The Phnom Penh Post Search

Search form




Logo of Phnom Penh Post newspaper Phnom Penh Post - អ្នក​វិភាគ​៖ ការ​ដក​អាសនៈ​ពី​បក្ស​ប្រឆាំង​គ្មាន​ច្បាប់




អ្នក​វិភាគ​៖ ការ​ដក​អាសនៈ​ពី​បក្ស​ប្រឆាំង​គ្មាន​ច្បាប់

អ្នក​វិភាគ​៖ ការ​ដក​អាសនៈ​ពី​បក្ស​ប្រឆាំង​គ្មាន​ច្បាប់

130805_04
លោកនាយករដ្ឋមន្ត្រីហ៊ុន សែន នៅពេលចុះទៅខេត្តកណ្តាលកាលពីថ្ងៃសុក្រ សហការី

កណ្តាលៈ ពីរ​ថ្ងៃ​បន្ទាប់​ពី​លោក​នាយក​រដ្ឋ​មន្រ្តី ហ៊ុន សែន បាន​ព្រមាន​ថា ការ​ធ្វើ​ពហិការ​របស់​គណបក្ស​ប្រឆាំង​មិន​ចូល​រួម​រដ្ឋសភា នឹង​ធ្វើ​ឲ្យ​គណបក្ស​ប្រជាជន លោក​កាន់​កាប់​អាសនៈ​ទាំង​អស់​ក្នុង​រដ្ឋសភា អ្នក​វិភាគ​ថ្លែង​កាល​ពី​ម្សិលមិញ​ថា គណបក្ស​ប្រជាជន​គ្មាន​មូលដ្ឋាន​ច្បាប់ និង​ភាព​ស្រប​ច្បាប់​ផ្នែក​នយោបាយ​ក្នុង​ការ​កាន់​អំណាច​ជា​រដ្ឋាភិបាល ក្រោម​ប្រព័ន្ធ​គណបក្ស​តែ​មួយ​ឡើយ។

គណបក្ស​សង្គ្រោះ​ជាតិ​ក៏​បាន ច្រាន​ចោល​ការ​អះអាង​របស់​លោក​នាយក​រដ្ឋ​មន្រ្តី​ដូច​គ្នា​ដែរ ដោយ​អះអាង​ថា​ការ​ព្យាយាម​រឹប​អូស​យក​អាសនៈ​របស់​គណបក្ស​ប្រឆាំង ដែល​រដ្ឋាភិបាល​កំណត់​ថា មាន ៥៥ អាសនៈ​នោះ គឺជា​អំពើ​ខុស​ច្បាប់។

ក្នុង​សុន្ទរកថា​នៅ​ខេត្ត កណ្តាល កាល​ពី​ថ្ងៃ​សុក្រ លោក ហ៊ុន សែន បាន​ថ្លែង​ថា «តួលេខ​មិន​សំខាន់​ទេ​» ចំពោះ​គណបក្ស​ប្រជាជន ដែល​ត្រូវ​ការ​កូរ៉ុម​ដើម្បី​កាន់​អំណាច​នោះ។

លោក​បន្ថែម​ថា គណបក្ស​កាន់​អំណាច​នឹង​បង្កើត​រដ្ឋាភិបាល​គណបក្ស​មួយ​ដែល​ជំរុញ​ដោយ​អាសនៈ របស់​គណបក្ស​ប្រឆាំង ប្រសិន​បើ​តំណាង​រាស្រ្ត​គណបក្ស​សង្គ្រោះ​ជាតិ​បដិសេធ​ការ​កោះ​អញ្ជើញ​របស់​ព្រះ​មហាក្សត្រ​ឲ្យ​ចូល​រួម​ប្រជុំ​បើក​រដ្ឋសភា​ដែល​ត្រូវ​ធ្វើ ឡើង​ក្នុង​រយៈ​ពេល ៦០ ថ្ងៃ​យ៉ាង​យូរ​បន្ទាប់​ពី​ការ​បោះឆ្នោត។

លោក ហ៊ុន សែន បាន​ថ្លែង​ថា៖ «សុពលភាព​នៃ​អភ័យ​ឯកសិទិ្ធ​នឹង​កើត​មាន​ពេល​ស្បថ។ ប្រសិន​បើ​អ្នក​មិន​ចូល​រួម... អ្នក​នឹង​ប្រឆាំង​ព្រះ​មហាក្សត្រ​»។ លោក​នាយក​រដ្ឋ​មន្រ្តី​បន្ថែម​ថា ការ​បែង​ចែក​អាសនៈ​របស់​គណបក្ស​សង្គ្រោះ​ជាតិ ទៅ​ឲ្យ​គណបក្ស​ប្រជាជន​កម្ពុជា ដែល​ជា​គណបក្ស​មាន​អាសនៈ​មួយ​ទៀត​ក្នុង​រដ្ឋសភា​នឹង​ធ្វើ​ឡើង​ដោយ​ស្រប​ច្បាប់​ដោយ​គណៈកម្មាធិការ​ជាតិ​រៀបចំ​ការ​បោះឆ្នោត។

