ភ្នំពេញ៖ ថ្មីៗនេះស្រាប់តែលេចឮថា តារាចម្រៀងស្រីស្រស់រាងល្អិត ដែលកំពុងតែជ្រកនៅក្រោមទ្រនំផលិតកម្ម 7 Seven Music Production កញ្ញា គង់ ចាន់រដ្ឋា និងគូដណ្តឹងជាតារាចម្រៀងប្រុសក្នុងចំណោមបងប្អូនភ្លោះក្រុម Twin Boy ឈ្មោះលោក ស៊ិន សុភា នោះមិនទាន់មានគម្រោងចូលរោងការឆាប់ៗនោះទេ ក្រោយពីពួកគេបានភ្ជាប់ពាក្យរួចប៉ុន្មានឆ្នាំមកហើយនោះ។
មុននេះបន្តិចតារាចម្រៀងស្រីឈរមុខនៅទ្រនំផលិតកម្ម 7Seven Music Production កញ្ញា គង់ ចាន់រដ្ឋា ដែលបានប្រឡូកក្នុងវិស័យសិល្បៈជាង ១០ ឆ្នាំមកហើយនេះ បានបំភ្លឺរឿងទំនាក់ទំនងស្នេហា និងព័ត៌មានគេថា នាងជិតចូលរោងការ ដោយបានបកស្រាយថា៖ «តាមពិតនោះនាងមានគូដណ្តឹងរួចហើយគាត់ គឺជាបុរសម្នាក់ក្នុងចំណោមកូនភ្លោះ Twin Boy ឈ្មោះ ស៊ិន សុភា ដែលមានការងារជាប៉ូលិសអន្តរាគមន៍ ខណៈប្អូនប្រុសរបស់គាត់ គឺលោក ស៊ិន សុភ័ក្ត្រ គឺជាប៉ូលិសចរាចរណ៍។ ពួកយើងបានភ្ជាប់ពាក្យសិន តែមិនទាន់មានគម្រោងរៀបការឆាប់ៗនៅឡើយនោះទេ គឺពួកយើងចង់ទុកឱកាសរកប្រាក់លើវិថីសិល្បៈមួយរយៈទៀតសិន»។
ដោយឡែកគូដណ្តឹងកញ្ញា គង់ ចាន់រដ្ឋា គឺតារាចម្រៀងជាមន្រ្តីប៉ូលិសលោក ស៊ិន សុភា បានអះអាងនាពេលថ្មីៗនេះថា៖«ខ្ញុំបានភ្ជាប់ពាក្យជាមួយ រដ្ឋា ៥ ឆ្នាំមកហើយ ប៉ុន្តែពេលនេះ យើងមិនទាន់បានរៀបការទេ ដោយសារតែគិតថាមិនអីទេ គ្មានការប្រែប្រួលទេ ព្រោះអីយើងស្រឡាញ់គ្នាស្មោះសឹងអី។ ប៉ុន្ដែខ្ញុំសន្យាថា នៅឆ្នាំ ២០២៥ ខាងមុខនេះ ខ្ញុំនឹងរៀបការជាមួយគាត់ទៅតាមប្រពៃណីខ្មែរត្រឹមត្រូវ មិនមែនភ្ជាប់ពាក្យហើយចោលមិនរៀបការទេ»។
ការពិតទៅតារាចម្រៀងស្រី ដែលមានស្រុកកំណើតមកពីខេត្តសៀមរាបនាពេលបច្ចុប្បន្នមានវ័យ ៣២ ឆ្នាំកញ្ញា គង់ ចាន់រដ្ឋា បានបង្កាត់ភ្លើងស្នេហ៍ និងភ្ជាប់ពាក្យជាមួយគ្នារួចហើយ ដោយមានចាស់ទុំសងខាង ក៏បានដឹងឮរឿង សម្ព័ន្ធស្នេហ៍របស់ពួកគេទាំង ២ នេះដែរ៕