ភ្នំពេញ៖ ខណៈតារាស្រីមានវ័យស្របាលៗគ្នាបាននាំគ្នាសម្រុកចូលរោងជ័យចុងឆ្នាំ ២០១៩ នេះ ជាបន្តបន្ទាប់មកនោះ ស្រាប់តែតារាស្រីមុខញញឹម ម៉ាក់ សែនសូនីតា ហៅ តូតា ក៏បង្ហាញរូប Pre-Wedding ជាមួយគូស្នេហ៍លោក ប៉ុល វិបូ ជាច្រើនសន្លឹក ដែលគ្រោងនឹងដឹកដៃចូលរោងជ័យនៅដើមឆ្នាំ ២០២០ នេះហើយ។
ក្រោយពីចំណងស្នេហ៍រវាងតារាសម្តែងស្រីស្រស់កញ្ញា តូតា និងពាណិជ្ជករខ្មែរទ្រព្យស្តុកលោក ប៉ុល វិបូ បានសុសសាយពេញពិភពនៃសិល្បៈតាមរយៈការពួតដៃគ្នាបើកមុខជំនួញនានាដូចជាអាហារដ្ឋានឈ្មោះ ថា «ផែសមុទ្រ» នៅក្រុងភ្នំពេញ ដំណើរការបានច្រើនសាខាហើយបន្តសហការបើករីសតថ្មីសន្លាងនៅទឹកដីខេត្តកំពត និងខេត្តកំពង់ស្ពឺ បង្កការភ្ញាក់ផ្អើលផ្ទួនៗទៅដល់មហាជន។
ទោះបីគេមិនទាន់ដឹងច្បាស់ពាក់ព័ន្ធនឹងរឿងថ្ងៃពិតប្រាកដនៃថ្ងៃចូលរោងជ័យមង្គលរបស់តារាសម្តែងស្រីកញ្ញា តូតា និងម្ចាស់ស្នេហ៍លោក ប៉ុល វិបូ នៅឡើយក្រោមហេតុផលសុំលាក់ការណ៍សិន តែថៅកែស្រីវ័យក្មេងជាតារាសម្តែងវ័យ ២៤ ឆ្នាំរូបនេះ ក៏បញ្ជាក់ការពិតនៃដំណឹងរៀបមង្គលការប្រពៃណីនៅដើមឆ្នាំ ២០២០ នេះ។
កញ្ញា តូតា គ្រាន់តែបង្ហើបត្រួសៗពេលសួរបញ្ជាក់ពីរឿងរៀបចំថ្ងៃណា និងផ្តល់ជម្រើស ២ គឺ The Premier Center Sen Sok ឬសណ្ឋាគារសុខាភ្នំពេញ ដែលជាទីកន្លែងសម្រាប់រៀបចំទទួលភ្ញៀវនោះថា៖ «ចំពោះរូបថត Pre-Wedding ទាំងនោះ គឺជាការពិតមែន ខណៈដំណឹងរៀបការរបស់ពួកយើងក៏ពិតដែរ ដើមឆ្នាំ ២០២០ នេះ តែសុំលាក់ទាំងថ្ងៃ និងទីកន្លែងនោះសិន ដោយចង់ឲ្យបងប្អូនបន្តភ្ញាក់ផ្អើលបន្តិចទៀតសិន»។
គេឃើញតារាស្រីល្បីៗដូចជាអ្នកនាង ឱក សុគន្ធកញ្ញា និងអ្នកនាង សួស វីសា បានអញ្ជើញភ្ញៀវចូលរួមពិធីមង្គលការមានច្រើនរាប់រយតុនោះ តែគម្រោងអញ្ជើញភ្ញៀវថ្ងៃមង្គលការកញ្ញា តូតា វិញនាងបានព្រលយឲ្យដឹងថា៖ «ចំណែករឿងចំនួនភ្ញៀវវិញ ប្រហែលជាត្រូវរៀបត្រឹម ៧០ តុតែប៉ុណ្ណោះ ដោយអញ្ជើញទាំងភ្ញៀវជាមិត្តអ្នកសិល្បៈ និងក្រៅសិល្បៈ។ ខ្ញុំមិនបានកំណត់ថា ត្រូវអញ្ជើញអ្នកសិល្បៈប៉ុន្មាន និងមិត្តក្រៅប៉ុន្មាននោះឡើយ គឺអញ្ជើញសរុបតែម្តង»។
គួររំឭកដែរថា តារាសម្តែងស្រីមានបបូរមាត់សិចស៊ី ម៉ាក់ សែនសូនីតា ហៅកញ្ញា តូតា ក្រោយពីបានបង្កាត់ភ្លើងស្នេហ៍ជាមួយនឹងលោក ប៉ុល វិបូ ជាថៅកែផលិតកម្មអង្គរភិចឈ័រ និងបានដាក់ទុនរកស៊ីរួមគ្នាដំបូងលើមុខរបរនៃអាជីវកម្មក្រោមយីហោមួយថា «ផែសមុទ្រ» ដែលពង្រីកសាខាបន្តបន្ទាប់ លក្ខណៈលក់ franchise មិនទាន់អស់ចំហាយល្បីផង ក៏ស្រាប់តែតារាស្រីរូបនេះ បន្តមកផុលផុសនឹងរឿងបើករីសតទៀត មានទីតាំងស្ថិតនៅភូមិតាដិប សង្កាត់អណ្តូងខ្មែរ ក្រុងកំពត ខេត្តកំពត។
លោក ប៉ុល វិបូ ក៏ធ្លាប់បានប្រាប់ភ្នំពេញប៉ុស្តិ៍ឲ្យដឹងនាពេលកន្លងមកដែរថា៖ «តាមពិតទៅ ទីនេះគឺគ្រាន់តែជាការចាប់ផ្តើមបើកនូវការដ្ឋានរៀបចំប្រែក្លាយឲ្យទៅជារីសតតែប៉ុណ្ណោះ យើងមិនទាន់បានរួចរាល់មួយរយភាគរយនោះទេ។ ផ្ទៃដីនៃតំបន់រីសតនេះ មានទំហំចំនួន ៤ ហិកតា ដោយសារវាមានទីតាំងល្អ ស្ថិតនៅភូមិតាដិប សង្កាត់អណ្តូងខ្មែរ ក្រុងកំពត ជាប់ដងព្រែក ហើយក៏អាចជាទីកន្លែងសម្រាប់បោះតង់លេងកម្សាន្តនានាបាន។ ហើយនេះ ក៏ជាការដាក់ភាគហ៊ុនរួមគ្នារវាងខ្ញុំបាទ និងកញ្ញា តូតា បន្ថែមផងដែរ»៕