ប៉ុន្តែ លោក សុក សំអឿន នាយក​ប្រតិបតិ្ត​នៃ​ក្រុម​អ្នក​ច្បាប់​ការពារ​សិទិ្ធ​កម្ពុជា បាន​ថ្លែង​កាល​ពី​ម្សិលមិញ​ថា គណបក្ស​ប្រឆាំង​អាច​បាត់​បង់​អាសនៈ ប្រសិន​បើ​ខ្លួន​ពិត​ជា​លះបង់​អាសនៈ​នោះ ឬ​ប្រព្រឹត្ត​ខុស​ដល់​កម្រិត​ដែល គ.ជ.ប ដក​បេក្ខភាព​របស់​គណបក្ស​នេះ។

លោក​បាន​ថ្លែង​ថា៖ «[ការ​ធ្វើ​ពហិការ​មិន​ចូល​រួម​រដ្ឋសភា​] មិន​មាន​ន័យ​ថា លះបង់​អាសនៈ​ទេ។ ប្រសិន​បើ​គេ​ប្រកាស​ថា ខ្ញុំ​មិន​ចង់​បាន​អាសនៈទាំង​នេះ​ទេ នោះ​ទើប​ជា​ការ​លះបង់​អាសនៈ»។

លោក បាន​បន្ថែម​ថា ចំណុច​នេះ​គឺ​បាន​ចែង​ច្បាស់​គ្រប់​គ្រាន់​ក្នុង​ច្បាប់​។ «ប្រហែល [លោក ហ៊ុន សែន] ព្យាយាម​បក​ស្រាយ​ច្បាប់​ដោយ​អត្ថន័យ​ចង្អៀត»។

បន្ទាប់​ពី​ការ អត្ថាធិប្បាយ​របស់​លោក នាយក​រដ្ឋ​មន្រ្តី កាល​ពី​ថ្ងៃ​សុក្រ លោក សុក សំអឿន បាន​បញ្ជាក់​ថា អាសនៈ​ចំនួន ១២០ នៃ ១២៣ អាសនៈ គឺ​ត្រូវ​ការ​ជា​ចាំ​បាច់ ដើម្បី​ចាប់​ផ្តើម​រដ្ឋសភា​ថ្មី។ លោក​បន្ត​ថា វិសោធនកម្ម​រដ្ឋធម្មនុញ្ញ​ឆ្នាំ ២០០៦ អនុញ្ញាត​ឲ្យ​បង្កើត​រដ្ឋាភិបាល​ថ្មី ដោយ​មាន​វត្តមាន​តំណាង​រាស្រ្ត ៦៣ រូប​ជា​អ្វី​ដែល​លោក ហ៊ុន សែន បាន​លើក​ឡើង ប៉ុន្តែ រដ្ឋសភា​ត្រូវ​តែ​ចាប់​ផ្តើម​ដោយ​មាន​សមាជិក ១២០ នាក់​ឬ​ច្រើន​ជាង​នេះ ដើម្បី​អនុម័ត​ការ​ចាប់​ផ្តើម​នៃ​រដ្ឋសភា​ថ្មី។

លោក ហ៊ុន សែន បាន​ថ្លែង​សុន្ទរកថា​មួយ​ថ្ងៃ​បន្ទាប់​ពី​លោក​បាន​ជម្រាប​លោក​ស្រី Bu Jianguo ឯក​អគ្គ​រដ្ឋ​ទូត​ចិន​ដែល​តែង​តាំង​ថ្មី​ថា គណបក្ស​សង្គ្រោះ​ជាតិ​មិន​អាច​រារាំង​ការ​ប្រជុំ​ដំបូង​របស់​រដ្ឋសភា​ឬ ការ​បង្កើត​រដ្ឋាភិបាល​បាន​ឡើយ​»។ នេះ​បើ​តាម​លោក អ៊ាង សុផល្លែត អ្នក​នាំ​ពាក្យ​របស់​លោក ហ៊ុន សែន​បាន​ឲ្យ​ដឹង។

