ភ្នំពេញ៖ អតីតជាបេក្ខនារីប្រកួតឈានដល់វគ្គ Live Show សប្តាហ៍ទី៧ នៃកម្មវិធី X Factor Cambodia រដូវកាលទី១ នៅហង្សមាស កញ្ញា ថាន់ នឿថង នឹងក្លាយជាដៃគូច្រៀងឆ្លើយឆ្លងជាមួយនឹងតារាចម្រៀងប្រុសទើបតែលេចមុខសាជាថ្មីលោក ប៊ុត សីហា នៅរួមទ្រនំផលិតកម្ម Life Production។
កញ្ញា ថាន់ នឿថង នឹងមានទ្រនំផលិតកម្មជ្រកកោន ដូចតារាចម្រៀងផ្សេងៗ សម្រាប់លំនឹងលើវិថីសិល្បៈ ខណៈកញ្ញាជាតារាចម្រៀងស្រីវ័យក្មេង ដែលមហាជនចាប់អារម្មណ៍ និងទទួលស្គាល់អំពីទឹកដមសំនៀងរួចមកហើយ នាពេលប្រឡងចម្រៀងលំដាប់ពិភពលោក គឺកម្មវិធី X Factor Cambodia រដូវកាលទី១ កាលពីឆ្នាំ ២០១៩ កន្លងមក។
ស្រីស្រស់ទើបមានវ័យ ១៨ ឆ្នាំ មានស្រុកកំណើតពីស្រុកភ្នំព្រឹក ខេត្តបាត់ដំបង កញ្ញា ថាន់ នឿថង បង្ហើបពីអារម្មណ៍ផ្ទាល់ខ្លួន ក្រោយពីបានចូលផលិតកម្ម Life Production រួមជាមួយនឹងតារាចម្រៀងរៀមច្បងលោក ប៊ុត សីហា នោះថា៖ «សប្បាយចិត្តខ្លាំង ដោយខ្លួនអាចមានទ្រនំច្បាស់លាស់នឹងគេ សម្រាប់វិថីសិល្បៈ ហើយនាងខ្ញុំបានចុះកិច្ចសន្យារយៈពេល ១ ឆ្នាំជាមួយផលិតកម្ម»។
គួរឱ្យកត់សម្គាល់នោះ កញ្ញា ថាន់ នឿថង ក៏ធ្លាប់ទទួលបាននូវការគាំទ្រខ្លាំង នាពេលបកស្រាយចម្រៀងមនោសញ្ចេតនាយ៉ាងក្រអួនក្រអៅមានចំណងជើងថា «វិហារសួគ៌ជ័យ» ក្នុងកម្មវិធីចម្រៀងគ្រួសារខ្មែរកន្លងមក។
កញ្ញា ថាន់ នឿថង បន្តឱ្យដឹងពីសមត្ថភាពច្រៀងរបស់ខ្លួន ចំពោះការចូលក្នុងវិស័យសិល្បៈនេះថា៖ «នាងខ្ញុំអាចបត់បែន ទៅតាមប្រភេទនានាបាន ពោលគឺអាចច្រៀងបានទាំងបែបបទមនោសញ្ចេតនាផង និងទាំងបទបែបញាក់កន្ត្រាក់អារម្មណ៍ក៏បានដែរ»។
បើតាមលោក ឈួន សុខលីម ជានាយកគ្រប់គ្រងផលិតកម្ម Life Production ក៏បានបង្ហើបឱ្យដឹងអំពីលក្ខណសម្បត្តិរបស់តារាចម្រៀងស្រីរលកក្រោយ តែមានទេពកោសល្យខ្ពស់នោះផងដែរថា៖ «ផលិតកម្មយើងបានសម្រេចចិត្តជ្រើសរើសកញ្ញា នឿថង មកច្រៀងជាមួយនឹងការចុះកុងត្រារយៈពេល ១ ឆ្នាំ ដោយសារយើងមើលឃើញនូវចំណុចពិសេសរបស់គាត់មួយចំនួន។ កញ្ញា ថាន់ នឿថង គាត់មានទឹកដមសំនៀងល្អ ដែលកម្ររកបាន ជាពិសេសនោះ សំឡេងរបស់គាត់គឺអាចចាប់ដៃគូជាមួយនឹងលោក ប៊ុត សីហា បានយ៉ាងសមសួន។ លើសពីនេះ គាត់គឺជាតារាចម្រៀងដែលមិនបានជាប់ពាក់ព័ន្ធនឹងផលិតកម្មផ្សេងៗផងដែរ»។
គួរបញ្ជាក់ផងដែរថា Life Production គឺជាផលិតកម្មមួយ ដែលតែងតែទទួលយកក្រុមតារាចម្រៀងប្រុសស្រីរលកក្រោយដែលមានទេពកោសល្យសិល្បៈ និងមិនទាន់មានជម្រកជ្រកកោននៅឡើយ ហើយអ្វីដែលកាន់តែពិសេសនោះគឺ ផលិតកម្មរមែងប្រមើលមើលចាំត្រងយកតារាចម្រៀង ដែលប្រឡងធ្លាក់កម្មវិធីប្រកួតប្រជែងនានា ខណៈតួយ៉ាងកម្មវិធីប្រឡងប្រជែងនៅឯទូរទស្សន៍ហង្សមាសនាពេលកន្លងមក មានដូចជាកម្មវិធី The Voice Cambodia កម្មវិធី Cambodian Idol និងកម្មវិធី X-Factor Cambodia ជាដើម៕