.jpg)
សុជីវធម៌របស់កញ្ញា សុវត្ថិឌី ធារិកា ចំពោះព្រះនាងតូច នរោត្តម ជេនណា។ រូបថត អ៊ីនស្តាក្រាម
ភ្នំពេញៈ ថ្មីៗនេះតារាចម្រៀងស្រីកាន់តែមានសម្រស់ស្អាត មាឌល្អិតសំនៀងពីរោះ និងអតីតជាបេក្ខនារីចូលដល់វគ្គផ្តាច់ព្រ័ត្រនៃកម្មវិធីចម្រៀង Cambodian Idol រដូវកាលទី ១ កញ្ញា សុវត្ថិឌី ធារិកា ត្រូវមហាជនលួចសរសើរអំពីសុជីវធម៌ក្នុងសង្គមហាក់ដូចផ្ទុយគ្នាស្រឡះកាលប៉ុន្មានឆ្នាំមុន ដែលត្រូវគេរិះគន់ទៅលើរូបសម្រស់ និងទឹកដមសំនៀងថាច្រៀងមិនពីរោះ សម្រស់ក៏មិនស្អាតនោះ។ ភាពខុសប្លែកគ្នាពីចំណាប់អារម្មណ៍លើ សុវត្ថិឌី ធារិកា ដែលមានរាងស្វែលត៍ និងកំពុងតែស្រូបប្រជាប្រិយភាពពីមហាជនតាមរយៈការច្រៀងឡើងវិញនូវមរតកចម្រៀង និងបទថ្មីៗខ្លួននៅក្នុងផលិតកម្មមកុដមេឌា ទទួលបានការកោតសរសើរពីមហាជន ខណៈពេលកញ្ញាចូលរួមសម្តែងកម្មវិធីមួយ ហើយសម្តែងក្តីគារវៈយ៉ាងគួរសមជាមួយនឹងព្រះនាងតូចព្រះនាម នរោត្តម ជេនណា កាលពីចុងសប្តាហ៍កន្លងមក។
សុជីវធម៌របស់កញ្ញា សុវត្ថិឌី ធារិកា សម្តែងចេញពីចិត្តដោយក្តីគោរពឋានៈរបស់សែស្រឡាយរាជវង្សព្រះនាងតូច នរោត្តម ជេនណា ក៏លេចចេញពាក្យសរសើរពីមហាជនថា៖ «គុំរូល្អមែន សុវត្ថិឌី ធារិកា ទោះបីព្រះនាង ឬអ្នកអង្គម្ចាស់នៅមានវ័យក្មេងកុមារភាពក៏ពិតមែនតែឲ្យទ្រង់ជាសែរាជវង្ស យើងទាំងអស់គ្នាជារាស្ត្រសាមញ្ញ គប្បីគោរពមានកិរិយាបែបនេះទើបត្រឹមត្រូវ ហើយសម្តែងពីការឲ្យតម្លៃ និងគោរពស្រឡាញ់សែរាជវង្សរបស់ជាតិខ្មែរយើងទាំងមូល ខ្ញុំចង់ឲ្យមិត្តៗទាំងអស់គ្នាជួយស៊ែរម្នាក់ ១ ផងដើម្បីចែករំលែកឲ្យគ្រប់គ្នាបានស្គាល់ និងធ្វើតាមគុំរូល្អៗបែបនេះ»។
បន្ថែមពីរូបភាពសម្តែងគារវៈចំពោះព្រះនាងតូច ជេនណា នោះ សុវត្ថិឌី ធារិកា ក៏បញ្ជាក់ដោយការពារក្រែងលោមានយល់ច្រឡំថា នាងចង់ល្បីដោយសាររឿងនេះ ខណៈរូបនាងផ្ទាល់គ្មានចេតនាចង់បានការទាក់ទាញចំណាប់អារម្មណ៍មហាជនដើម្បីឲ្យល្បីបែបនោះទេ។
តារាចម្រៀងស្រីមានសាច់ឈាមស្រស់ស្អាត និងមុខមាត់សមសួនជាងមុនវ័យ ២១ ឆ្នាំដែលជានិស្សិតឆ្នាំទី ៤ ផ្នែកពាណិជ្ជកម្មនៃសាកលវិទ្យាល័យភូមិន្ទនីតិសាស្ត្រ និងវិទ្យាសាស្ត្រសេដ្ឋកិច្ច សុវត្ថិឌី ធារិកា បានបង្ហើបថា៖ «ខ្ញុំពិតជាស្មានមិនដល់ដែរថាបង្ហាញពីការគោរពចំពោះសែស្រឡាយរាជវង្សនោះ ធ្វើឲ្យមហាជនចាប់អារម្មណ៍នោះទេ។ តែនិយាយឲ្យពិតត្រង់ទៅ ខ្ញុំស្គាល់ព្រះនាងតូចយូរក្រែលដែរ ហើយក៏ចូលចិត្តទ្រង់។ នាងខ្ញុំ ក៏អត់មានចេតនាចង់បានភាពល្បីដោយសារតែរឿងនេះទេ»៕
