.jpg)
តារាម៉ូដែល និងសម្តែងស្រីរលកក្រោយកញ្ញា រចនា រ៉ាវាឌី ទទួលបានកាដូចិញ្ចៀនពេជ្រ ១ វង់ ត្រូវគេសង្ស័យជារបស់បញ្ចាំស្នេហ៍។ រូប ហ្វេសប៊ុក ហុង មិនា
ភ្នំពេញៈ កាលពីថ្ងៃប្រារព្ធខួបកំណើតនាពេលថ្មីៗកន្លងមកនេះ ដែលរំលេចដោយកាដូនំខេក និងចិញ្ចៀនពេជ្រ ១ វង់ដែលស្រីស្រស់តារាម៉ូដែល និងសម្តែងកញ្ញា រចនា រ៉ាវាឌី ទទួលបាននោះក៏ត្រូវមហាជនកើតក្តីមន្ទិលសង្ស័យថាគឺជាចិញ្ចៀនគេជូនជាកាដូបញ្ចាំចិត្តស្នេហ៍។
អ្វីដែលធ្វើមានការសង្ស័យខ្លាំងគឺថានៅថ្ងៃខួបកំណើតក៏ស្រាប់តារាសម្តែងស្រីរាងខ្ពស់កំពុងទទួលបានផ្លែផ្កាល្អនៅក្នុងអាជីពសម្ដែង ជាតារាម៉ូដែល និងជាពិធីការិនីទូរទស្សន៍កញ្ញា រចនា រ៉ាវាឌី បានទទួលនូវកាដូចិញ្ចៀនពេជ្រ ១ វង់ ដាក់ក្នុងប្រអប់មាសទើបមហាជនលើកយកមកជជែកគ្នាពេញបណ្តាញសង្គមថា៖ «កាដូចិញ្ចៀននោះទំនងជាវត្ថុរបស់កន្លង់ណាមួយជូននាង ដើម្បីទុកជាគ្រឿងបញ្ចាំចិត្កទុកភ្ជាប់និស្ស័យនឹងនាងហើយមើលទៅ?»។
ខណៈតារាសម្តែងស្រីដែលបានអភិវឌ្ឍខ្លួនពីតារាបង្ហាញម៉ូដនៅចន្លោះឆ្នាំ ២០១៥-២០១៦ និងបានប្រឡូកចូលការសម្តែងកុនដំបូងជាតួរងស្រីក្នុងរឿង «ភ្លើងស្នេហ៍ភ្លើងឫស្យា» នៃផលិតកម្មទូរទស្សន៍ប៉ុស្តិ៍លេខ ៥ កញ្ញា រចនា រ៉ាវឌី បានឆ្លើយបដិសេធនឹងរឿងកាដូចិញ្ចៀន ដែលខាងមហាជនសង្ស័យថា ជារបស់បញ្ចាំចិត្តនោះផងដែរ។ កញ្ញា រចនា រ៉ាវឌី ថ្លែងប្រាប់ថា៖ «អត់ទេបង!គ្មានអ្នកណាគេជូនកាដូភ្ជាប់និស្ស័យអ្វីនោះទេ។ កាដូទាំងឡាយដែលខ្ញុំទទួលបាននោះមួយចំនួនបានមកពីមិត្តភក្តិ និងខ្លះទៀតគឺជាកាដូពីម្តាយបង្កើតរបស់នាងខ្ញុំគាត់ជូនប៉ុណ្ណោះ គឺមិនមានអ្នកណាគេជូនដូចជាការលើកឡើងពីបងប្អូននោះឡើយ»។
ដោយឡែកចំពោះការងារសិល្បៈរបស់កញ្ញា រចនា រ៉ាវាឌី ដែលជាកូនពៅក្នុងគ្រួសារដោយមានបងប្អូនបង្កើត ២ នាក់ដែលនាងទើបតែមានវ័យ ២០ ឆ្នាំជាតារាស្រីរលកក្រោយ តែក្តោបឱកាសថតកុនភាគបានច្រើនគឺមាន ១០ រឿងមកហើយនៅក្នុងរយៈពេលត្រឹមតែ ៣-៤ ឆ្នាំ ចុងក្រោយតែប៉ុណ្ណោះ ហើយមមាញឹកខ្លាំងនឹងការដើរម៉ូដ និងការថតស្ប៉តពាណិជ្ជកម្មផងដែរ ខណៈពេលថ្មីៗនេះនាងបានសម្រេចចិត្តថាផ្អាកទទួលថតកុនមួយអន្លើសិន។
កញ្ញា រចនា រ៉ាវាឌី តួឯកស្រីក្នុងរឿង «មិត្តឫស្យា» រូបនេះបានបញ្ជាក់ថា៖ «ឥឡូវនេះ ខ្ញុំផ្អាកទទួលថតកុនមួយរយៈសិន ក៏ដោយសារតែមានការមមាញឹករឿងផ្ទាល់ខ្លួន និងដោយសារតែកុនជាច្រើនដែលខ្ញុំបានថតមុនៗនោះនៅមិនទាន់បានចាក់បញ្ចាំងអស់នៅឡើយ។ ដូច្នេះរឿងសម្តែងកុន ខ្ញុំសុំផ្អាកសិន ចាំបញ្ចាំងរឿងចាស់ៗដែលថតពីមុនអស់សិនចាំទទួលបន្តទៀត»។
កញ្ញា រចនា រ៉ាវាឌី បានប្រឡូកចូលសិល្បៈតាំងពីឆ្នាំ ២០១៦ ក្នុងនាមជាតារាម៉ូដែលនៃក្រុម Pop Model និង បានអភិវឌ្ឍខ្លួនមកជាតារាសម្ដែងដោយរឿងដំបូងដែលនាងសម្ដែងមានចំណងជើងថា «ភ្លើងស្នេហ៍ភ្លើងឫស្យា» និងរឿងជាច្រើនមានដូចជារឿង «រនាតឯក» រឿង «ជញ្ជីងជីវិត» រឿង «ម្ចាស់ចម្ការ» រឿង «ផ្កាព្រៃស្រទាប់មាស» ជាដើម៕
