក្កដា។ លោក​បន្ត​ថា នៅ​ពេល​នោះ​លោក​បាន​យក​វា​ទៅ​ថត​ចម្លង​ចំនួន ១០ ច្បាប់ ហើយ​ចែក​ជូន​ដល់​សកម្មជន ដែល​ចូល​រួម​ក្នុង​ការ​ឃោសនា។

លោក​បាន​និយាយ​ថា៖ «សមត្ថកិច្ច​នគរបាល​ឃុំ ត្នោត បាន​នាំ​ខ្លួន​ខ្ញុំ ទៅ​សាក​សួរ អំពី​លិខិត​នោះ ថា​តើ​ខ្ញុំ​បាន​វា​មក​ពី​អ្នក​ណា? ហើយ​ខ្ញុំ​បាន​ប្រាប់​សមត្ថកិច្ច​តាម​ត្រង់»។

លោក ជីវ អ៊ីម បាន​និយាយ​ថា លោក​បាន​ទទួល​ឯកសារ​នោះ ពី​ក្រុម​យុវជន​មួយ​ក្រុម មក​ពី​ខេត្ត​កំពង់ចាម បាន​ចែក​វា​មក​លោក និង​អ្នក​ភូមិ​មួយ​ចំនួន។ លោក​បាន​បន្ត​ថា​៖«ខ្ញុំ​មិន​ដឹង​ថា វា​ពិត​ជា​ឯកសារ​ស្ទង់​មតិ​របស់ IRI ឬ អត់​នោះ​ទេ ហើយ​ខ្ញុំ​ក៏​មិន​ស្គាល់​អត្ត​សញ្ញាណ​របស់​ក្រុម​យុវជន​នោះ​ដែរ»។

រដ្ឋាភិបាល​បាន​ចេញ​សេចក្តី​ថ្លែងការណ៍​មួយ កាល​ពី​ថ្ងៃ​ពុធ ដោយ​ហៅ​ការ​ផ្សព្វ​ផ្សាយ​ឯកសារ​ស្ទង់​មតិ​ក្លែង​ក្លាយ​នេះ ថា​ជា​ទង្វើ​«ថោកទាប​» របស់​ក្រុម​ជន​ទុច្ចរិត ដែល​បាន​និង​កំពុង​បំផ្លាញ​នូវ​ដំណើរ​ការ​បោះឆ្នោត​ដែល​កំពុង​តែ​មាន​ភាព​ល្អ​ប្រសើរ​។ សេចក្តី​ថ្លែង​ការណ៍​បន្ត​ថា ឯកសារ​ស្ទង់​មតិ​ក្លែង​ក្លាយ​នោះ​គឺ​ជា​ទង្វើ​បោក​បញ្ឆោត​មតិ​សាធារណៈ ដែល​អាច​ធ្វើ​ឲ្យ​មាន​ភាព​ចលាចល​ក្នុង​សង្គម។

ប្រធាន​វិទ្យាស្ថាន​សាធារណ​រដ្ឋ​អន្តរជាតិ IRI ប្រចាំ​កម្ពុជា លោក​ស្រី Jessica Keegan បាន​ថ្លែង​ថា ឯកសារ​ដែល​ត្រូវ​បាន​គេ​ផ្សព្វ​ផ្សាយ​នោះ​គឺ​ក្លែង​ក្លាយ។

លោក គង់ បូរ៉ា បេក្ខជន​តំណាង​រាស្ត្រ​គណបក្ស​សង្គ្រោះ​ជាតិ ប្រចាំ​មណ្ឌល​ព្រៃវែង បាន​ប្រាប់​ភ្នំពេញ ប៉ុស្តិ៍​ថា គណបក្ស​សង្គ្រោះ​ជាតិ​កំពុង​ធ្វើ​ការ​ស្រាវជ្រាវ​ឯកសារ​ស្ទង់​មតិ ក្លែង​ក្លាយ​នោះ​។ «ខ្ញុំ​យល់​ថា ករណី​នេះ​វា​អាច​ជា​ការ​បង្កើត​ឡើង​ដោយ​ក្រុម​ជន​ដែល​មាន​ទំនោរ​ទៅ​រក​គណបក្ស​កាន់​អំណាច ដើម្បី​ចោទ​ប្រកាន់ និង​បំភិត​បំភ័យ គណបក្ស​យើង​ខ្ញុំ​ដែល​ជា​គូ​ប្រជែង​ដ៏​ធំ​របស់​ពួក​គេ»៕

អត្ថបទគួរចាប់អារម្មណ៍