គ.ជ.ប មិន​ទាន់​ចេញ​ផ្សាយ​លទ្ធផល​បោះឆ្នោត​ជា​ផ្លូវ​ការ​នៅ​ឡើយ​ទេ ប៉ុន្តែ គណបក្ស​កាន់​អំណាច​បាន​អះអាង​ពី​ជ័យជម្នះ​ដោយ​ទទួល​បាន ៦៨ អាសនៈ ទល់​នឹង ៥៥ អាសនៈ ជា​តួលេខ​គាំទ្រ​ដោយ​តួលេខ​ផ្លូវ​ការ​បឋម។

គណបក្ស​ប្រឆាំង​ក៏​បាន​អះអាង​ថា ខ្លួន​បាន​ឈ្នះ​ផង​ដែរ ហើយ​បាន​ស្នើ​ឲ្យ​មាន​ការ​ស៊ើប​អង្កេត​រួម​លើ​ភាព​មិន​ប្រក្រតី​នៃ​ការ​បោះឆ្នោត។ ខណៈ​ដែល​ការ​ពិភាក្សា​អំពី​ការ​ស៊ើប​អង្កេត​បាន​បន្ត​កាល​ពី​ម្សិលមិញ លោក យឹម សុវណ្ណ អ្នក​នាំ​ពាក្យ​គណបក្ស​សង្គ្រោះ​ជាតិ​បាន​ថ្លែង​ថា គ្មាន​ប្រការ​ក្នុង​ច្បាប់​ចែង​ថា អាសនៈ​របស់​គណបក្ស​ប្រឆាំង​អាច​រឹប​អូស​យក ហើយ​ប្រគល់​ទៅ​ឲ្យ​គូ​ប្រជែង​ឡើយ។

លោក​បន្ត​ថា ៖«ប្រសិន​បើ​យើង​មិន​លះ​បង់​អាសនៈ​ទេ គ្មាន​អ្នក​ណា​អាច​យក​ពី​យើង​ឡើយ។ ប្រសិន​បើ​គេ​យក​អាសនៈ​យើង នោះ​គឺ​ខុស​ច្បាប់»។

ស្រប​ច្បាប់ ឬ​មិន​ស្រប​ច្បាប់​ក៏​ដោយ អ្នក​វិភាគ​បាន​កត់​សម្គាល់​ថា ច្បាប់​បោះឆ្នោត និង​រដ្ឋធម្មនុញ្ញ​មិន​ត្រូវ​បាន​គោរព​ទេ ដោយ​រំលោភ​បនិ្តច​បន្តួច ថែម​ទាំង​បាន​កែប្រែ​ពី​មុន​មក​ផង។

ក្នុង​ករណី​នេះ លោក កែម ឡី អ្នក​វិភាគ​ឯករាជ្យ បាន​ព្យាករ​ថា រដ្ឋាភិបាល​ឆ្លាត​ណាស់ គឺ​មិន​អនុវត្ត​អ្វី​ដែល​ខ្លួន​បាន​គំរាម ប៉ុន្តែ វា​មិន​អាច​ទេ ដែល​គណបក្ស​កាន់​អំណាច​នឹង​កាន់​អាសនៈ​ទាំង ១២៣ នោះ។

លោក បាន​ថ្លែង​ថា៖ «ខ្ញុំ​គិត​ថា នេះ​គ្រាន់​តែ​ជា​សំឡេង​របស់​ពួកគេ បើ​ទោះ​ជា​ពួកគេ​អាច ពួកគេ​ឆ្លាត​វៃ​មិន​ធ្វើ​បែប​នោះ​ទេ។ គេ​នឹង​មិន​ធ្វើ​ទេ គឺ​វា​ផ្ទុយ​នឹង​គោល​គំនិត [ប្រជាធិបតេយ្យ​សេរី​របស់] រដ្ឋធម្មនុញ្ញ»។

លោក គល់ បញ្ញា នាយក​ប្រតិបតិ្ត​នៃ​អង្គការ ខុម ហ្វ្រែល ដែល​ឃ្លាំ​មើល​ការ​បោះឆ្នោត​នៅ​កម្ពុជា បាន​ថ្លែង​ថា លោក​ចាត់​ទុក​បញ្ហា​នេះ​ជា​ភាព​ស្រប​ច្បាប់​នៃ​នយោបាយ​ច្រើន​ជាង​ការ​បកស្រាយ​ច្បាប់​របស់​គណបក្ស​ធំៗ។

លោក​បន្ត​ថា៖ «ពួកគេ​គួរ​ពិនិត្យ​បន្ថែម​ទៀត​លើ​ផល​ប្រយោជន៍​ជាតិ។ បើ​មិន​ដូច្នោះ​ទេ ពួកគេ​នឹង​បន្ត​វិវាទ​នេះ​»។

