.jpg)
កញ្ញា សុទ្ធនិស្ស័យ កញ្ញាឯកផែនដីកម្ពុជាឆ្នាំ ២០២០ នឹងចូលរួមការប្រកួតអន្តរជាតិ Miss Earth 2020 នៅចុងឆ្នាំ។ ស្រីស្រស់ ហេង សុទ្ធនិស្ស័យ កញ្ញាឯកផែនដីតំណាងកម្ពុជាឆ្នាំ ២០២០។ រូប សហការី
ភ្នំពេញ៖ ដោយសារធ្លាប់មានបទពិសោធន៍ស្រាប់ក្នុងការប្រកួតបវរកញ្ញារួមផ្សំសមត្ថភាពភាសា រូបសម្រស់ និងចំណេះដឹងផងនោះ ទើបស្រីស្រស់កញ្ញាឯកផែនដីតំណាងឱ្យកម្ពុជាឆ្នាំ ២០២០ កញ្ញា ហេង សុទ្ធនិស្ស័យ ហាក់មានសុទិដ្ឋិនិយមប្រកបដោយភាពជឿជាក់ សម្រាប់ភារកិច្ចរបស់ខ្លួនក្នុងការចូលរួមប្រកួតកញ្ញាឯកផែនដី Miss Earth 2020 ដែលមានចំនួន ៧១ ប្រទេសទូទាំងពិភពលោកនៅថ្ងៃទី ២៩ ខែ វិច្ឆិកា ចុងឆ្នាំ ២០២០ នេះ។
ស្រីស្រស់កញ្ញាឯកផែនដីកម្ពុជាឆ្នាំ ២០២០ (Miss Earth Cambodia 2020) កញ្ញា ហេង សុទ្ធនិស្ស័យ ដែលជាអតីតកញ្ញាឯក Miss University 2016 ចំណាត់ថ្នាក់លេខ ២ និងធ្លាប់បានចូលរួមប្រកួតកម្មវិធី Miss Cosmopolitan World 2016 នៅប្រទេសម៉ាឡេស៊ី ដោយទទួលបានពាន ២ គឺពាន Best in talent & ពាន Best Eyebrows។
ចំណែកឯការសិក្សាវិញកញ្ញា ហេង សុទ្ធនិស្ស័យ ទើបតែបានបញ្ចប់ការសិក្សាផ្នែកទំនាក់ទំនងអន្តរជាតិនៅសាកលវិទ្យាល័យ Bridgewater State University នៅក្នុងរដ្ឋម៉ាសេជូសេត សហរដ្ឋអាមេរិកកាលពីឆ្នាំ ២០១៩ កន្លងមក សម្រាប់កម្មវិធីផ្លាស់ប្តូរនិស្សិត (Exchange Program) ហើយកញ្ញាក៏ជានិស្សិតរៀនជំនាញទំនាក់ទំនងអន្តរជាតិនៅសាកលវិទ្យាល័យបញ្ញាសាស្រ្តនៅប្រទេសកម្ពុជា ខណៈសមត្ថភាពភាសាបរទេសវិញ គឺកញ្ញាក៏អាចនិយាយភាសាអង់គ្លេសបានយ៉ាងស្ទាត់ជំនាញដូចភាសាកំណើត។
ស្រីស្អាតសម្បុរស្រអែម មានកម្ពស់ ១,៧០ ម៉ែត្រ កញ្ញា ហេង សុទ្ធនិស្ស័យ ដែលធ្លាប់បម្រើការងារជាមន្ត្រីផ្នែកទំនាក់ទំនងនៃអង្គការក្រៅរដ្ឋាភិបាលមួយ និងធ្លាប់បម្រើការងារជាជំនួយការក្រុមអាកាសយានិកក្រុមហ៊ុនមួយកាលពីឆ្នាំ ២០១៧។
កញ្ញា សុទ្ធនិស្ស័យ ក៏បានសម្តែងពីអារម្មណ៍សុទិដ្ឋិនិយមក្រោយពីបានក្លាយជាកញ្ញាឯកផែនដីប្រចាំឆ្នាំ ២០២០ តំណាងឱ្យកម្ពុជា និងមានក្តីរំពឹងសម្រាប់ការចូលរួមប្រកួតមានលក្ខណៈពិភពលោកចុងឆ្នាំនេះដែរថា៖ «នាងខ្ញុំរំភើបចិត្តខ្លាំង ជាមួយអ្វីដែលជាបទពិសោធ និងការត្រៀមទទួលយកអ្វីដែលថ្មី ដើម្បីការផ្លាស់ប្តូរ។ ដូច្នេះហើយ នាងខ្ញុំនឹងមានឱកាសសម្រាប់ផ្សព្វផ្សាយទៅកាន់ពិភពលោកឱ្យកាន់តែស្គាល់ និងបានយល់ដឹងអំពីប្រទេសកម្ពុជា ជាមិនខានឡើយ។
ដោយឡែកក្រៅពីបានជាប់ជាតំណាងកញ្ញាឯកផែនដីឆ្នាំ ២០២០ នេះ កញ្ញា ហេង សុទ្ធនិស្ស័យ ក៏លេចឮថា នាងកំពុងត្រៀមខ្លួនចូលរួមប្រកួតប្រជែងកម្មវិធីអន្តរជាតិមួយទៀតដែរ គឺកម្មវិធីកញ្ញាឯកចក្កវាឡកម្ពុជាប្រចាំឆ្នាំ ២០២០ Miss Universe Cambodia ខណៈក្រៅពីនេះគេក៏ឃើញមានប្រិយមិត្តគាំទ្រនាងបានស្នើឱ្យចូលរួមកម្មវិធីប្រកួតផ្សេងៗទៀតរួមមានដូចជាកម្មវិធី Miss supranational 2021 កម្មវិធី Miss intercontinental 2021 កម្មវិធី Miss ECO internasional 2021 កម្មវិធី Miss United continent 2021 និងកម្មវិធី Miss Globe 2021 ជាដើម៕
