ភ្នំពេញៈ ខណៈតារាចម្រៀងប្រុសរាងខ្ពស់ស្រឡះ ដែលចេះនិពន្ធទាំងទំនុកច្រៀង និងទំនុកភ្លេងលោក ងួន ចាន់ដេវីត ហៅ G-Devith បានប្រកាសលាឈប់ពីទ្រនំហង្សមាស នៅមិនទាន់អស់ចម្ងល់មហាជនផងនោះ ក៏ស្រាប់តែលេចឮរហៀងៗថា ដៃគូចម្រៀងស្រីពូកែខាងចាក់ក្បាច់រាំគឺកញ្ញា ទេព បូព្រឹក្ស ក៏ទំនងជាលាឈប់ពីទ្រនំហង្សមាសម្នាក់ទៀតដែរ។
នេះបើតាមសារមួយឃ្លាដែលតារាចម្រៀងស្រីជ្រកក្រោមទ្រនំហង្សមាស កញ្ញា ទេព បូព្រឹក្ស បង្ហើរថា៖ «ហើយពួកយើង ក៏នឹងមានអ្វីថ្មីប្លែកឆាប់ៗនេះ! okay let go my red boy» បានបង្កការភ្ញាក់ផ្អើលមួយរឿងទៀត ដែលនេះក៏ទំនងជាត្រូវបាត់មុខតារាចម្រៀងជើងខ្លាំង ២ រូបបន្ថែមរបស់ផលិតកម្មហង្សមាសផងដែរ។
តែយ៉ាងណាពុំទាន់ច្បាស់នៅឡើយទេចំពោះរឿងតារាចម្រៀងស្រី ដែលមហាជនកត់សម្គាល់ថ្មីៗនេះថា នាងកំពុងតែបំប្លែងរាងកាយឲ្យស្រស់ឆើតឆាយ និងសិចស៊ីខុសប្លែកជាងមុនខ្លាំងជាមួយនឹងការកែសម្ផស្ស ដ្បិតតែនាងនៅមានវត្តមានជាតារាចម្រៀងសម្រាប់ការប្រគំតន្ត្រីរបស់ហង្សមាស នៅឡើយដែរ គឺកម្មវិធី Vivo Music Run Glow Concert កាលពីចុងសប្តាហ៍កន្លងមកនេះ។
លើសពីនេះ ភ្នំពេញប៉ុស្តិ៍ក៏ពុំទទួលបានការបកស្រាយច្បាស់លាស់ពីរឿងលាឈប់ពីទ្រនំហង្សមាសទៅតាមលោក ងួន ចាន់ដេវីត ដែរ ឬនៅបន្តនោះទេ គឺ មិនត្រូវបានកញ្ញា ទេព បូព្រឹក្ស បំភ្លឺឡើយ ដោយប្រព័ន្ធទូរស័ព្ទរបស់នាងមិនអាចទំនាក់ទំនងបាន ក្រោយពីនាងបានលើកមួយភ្លែត ហើយក៏បានឆ្លើយទាំងសម្តីបែបនៅងងុយដេក កាលពីពេលថ្ងៃត្រង់ម៉ោង ១២ ថា៖ «សុំទោសផងបង!ចាំម៉ោង ២ ចាំទូរស័ព្ទមកម្តងទៀតបានទេព្រោះថា ពេលនេះ នាងសុំពេលគេងសិន» ក្រោយពីឮពាក្យសួរនាំរឿងដែលល្បីថានាងក៏ត្រូវលាឈប់ពីហង្សមាសដែរមកនោះ។
គួរបញ្ជាក់ថា តារាចម្រៀង ១ គូដែលជាសំណព្វចិត្តយុវវ័យសម័យក្រោយ ទើបតែបានចាប់ដៃគូចម្រៀងជាមួយនឹងគ្នាប្រមាណជិត ២ ឆ្នាំតែប៉ុណ្ណោះ ហើយប្រិយមិត្តគាំទ្រអ្នកទាំង ២ ក៏បានប្រដូចពួកគេទៅនឹងតារាចម្រៀងគូរបស់កូរ៉េខាងត្បូងដែរ គឺកញ្ញា CL និងលោក G-Dragon ខណៈនាង ទេព បូព្រឹក្ស ត្រូវមហាជនខ្មែរហៅថា នាង CL ខ្មែរ ហើយលោក G-Devith ហៅ G-Dragon ខ្មែរ នោះឯង។
ថ្មីៗនេះក៏បង្កការភ្ញាក់ផ្អើលសាជាថ្មីផងដែរពីសម្ព័ន្ធភាពពួកគេទាំង ២ ក្រោយពីលោក ងួន ចាន់ដេវីត បានប្រកាសលាឈប់ពីផលិតកម្មហង្សមាស នោះ ក៏ឃើញកញ្ញា ទេព បូព្រឹក្ស សរសេរផ្អែមល្ហែមអមដោយរូបថតកៀកកើយដូចគូស្នេហ៍នឹងគ្នាមានច្រើនសន្លឹកនោះថា៖ « ២ ឆ្នាំ ហើយក៏រហូតទៅដែរ! ២ ឆ្នាំនេះគឺបុរសម្នាក់នេះមានតែការអត់ឱន អត់ធ្មត់ និងការគោរពក្រុមគ្រួសារខ្ញុំ លើកទឹកចិត្ត កម្លាំងចិត្ត ទោះបីជាផ្លូវដែលដើរនេះវាពិបាកយ៉ាងណាក៏ដោយ ក៏គាត់ថាមិនលំបាកទេ យើងត្រូវរឹងមាំកាន់ដៃគ្នាឲ្យជាប់កុំលែង មិនមែន ១ ថ្ងៃ ២ ថ្ងៃ ឬ ៣ ថ្ងៃទេគឺរហូត ដែលពួកយើងត្រូវដើរជាមួយគ្នា G-Devith!» ៕