លោក​បន្ថែម​ថា៖ «​ខ្ញុំ​គិត​ថា គេ​គួរ​ពិនិត្យ​លើ​ភាព​ស្រប​ច្បាប់​ខាង​នយោបាយ​ត្រង់​ចំណុច​នេះ ... អ្នក​មាន​គណបក្ស​ប្រជាជន​ដែល​ប្រកាស​ថា គេ​នឹង​យក​អាសនៈ​គណបក្ស​ប្រឆាំង និង​កាន់​កាប់​ទាំង ១២៣ អាសនៈ​។ ប៉ុន្តែ ទាំង​សង​ខាង​ត្រូវ​ការ​ចរចា ... ចាំ​បាច់​ត្រូវ​មាន​កំណែ​ទម្រង់​ច្រើន»។

លោក យឹម សុវណ្ណ មក​ពី​គណបក្ស​សង្គ្រោះ​ជាតិ បាន​យល់​ស្រប​ថា ឆន្ទៈ​របស់​ប្រជាជន​គួរ​កំណត់​ថា តើ​អ្វី​នឹង​កើត​ឡើង​ពី​ចំណុច​នេះ​ត​ទៅ។

លោក​បន្ត​ថា៖ «សូម​សួរ​ប្រជាជន ថា​តើ​គេ​យល់​ស្រប​នឹង [គណបក្ស​ប្រជាជន​កាន់​កាប់​ទាំង ១២៣ អាសនៈ​ឬ​យ៉ាង​ណា] ករណី​ល្អ​បំផុត គឺ​ការ​ស៊ើប​អង្កេត​។ គ.ជ.ប ជា​ផ្នែក​នៃ​បញ្ហា ហើយ​យើង​អញ្ជើញ​អង្គការ​សហ​ប្រជាជាតិ និង​អង្គការ​សង្គម​ស៊ីវិល​ដើម្បី​ចូល​រួម»។

ក្នុង​ការ​បោះឆ្នោត លើក​មុន ការ​គំរាម​ធ្វើ​ពហិការ​នៅ​តែ​បន្ត​ធ្វើ បន្ទាប់​ពី​គណបក្ស សម រង្ស៊ី ឈាន​ដល់​ការ​ព្រម​ព្រៀង​ជាមួយ​នឹង​គណបក្ស​ប្រជាជន ដើម្បី​«ផល​ប្រយោជន៍​ជាតិ​»។

អ្នក​វិភាគ ដូច​ជា លោក​ស្រី Laura Thornton នាយក​វិទ្យាស្ថាន​ជាតិ​ប្រជាធិបតេយ្យ បាន​ថ្លែង​ថា ដោយ​លទ្ធផល​ប្រកៀក​គ្នា​បែប​នេះ ការ​តវ៉ា​ខ្លាំង​ពី​គណបក្ស​សង្គ្រោះ​ជាតិ គឺ​មាន​ន័យ ចំណែក​ឯ​លោក យឹម សុវណ្ណ បាន​ថ្លែង​ថា គណបក្ស​ប្រឆាំង​មិន​ចាប់​អារម្មណ៍​លើ​ការ​ពិភាក្សា​បែង​ចែក​អំណាច​ជាមួយ នឹង​គណបក្ស​ប្រជាជន​ទេ។

លោក​បន្ត​ថា ការ​ធ្វើ​ពហិការ​មិន​ចូល​រួម​ក្នុង​រដ្ឋសភា មិន​មែន​ជា​អ្វី​ដែល​គណបក្ស​សង្គ្រោះ​ជាតិ​ផ្តោត​លើ​ទេ។

លោក​បាន​បន្ថែម​ថា៖ «យើង​រង់​ចាំ​មើល ខ្ញុំ​មិន​ចង់​និយាយ​ថា ប្រសិន​បើ​នោះ​ទេ»៕ TK

អត្ថបទគួរចាប់អារម្មណ៍

  • ភ្នំពេញៈ ប្រទេស​ កាតា បាន​ចុះ​អនុស្សរណៈ​ជាមួយ​ក្រសួង​អប់រំ យុវជន និង​កីឡា​លើ​គម្រោង​អភិវឌ្ឍន៍​ដើម្បី​កុមារ​ដំណាក់កាល​ទី​២ ដោយ​ផ្ដល់​មូលនិធិ​ជា​ថវិកា​ជាង​ ១៣ ​លាន​ដុល្លារ​អាមេរិក ដើម្បី​រួមចំណែក​ពង្រឹង​វិស័យ​អប់រំ​កម្ពុជា​ដោយ​ផ្ដោតលើ​កុមារ​ងាយ​រងគ្រោះ​ក្នុង​ការសិក្សា​នៅ​កម្រិត​បឋមសិក្សា ស្របតាម​គោលដៅ​អភិវឌ្ឍន៍​ប្រកប​ដោយ​ចីរភាព​ឆ្នាំ​ ២០៣០​។

