.jpg)
ក្រុមកវីនិពន្ធពេលទទួលពានរង្វាន់អក្សរសិល្ប៍ទន្លេមេគង្គ នៅប្រទេសមីយ៉ាន់ម៉ា ឆ្នាំ ២០១៩។ រូប សហការី
ភ្នំពេញ៖ ក្នុងគោលបំណងថែរក្សា និងលើកស្ទួយតម្លៃអក្សរសិល្ប៍ជាតិឲ្យកាន់តែប្រសើរឡើង និងក្នុងន័យរឹតចំណងសាមគ្គីភាព មិត្តភាព និងកិច្ចសហប្រតិបត្តិការគ្នា ជាមួយប្រទេសតាមដងទន្លេមេគង្គមានកម្ពុជា ចិន ភូមា ថៃ ឡាវ និងវៀតណាម នោះទើបសមាគមអ្នកនិពន្ធខ្មែររៀបចំប្រកួតជ្រើសរើសស្នាដៃ តែងនិពន្ធស្នាដៃរឿងខ្លី និងកំណាព្យ ពានរង្វាន់អក្សរសិល្ប៍ទន្លេមេគង្គលើកទី ១១ ឆ្នាំ ២០២០ (Mekong River Literature Award 2020) ខណៈកម្ពុជាគឺជាម្ចាស់ផ្ទះរៀបចំឆ្នាំនេះ។
សម្រាប់ការប្រឡងប្រជែងតែងនិពន្ធរឿងខ្លី និងកំណាព្យ ពានរង្វាន់អក្សរសិល្ប៍ទន្លេមេគង្គនេះ នៅរក្សាប្រធានបទដដែលគឺ «ជីវិត និងនិរន្តរភាពទន្លេមេគង្គ» ខណៈការប្រកួតនៅឆ្នាំ ២០២០ នេះ ជាលើកទី ១១ ធ្វើនៅក្នុងប្រទេសកម្ពុជា និងកាលពីឆ្នាំ ២០១៩ ប្រទេសមីយ៉ាន់ម៉ា គឺជាម្ចាស់ផ្ទះដោយការប្រកួតបើកទូលាយទៅដល់អ្នកនិពន្ធ សមាជិក សមាជិកានៃសមាគមអ្នកនិពន្ធខ្មែរ និងសាធារណជនអាចចូលរួមដាក់ពាក្យប្រកួតបាន។
ការប្រកួតពានរង្វាន់អក្សរសិល្ប៍ទន្លេមេគង្គឆ្នាំ ២០២០ នេះធ្វើនៅកម្ពុជា។ រូប ហ្វេសប៊ុក
បើតាមសេចក្តីប្រកាសជូនដំណឹងពីសមាគមអ្នកនិពន្ធខ្មែរ ដោយមានរូបលោកបណ្ឌិត ព្រឿង ប្រណីត គឺជាប្រធានសមាគមអ្នកនិពន្ធខ្មែរ បានឲ្យដឹងអំពីលក្ខខណ្ឌនៃការប្រកួតថា៖ «ប្រធានបទ ជីវិត និងនិរន្តរភាពទន្លេមេគង្គ ដែលមានខ្លឹមរឿងប្រកបទៅដោយទស្សនវិជ្ជាជីវិត និងសោភណភាព។ រីឯស្នាដៃត្រូវវាយជាអត្ថបទកុំព្យូទ័រមិនលើសចំនួន ២០ ទំព័រ ជាក្រដាស A4 (Margin 2.54 cm) និងចាប់ទទួលពាក្យពីថ្ងៃទី ១ ខែកក្កដា រហូតដល់ថ្ងៃទី ៣១ ខែ សីហា ឆ្នាំ ២០២០។ ការប្រកួតប្រជែងនេះ នឹងជ្រើសរើសយកជយលាភីចំនួន ២ រូប ផ្នែករឿងខ្លី និងកំណាព្យ។ ខណៈម្ចាស់ជយលាភីនឹងទទួលបាននូវប្រកាសនីយបត្រ ថវិកា និងពានរង្វាន់»។
ដោយឡែកទីកន្លែងទទួលពាក្យស្នាដៃនៅអគារសមាគមអ្នកនិពន្ធខ្មែរ ក្នុងបរិវេណនៃវត្តបទុមវតី រាជធានីភ្នំពេញ ឬអាចផ្ញើតាមសារអេឡិចត្រូនិក khmerwriterkwa@gmail.com ឬ តាមប្រព័ន្ធតេឡេក្រាមនៃលេខទូរស័ព្ទ 078 78 89 91 /089 85 67 64 / 092 78 89 90 ខណៈការប្រគល់ពានរង្វាន់ជយលាភីនឹងប្រារព្ធធ្វើនៅប្រទេសកម្ពុជា ផងដែរ។
ការប្រឡងប្រជែងតែងនិពន្ធរឿងខ្លី និងកំណាព្យពានរង្វាន់អក្សរសិល្ប៍ទន្លេមេគង្គលើកទី ១០ ក្រោមប្រធានបទ «ជីវិត និងនិរន្តរភាពទន្លេមេគង្គ» ប្រចាំឆ្នាំ ២០១៩ ដែលធ្វើនៅក្នុងប្រទេសមីយ៉ាន់ម៉ា នោះខាងប្រទេសកម្ពុជា យើងមានម្ចាស់ជយលាភី ២ រូប គឺលោកស្រីបណ្ឌិត ប៉ែន សេដ្ឋារិន ជាម្ចាស់ជយលាភីផ្នែករឿងខ្លីមានចំណងជើងថា «គង្គាជីវិត» និងលោក មឿន សំណាង គឺជាម្ចាស់សំណេរនៃកំណាព្យមានចំណងជើងថា «ស្នេហ៍លើផ្ទៃទន្លេ» ដែលអ្នកទាំង ២ បានទៅចូលរួមទទួលពានរង្វាន់កាលពីថ្ងៃទី ១១-១៤ ខែ តុលា ឆ្នាំ ២០១៩ កន្លងមក៕
