.jpg)
រូបតារាចម្រៀងស្រីកញ្ញា សាសា កាលពីពេលចូលសិល្បៈដំបូង។ អុីនស្តាក្រាម
ភ្នំពេញៈ សូម្បីតែខ្លួនឯងផ្ទាល់នោះ ក៏ងឿងឆ្ងល់ និងស្តាយរូបរាងកាយ ដែលស្រឡូនស្អាត តូចច្រឡឹងគួរឲ្យស្រឡាញ់ ខណៈឥឡូវនេះមានការខុសគ្នាស្ទើរទាំងស្រុង ទើបបង្ហោះនូវសារឡើងថា៖ «អូនធម្មជាតិពីមុនបាត់ទៅណាហើយ!» ផ្អើលនៅតាមបណ្តាញអ៊ីនស្តាក្រាម។
រំពេចនោះដែរក៏ស្រាប់តែមានការលើកឡើងថា៖ «ទំនងជាកញ្ញា សាសា ចង់រំឮករូបកាលពីនៅពេលចូលសិល្បៈដំបូង ឬក៏ចង់ប្រាប់ថានាងជិតវិលមកប្រឡូកសិល្បៈដូចដើមវិញទេដឹង!»។
មួយរយៈមុននេះបន្តិចកញ្ញា សាសា ដែលបានជ្រកកោននៅលើទ្រនំផលិតកម្មថោន យូរក្រែលក្តី តែឆ្នាំថ្មីនេះ កញ្ញា សាសា គ្មានបទចម្រៀងថ្មីដើម្បីចេញបំពេអារម្មណ៍ប្រិយមិត្តនោះឡើយ ខណៈគេនៅមានភាពស្រពេចស្រពិលនៅឡើយថា តើនាងបានលាឈប់ពីថោនព្រោះផុតកុងត្រា ឬក៏ជាប់រវល់ខ្លាំងនឹងការងាររកស៊ីផ្ទាល់ខ្លួន ដែលដកឃ្លាពុំរូចនោះ។
តែតារាចម្រៀងស្រីមានដើមទ្រូងសិចស៊ី ដែលទស្សនិកជនធ្លាប់លួចកោតសរសើរ មិនដែលដាច់ពីមាត់ពីភាពវៃឆ្លាតក្នុងការងារសិល្បៈ និងការងាររកស៊ីគឺកញ្ញា សាសា ដែលបាត់មុខពីសង្វៀនសិល្បៈមួយអន្លើនោះ ប្រាប់ភ្នំពេញប៉ុស្តិ៍ថា៖ «អត់ទេបង!មិនទាន់ហ៊ានសន្យាថា នាងខ្ញុំនឹងត្រូវវិលចូលសិល្បៈវិញនៅពេលណាឲ្យច្បាស់នៅឡើយនោះទេព្រោះថា នាពេលនេះ នាងខ្ញុំកំពុងតែជាប់រវល់នឹងការងាររកស៊ីថ្មី ២ គឺលក់ផលិតផលអាហារសុខភាព ItsColl ដែលសហការនាំមកពីប្រទេសម៉ាឡេស៊ី និងការបើកមុខរបរមួយទៀតគឺហាងម៉ាស្សា ដែលមានអាសយដ្ឋានស្ថិតនៅផ្ទះនាងខ្ញុំផ្ទាល់ នៅឯបុរីពិភពថ្មីចម្ការដូង»។
កញ្ញា សាសា ក៏បានបន្តថា៖ «ចំពោះរបររកស៊ីជាមួយម៉ាឡេស៊ីនេះ នាងខ្ញុំកំពុងតែចចារការងារដែលខាងគេចង់ឲ្យនាងខ្ញុំសហការតាមការដាក់កំណត់គោលដៅលក់ផលិតផលឲ្យច្បាស់លាស់ជាមុនសិនដែរ ខណៈការងារមួយទៀតរឿងបើកហាងម៉ាស្សានោះ គឺនាងខ្ញុំក៏កំពុងតែរត់ការជាបណ្តើរៗហើយដែរ»។
គួររំឭកថា ការឧស្សាហ៍កែខៃសម្ផស្សរបស់កញ្ញា សាសា ក៏ជាចំណែកមួយធ្វើឲ្យមានការចាប់អារម្មណ៍ស្គាល់រូបនាងនៅលើវិថីសិល្បៈផងដែរ ខណៈការបញ្ចប់ការកែសម្ផស្សរបស់នាងក៏ត្រូវបានបញ្ចប់នៅត្រឹមពេលលើកទី ៨ ដែលគ្រូពេទ្យកែសម្ផស្សនៅប្រទេសថៃ ធ្លាប់បានព្រមានឲ្យឈប់កែខៃព្រោះសភាពនៃរូបកាយនាងមើលទៅដូចជាកូនក្រមុំជ័រទៅហើយនោះ។
យ៉ាងណាសាមីខ្លួនក៏ហាក់ដូចជាទទួលស្គាល់ពីភាពប្លែកខ្លាំងនូវរូបសម្ផស្សខ្លួនរួចពីមុន និងបច្ចុប្បន្នទៅហើយដែរ ជាមួយសារខាងលើថា «អូនធម្មជាតិ អូនធម្មជាតិពីមុនបាត់ទៅណាហើយ!» នោះ។
កញ្ញា សាសា ក៏បានរំឭកឲ្យដឹងពីទម្រង់រូបខ្លួនកាលពីចូលសិល្បៈដំបូង ដែលមានរូបរាងដ៏តូចច្រឡឹង និងច្រមុះស្រួច នៅមានគីឡូស្រាលជាងឥឡូវនេះដែរថា៖ «កាលនោះ នាងខ្ញុំថតជាមួយអ៊ុំស្រីម្នាក់ នាងខ្ញុំភ្លេចហើយថាឈ្មោះអ្វី ឬនៅទីណានោះ តែមិនមែនជាប់សាច់ញាតិទេ ហើយរូបថតនោះគឺកាលពីពេលចូលសិល្បៈដំបូង មានទម្ងន់ប្រហែលជាង ៤០ គីឡូ ហើយនៅពេលនេះគឺជាង ៥០ គីឡូ។ ស្តាយរូបរាងកាយខ្លួនឯងកាលពេលនោះដែរហ្នឹងបង ព្រោះនៅមានរាងស្អាត ហើយច្រមុះក៏ស្រួចទៀត ហើយសុខៗក៏ទៅកែច្រមុះខូចអស់រលីងនៅពេលឥឡូវនេះ»។
ចម្ងល់មហាជននៅតែពុំទាន់រកចម្លើយច្បាស់នៅដដែលចំពោះរឿងនាងវិលចូលសិល្បៈវិញពេលណានោះ ដោយសារតារាស្រីរូបនេះក៏បានបង្ហើបទាំងស្រពេចស្រពិលថា៖ «នាងខ្ញុំមិនទាន់ហ៊ានសន្យាថា យ៉ាងម៉េចទេ ខណៈចិត្តក៏ចង់វិលទៅវិញផងដែរ តែដោយសាររវល់នឹងរឿងការងាររកស៊ីពេក ទើបខ្ញុំមិនហ៊ានថានោះ»៕