  • ភ្នំពេញៈ ក្រុមហ៊ុន Asiatic Group (Holdings) Ltd ដែលមាន​មូលដ្ឋាន​នៅ​ប្រទេស​សិង្ហបុរី​កំពុង​ស្វែងរក​ការទាមទារ​ទឹកប្រាក់​ចំនួន​ ១៤,៤ ​លាន​ដុល្លារ​ ពី​ក្រុមហ៊ុនតំបន់​សេដ្ឋកិច្ច​ពិសេស​ភ្នំពេញ (PPSP) ​ដែល​ចុះបញ្ជី​នៅ​ក្រុមហ៊ុន​ផ្សារមូលបត្រ​កម្ពុជា (CSX) ចំពោះ​ការចោទប្រកាន់​ដែល​ថា​បាន​រំលោភ​លើ​កិច្ចព្រមព្រៀង​វិនិយោគ​រួម (JV) នៃ​រោងចក្រ​ថាមពល​មួយ​។

  • ភ្នំពេញៈ មន្ត្រី​នៃ​ក្រសួង​ការងារ និង​បណ្តុះបណ្តាល​វិជ្ជាជីវៈ​បាន​អះអាង​ថា កម្ពុជា និង​សិង្ហបុរី​បាន​ប្តេជ្ញា​បន្ត​កិច្ចសហការ​គ្នា​ឱ្យ​កាន់តែ​រឹងមាំ​ថែមទៀត ក្នុង​ការពង្រីក​លើ​វិស័យ​ការងារ និង​បណ្តុះបណ្តាល​ធនធាន​មនុស្ស​របស់​កម្ពុជា​ជាពិសេស​នៅក្នុង​បរិបទ​នៃ​ជំងឺ​​កូវីដ ​១៩​។

  • ភ្នំពេញ៖ ត្រឹមតែ​រយៈពេល ​១០ ​ខែ​ ភោជនីយដ្ឋាន ​Uncle Fu បាន​ធ្វើ​ឱ្យ​ភ្ញៀវ​​ចម្រុះ​ជាតិ​សាសន៍​ជាប់​ចិត្ត​នឹង​រសជាតិ​​ម្ហូប​ម៉ាឡេស៊ី​ និង​សិង្ហបុរី​។

  • កំពតៈ រោងចក្រ​ផលិត​ឥដ្ឋ​ដ៏ធំ​មួយ​ក្នុង​ខេត្តកំពត ដែល​មាន​ទុនវិនិយោគ ៩ ​លាន​ដុល្លារ​ជា​ការវិនិយោគ​រួមគ្នា​រវាង​វិនិយោគិន​ក្នុងស្រុក និង​វិនិយោគិន​មកពី​ប្រទេស​ចិន​បាន​សម្ពោធ​បើក​ដំណើរការ​ជា​ផ្លូវការ​ហើយ​កាលពី​ថ្ងៃអាទិត្យ ដោយ​អាចមាន​សមត្ថភាព​ផលិត​ឥដ្ឋ​បាន​ប្រមាណ ៨០ ​ម៉ឺន​ដុំ​ក្នុង​ ១ ​ថ្ងៃ​។

  • ភ្នំពេញៈ អគ្គស្នងការរង​នគរបាល​ជាតិ លោក ស ថេត ជំរុញ​ឱ្យ កងកម្លាំង​ប្រដាប់អាវុធ និង​មន្ត្រីរាជការ​ត្រូវ​ធ្វើជា​គំរូ​ដ៏ល្អ​សម្រាប់​ប្រជាពលរដ្ឋ​ទូទៅ​ក្នុង​ការគោរព​ច្បាប់​ចរាចរណ៍​នៅលើ​ដងផ្លូវ ដោយ​លោក​ប្រាប់​ឱ្យ​មន្ត្រី​នគរបាល​ចរាចរណ៍​កុំ​ភ័យខ្លាច​ក្នុង​ការអនុវត្ត​ច្បាប់​លើ​មន្ត្រី​ជាន់ខ្ពស់​ណា​ដែល​ប្រព្រឹត្ត​ខុស ខណៈ​ការបើកបរ​ល្មើសច្បាប់​នៅតែ​ជា​បញ្ហា​សម្រាប់​កម្ពុជា​។