ភ្នំពេញៈ ដោយសារតែមានដើមទុនសិល្បៈសម្តែងចាប់តាំងពីខ្លួនមានវ័យ ១៣ ឆ្នាំដែលបានថតស្ប៉តរឿងអប់រំខ្លីឲ្យមជ្ឈមណ្ឌលព័ត៌មានស្ត្រីកម្ពុជានោះ ទើបតារាសម្តែងស្រីពន្លកថ្មីដែលទើបតែល្បីប្រមាណ ៣ ឆ្នាំចុងក្រោយនេះកញ្ញា សិទ្ធី នីកា ហាក់ដូចជាមិនសូវជាមានការលំបាកឡើយនៅក្នុងការសម្តែងភាពយន្តនោះ ហើយមានមហិច្ឆតាចង់ដើរតាមគន្លងសិល្បៈម្តាយមីងខ្លួន ដែលជាតារាសម្តែងស្រីជើងចាស់អ្នកនាង ព្រំ រដ្ឋា ទៀតផង។
ព្រោះតែមានម្តាយមីងជាអ្នកសិល្បៈគឺអ្នកនាង ព្រំ រដ្ឋា ដែលបច្ចុប្បន្នជាម្ចាស់ផលិតកម្ម PR Production ក៏ជាហេតុនាំឲ្យកញ្ញា សិទ្ធី នីកា ប្រឡូកក្នុងវិស័យសិល្បៈតាំងពីវ័យ ១៣ ឆ្នាំមកម្ល៉េះដោយដំបូងឡើយ កញ្ញាសម្តែងក្នុងខ្សែភាពយន្តភាគរឿង «ពូជមួយត្រួយពីរ» កាលពីឆ្នាំ ២០១៨ ហើយក៏ត្រូវបានគេស្គាល់ពីខ្សែភាពយន្តអប់រំខ្នាតខ្លីរឿង «ឪពុកខ្ញុំ» និង រឿង “វេរាស្នេហ៍ឆ្លងភព»។
តារាស្រីទើបមានវ័យ ២០ ឆ្នាំដែលកំពុងតែមានភាពមមាញឹកនឹងការថតទាំងកុន ថត MV ចម្រៀងឲ្យផលិតកម្មនានាដូចជាថោន និងសាន់ដេ ជាដើម និងថតស្ប៉តពាណិជ្ជកម្មនានានោះក៏បង្ហើបអំពីចំណាប់អារម្មណ៍ទៅថ្ងៃមុខដើរនៅលើវិថីសិល្បៈសម្តែងនេះផងដែរថា៖ «ចំពោះសិល្បៈសម្តែងនេះគឺនាងខ្ញុំនៅតែចាប់អាជីពនេះដដែលគឺមិនចង់បោះបង់នោះឡើយ។ ហើយក៏ចង់មានភាពជោគជ័យនៅលើវិថីនេះទៅពេលអនាគតផងដែរ»។
តាមការចាក់ផ្សាយនៅលើកញ្ចក់ទូរទស្សន៍ CTN ពីបទសម្ភាសនោះបន្ទាប់មក កញ្ញា សិទ្ធី នីកា ក៏ត្រូវបានផលិតករផ្សេងៗទាក់ទងហៅថតខ្សែភាពយន្តរបស់ខ្លួនបានជាបន្តបន្ទាប់ដូចជារឿង «វិថីនារី» ដែលចាក់ផ្សាយនៅទូរទស្សន៍ MyTV។ ខណៈមួយរយៈចុងក្រោយនេះតារាស្រីដែលមានត្រេមុខមិនសូវចាញ់តារាថៃកញ្ញា សិទ្ធី នីកា កំពុងតែមមាញឹកជាមួយការថតខ្សែភាពយន្តរឿង «ផ្ការីកក្នុងចិត្ត» ដែលនាងសម្តែងតួឯកឈ្មោះ នាង បុប្ផា និងរឿង « បំណុលស្នេហ៍» របស់ផលិតកម្ម PR Production ដែលមានម្តាយមីងខ្លួនគឺអ្នកនាង ព្រំ រដ្ឋា ជាម្ចាស់ផលិតកម្មនោះ។
ចំពោះការសម្តែងភាពយន្តវិញនោះជាទូទៅសង្កេតឃើញតារាសម្តែងរលកក្រោយរមែងមានការរអ៊ូ ឬប្រាប់ពីចំណុចលំបាកជារឿយៗ និងតែងតែចង់បានការសម្តែងណាដែលត្រូវតាមចំណូលចិត្តខ្លួនដូចជាដើរតួកាច ឬតួស្លូត ជាដើម។ តែសម្រាប់ស្រីស្រស់ជាតារាពន្លកថ្មី កញ្ញា សិទ្ធី នីកា ហាក់ដូចជាមិនមានកើតនូវក្តីបារម្ភនោះឡើយដោយនាងនិយាយថា៖ «សម្រាប់នាងខ្ញុំនោះ ការសម្តែងដូចជាមិនបានចោទជាបញ្ហាអ្វីនោះឡើយគឺខ្ញុំអាចសម្តែងបត់បែនទៅតាមសាច់រឿងបាន។ ទោះបីជានាងខ្ញុំត្រូវគេឲ្យដើរតួកាច ឬតួស្លូតក្តី គឺនាងខ្ញុំអាចសម្តែងបានទាំងអស់និយាយរួមទៅគឺអាចបត់បែនតាមការចង់បានពីក្រុមអ្នកដឹកនាំរឿង»។
តែយ៉ាងណាក៏តារាសម្តែងស្រីទើបមានវ័យ ២០ ឆ្នាំដែលកំពុងតែមានរូបសម្ផស្សកាន់តែស្រស់ស្អាត ផូរផង់រូបនេះក៏ហាក់ដូចជាចង់មានជម្រើសសម្រាប់ការសម្តែងមួយផងដែរ ប្រសិនបើមានការឲ្យជ្រើសរើសបាននោះ។
កញ្ញា សិទ្ធី នីកា បានបង្ហើបប្រាប់បន្ថែមថា៖ «រូបនាងខ្ញុំប្រសិនបើអាចជ្រើសបានមែននោះគឺចង់សម្តែងតួណាដែលមើលទៅដូចជាមិនសូវកាចពេក ហើយក៏មិនមែនជាតួដែលមានលក្ខណៈស្លូតបូតពេកនោះដែរ»៕