.jpg)
បទចម្រៀង ៦៩ បទរបស់កញ្ញា តន់ ចន្ទសីម៉ា មានចំនួនអ្នកមើលសរុប ៤៤១ លានដង។ រូបថត ហ្វេសប៊ុក
ភ្នំពេញ៖ ក្រោយពីសម្រុកចេញបទចម្រៀងជាហូរហែច្រើនបទ សឹងតែគ្មានពេលសម្រាកនោះ ស្រាប់តែពេលថ្មីៗនេះ ផលិតកម្មហ្គាឡាក់ស៊ីណាវ៉ាត្រា បង្ហើបរឿងភ្ញាក់ផ្អើលមួយ ដែលជាសមិទ្ធផលល្អសម្រាប់តារាចម្រៀងស្រីតូចច្រឡឹងសំឡេងធ្ងន់ កញ្ញា តន់ ចន្ទសីម៉ា ដែលមានភាពលេចធ្លោខ្លាំងមិនធ្លាប់មានក្នុងអាជីពសិល្បៈ។
នេះបើតាមគេហទំព័រផ្លូវការរបស់ផលិតកម្មបានបង្ហោះសារដ៏គួរភ្ញាក់ផ្អើលជាទិន្នន័យសរុបចំនួនអ្នកមើលបទចម្រៀងកញ្ញា តន់ ចន្ទសីម៉ា មាន ៦៩ បទ ទាំងច្រៀងទោល និងច្រៀងគូនោះថា៖ «តន់ ចន្ទសីម៉ា មានអ្នកមើលសរុបរហូតដល់ទៅ ៤៤១ លានដង ពិតជាមិនគួរឱ្យជឿដែលតារាចម្រៀងវ័យក្មេង តន់ ចន្ទសីម៉ា ប្រើពេលមិនដល់ ១ ឆ្នាំ អាចបានលទ្ធផលបែបនេះ ភាពប្រែប្រួលនៃសិល្បៈនៃទសវត្សរ៍ថ្មីបានបញ្ជាក់ឱ្យឃើញថា ប្រជាប្រិយភាពពិតរបស់តារាចម្រៀង គឺស្ថិតនៅលើសមត្ថភាពការតស៊ូការព្យាយាម អត់ធ្មត់ និងអត្តចរិតល្អក្នុងការងារ។ តន់ ចន្ទសីម៉ា ស្ទើរតែគ្មានពេលសម្រាប់ខ្លួនឯង គឺបានផ្ដល់ឱ្យការងារស្ទើរតែទាំងស្រុង ពិតជាគួរឱ្យស្ងើចសរសើរនឹងការប្រឹងប្រែងតស៊ូរបស់គាត់ណាស់។ ហើយលទ្ធផលដ៏ល្អមួយនេះ ក៏សូមអរគុណ ជាពិសេសដល់បងប្អូន ពុកម៉ែ មាមីង ដែលគាំទ្រទាំងអស់ទូទាំងប្រទេសកម្ពុជា ក៏ដូចជាបងប្អូនខ្មែរនៅក្រៅស្រុកផងដែរ។ ចំពោះ តន់ ចន្ទសីម៉ា ក៏ដូចក្រុមការងាររបស់ផលិតកម្ម Galaxy Navatra ទាំងមូលនឹងខិតខំបន្តទៀត»។
ថ្លែងពីអារម្មណ៍ត្រេកអរពិតៗចេញពីបេះដូង តន់ ចន្ទសីម៉ា ក៏តបសារដឹងគុណវិញថា៖ «អរគុណជាពិសេស ដល់ពុកម៉ែ បងប្អូន ដែលគាំទ្រនាងខ្ញុំទើបមានលទ្ធផលនេះកើតឡើង ហើយក៏អរគុណដល់ផលិតកម្ម Galaxy Navatra ព្រមទាំងថ្នាក់ដឹកនាំ និងបុគ្គលិកគ្រប់ជាន់ថ្នាក់ ដែលបានខិតខំសម្រាប់នាងខ្ញុំ។ ខ្ញុំមានតែម្រាមដៃ ១០ សំពះអរគុណពុកម៉ែ បងប្អូនដែលគាំទ្រនាងខ្ញុំដោយទឹកចិត្ត និងបេះដូង»។
គួររំឭកដែរថា តន់ ចន្ទសីម៉ា តារាចម្រៀងស្រីវ័យ ២២ ឆ្នាំ មានស្រុកកំណើតនៅខេត្តតាកែវ កំពុងតែឡើងកូដខ្លាំងតាំងដើមឆ្នាំ ២០២០ ពេលចូលមកផលិតកម្មហ្គាឡាក់ស៊ី ដោយបានចេញបទចម្រៀងថ្មីៗច្រើនបន្តបន្ទាប់ ខណៈបទនីមួយៗ ទាំងច្រៀងទោល និងច្រៀងគូនោះ មិនមានបទណាមានចំនួនអ្នកមើលតិចជាង ១ លានដង (1 M) ឡើយ។
ជាក់ស្តែងបទ «ដណ្តឹងអូនទៅ» ច្រៀងទោលនោះ ស្រូបបានអ្នកគាំទ្រដល់ទៅ ៥.៦ លានដង (5.6 M Viewer) ក្នុងរយៈពេលតែជាង ៣ សប្តាហ៍ និងចុងក្រោយបទនេះ មានចំនួនអ្នកមើលដល់ ២៨ លានដង (28 M Viewer) នៅតាមបណ្តាញយូធូប៕
