The Phnom Penh Post Search

Search form




Logo of Phnom Penh Post newspaper Phnom Penh Post - កម្ពុជា​មាន​គ្រូ​ទី​១​ជា​បេក្ខជន​គ្រូ​ឆ្នើម​ដណ្ដើម​ប្រាក់​​ ​$១​លាន

កម្ពុជា​មាន​គ្រូ​ទី​១​ជា​បេក្ខជន​គ្រូ​ឆ្នើម​ដណ្ដើម​ប្រាក់​​ ​$១​លាន

អ្នកគ្រូ នាង ផល្លា បង្រៀន​កុមារ​ពិការភ្នែក​។
អ្នកគ្រូ នាង ផល្លា បង្រៀន​កុមារ​ពិការភ្នែក​។ ម៉េង គីមឡុង

កម្ពុជា​មាន​គ្រូ​ទី​១​ជា​បេក្ខជន​គ្រូ​ឆ្នើម​ដណ្ដើម​ប្រាក់​​ ​$១​លាន

ភ្នំពេញ: គ្រូ​បង្រៀន​កម្ពុជា​ទីមួយ​ត្រូវ​បាន​ជ្រើស​រើស​ក្នុង​ការ​ប្រកួត​​អន្ដរជាតិ​ ​ចំណោម​​​បញ្ជី​បេក្ខ​ភាព​កំពូល​ទាំង​៥០នាក់​ ​​មក​​​ពី​ជុំវិញ​ពិភពលោក​ដើម្បី​​ដណ្ដើម​ងារ​ជា​​គ្រូ​បង្រៀន​ឆ្នើម​​ និង​​ជា​ម្ចាស់​ទឹក​ប្រាក់​១​លាន​ដុល្លារ​នូវ​កម្មវិធី the Global Teacher Prize​។

អ្នកស្រី នាង ផល្លា ជា​គ្រូ​បង្រៀន ជា​នាយិកា​សាលា​និង​ជា​អ្ន​កសម្រប​សម្រួល​កម្មវិធី​អប់រំ​ជន​ពិការ​នៅ​កម្ពុជា​ដែល​មាន​បទពិសោធ​២៤​ឆ្នាំ​។ អ្នក​គ្រូ​បាន​ចាប់​ផ្ដើម​បម្រើ​ការងារ​ជាមួយ​កុមារ​ពិការ​ភ្នែក​ក្នុង​ឆ្នាំ​១៩៨៦​ ជា​នាយិកា​សាលា​មួយ​របស់​អង្គការ​សហប្រជាជាតិ​ក្នុង​ជំរំ​ជន​ភៀស​ខ្លួន​នៅ​ទឹក​ដី​ថៃ​ ហើយ​នៅពេល​​ត្រឡប់​មក​កម្ពុជា​វិញ​ឆ្នាំ​១៩៩៣​ អ្នក​គ្រូ​ក្លាយ​ជា​គ្រូ​អក្សរ​ស្ទាប​លើក​​ដំបូង​ក្នុង​ប្រវត្ដិ​សាស្ដ្រ​កម្ពុជា​។

ឈ្មោះ​ខ្មែរ​តែ​ម្នាក់​គត់​​មាន​ក្នុង​បញ្ជី​សម្រាំង​ទាំង​៥០​នាក់​​​មក​ពី​​២៦​ប្រទេស​​ ដែល​គ្រូ​ជន-​ជាតិ​​អាមេរិក​១៦​នាក់ ឥណ្ឌា​៣​នាក់ កាណាដា ៣​នាក់ អង់គ្លេស ២​នាក់ អូស្ដ្រាលី ២​នាក់ ម៉ាឡេស៊ី ២​នាក់ ​​​និង​បណ្ដា​ប្រទេស​​មួយ​ចំនួន​ទៀត​។

ចំពោះ​ការ​ជ្រើស​រើស​បញ្ជី​សម្រាំង​ត្រូវ​បាន​ប្រកាស​កាល​ពី​ថ្ងៃទី​៨ ខែ​ធ្នូ កន្លង​ទៅ ​​បេក្ខជន​រាប់​ពាន់​នាក់​បាន​ដាក់​ស្នើ​តាម​រយៈ​ប្រវត្ដិ​រូប​ និង​ស្នាដៃ​បង្រៀន។ ការ​សម្រាំង​វគ្គ​បន្ដ​ដែល​ជ្រើស​យក​ត្រឹម​តែ​១០​នាក់ ​​ត្រូវបាន​ប្រកាស​នៅ​ពាក់​កណ្ដាល​ខែ​កុម្ភៈ​ ឆ្នាំ​២០១៥​។ វគ្គ​​ចុង​ក្រោយ ​​អ្នក​ទទួល​ជ័យ​លាភី​នឹង​ត្រូវ​ប្រកាស​នៅ​ក្នុង​ខែ​មីនា​ខាង​មុខនេះ។ ការ​ប្រកួត​នេះ​បាន​ដំណើរ​ការ​ដោយ​មូលនិធិ Varkey GEMS ជា​អង្គការ​សប្បុរស​ធម៌​​នៃ​សម្ព័ន្ធ​សាលា​ឯកជន GEMS ដែល​មាន​មូលដ្ឋាន​នៅ​ទីក្រុង​ឌូបៃ​។

អ្នកគ្រូ​កំពុង​បង្រៀន​សិស្ស​ពិការ​ភ្នែក​ក្នុង​ឆ្នាំ​១៩៩៤​​​​។
អ្នកគ្រូ​កំពុង​បង្រៀន​សិស្ស​ពិការ​ភ្នែក​ក្នុង​ឆ្នាំ​១៩៩៤​​​​។ រូបថត សហការី​

អ្នកស្រី Sarah MUGNIER ជា​មន្ដ្រី​ទំនាក់​ទំនង​សាធារណៈ​នៃ​អង្គការ​គ្រួសារ​ថ្មី​កម្ពុជា បាន​ឲ្យ​ដឹង​ថា​ គោល​បំណង​នៃ​ការ​ជ្រើស​រើស​គ្រូ​ឆ្នើម​ប្រចាំ​ឆ្នាំ​នេះ Global Teacher Prize គឺជា​ការ​ផ្សព្វ​ផ្សាយ​គុណ​តម្លៃ​របស់​គ្រូ​បង្រៀន​។

គ្រូ​មាន​ការ​យក​ចិត្ដ​​ទុក​ដាក់ និង​គំនិត​ច្នៃ​ប្រឌិត​ដែល​ផ្ដល់​ការ​បង្រៀន​ប្រកប​ដោយ​ប្រសិទ្ធភាព​ចំពោះ​សិស្ស​ និង​សហគមន៍​ នឹង​ត្រូវ​បាន​ផ្ដល់​ពាន​​រង្វាន់​ជា​គ្រូ​ឆ្នើម​ពេញ​មួយ​ជីវិត​។ ​​អ្នក​គ្រូ​ ផល្លា ថា​៖ «​ខ្ញុំ​មាន​មោទនភាព​​ណាស់​​ដែល​​ប្រទេស​កម្ពុជា​យើង​បាន​ជាប់​ក្នុង​បញ្ជី​សម្រាំង​គ្រូ​ឆ្នើម​នោះ​ ពីព្រោះ​យើង​មាន​បេក្ខជន​ជុំវិញ​ពិភពលោក​យ៉ាង​ច្រើន​ដែល​មិ​នបាន​ជាប់​»។

អ្នកស្រី Sarah MUGNIER បញ្ជាក់​ថា៖ «​អ្នក​ទទួល​ជ័យលាភី​​ដែល​ជា​ម្ចាស់​ទឹក​ប្រាក់​១​លាន​ដុល្លារ នឹង​ត្រូវបាន​ជ្រើស​រើសដោយ Global ​Teacher Prize Academy មាន នាយក​សាលា អ្នក​ជំនាញ​ផ្នែក​អប់រំ អ្នក​​អត្ថាធិប្បាយ​ អ្នក​សារ​ព័ត៌មាន មន្ដ្រី​សាធារណៈ​ សហគ្រិន​បច្ចេកទេស នាយក​ក្រុមហ៊ុន និង​អ្នក​វិទ្យាសាស្ដ្រ​សរុប​​៦៦​នាក់»។

អ្នក​គ្រូ ផល្លា ​​រំឭក​ពី​នីតិវិធី​ដាក់​ពាក្យ​សុំ​ប្រកួត​ថា​៖ «​យើង​ត្រូវ​ផ្ញើ​ពាក្យ​សុំ​ចំនួន​៥​ទំព័រ​ពាក់ព័ន្ធ​នឹង​ការ​បង្រៀន​ មូលហេតុ​ដែល​យើង​សម្រេច​ចិត្ដ​ធ្វើ​ជា​គ្រូ​បង្រៀន​ មូលហេតុ​ដែល​យើង​ជឿ​ជាក់​លើ​គុណភាព​​អប់រំ វិធី​សាស្ដ្រ​​​បង្រៀន​ប្រកប​ដោយ​​ភាព​ច្នៃ​ប្រឌិត​ ការ​បង្រៀន​​កុមារ​​ឲ្យ​ក្លាយ​​ជា​យុវជន​សកល​ និង​ការ​ចូលរួម​ក្នុង​សហគមន៍​»។

អ្នក​គ្រូ​បាន​បង្ហើប​ប្រាប់​ពី​ក្ដី​សង្ឃឹម​ចំពោះ​ជ័យ​ជម្នះ​ខាង​មុខ​​ថា​៖ «​ខ្ញុំ​សង្ឃឹម​នឹង​ជាប់​ក្នុង​ការ​ប្រកួត​គ្រូ​ឆ្នើម​នេះ​ ដោយ​សារ​​ខ្ញុំ​បាន​ឃើញ​អ្នក​ជាប់​៥០​នាក់​នោះ​សុទ្ធ​តែ​ជា​គ្រូ​បង្រៀន​សិស្ស​ធម្មតា​។ ចំណែកខ្ញុំ​ជាគ្រូ​បង្រៀន​សិស្ស​ពិការ»។

ស្ដ្រី​មាន​បទពិសោធ​បង្រៀន​ចាស់​វស្សា​រូប​នេះ ​​បន្ដថា​៖ «​បើ​ខ្ញុំ​ជាប់​ ក្នុង​នាម​ជា​គ្រូ​បង្រៀន​​ក្នុង​​អង្គការ​​ និង​គ្រូ​តំណាង​ឲ្យ​កម្ពុជា ខ្ញុំ​នឹង​យក​ប្រាក់​​រង្វាន់​នេះ​មក​ទ្រទ្រង់​អង្គការ​គ្រួសារ​ថ្មី​ដែល​កំពុង​តែ​ជួប​ការ​លំបាក​ចំពោះ​មូលនិធិ»៕

អត្ថបទគួរចាប់អារម្មណ៍