ភ្នំពេញៈ ជាមួយបទពិសោធរស់នៅក្នុងសហគមន៍ដែលមានប្រជាជនចូលចិត្តអានសៀវភៅ និងចែករំលែកចំណេះដឹងឲ្យគ្នាទៅវិញទៅមក យុវជនមួយក្រុមបានរៀបចំកម្មវិធីជួបគ្នាដូរសៀវភៅ សម្រាប់អ្នកចូលចិត្តអំណានពីគ្រប់ទិសទី អាចជួបជុំគ្នាចែករំលែកបទពិសោធ និងចំណេះដឹងនៅកម្មវិធីនាថ្ងៃសៅរ៍ ទី១៦ ខែកុម្ភៈ ឆ្នាំ ២០១៩ នៅ Workspace1, Factory Phnom Penh, តាមបណ្តោយផ្លូវជាតិលេខ ២ ទល់មុខវត្តចាក់អង្រែលើរាជធានីភ្នំពេញ។
អ្នករៀបចំកម្មវិធីលោក ឃី កូបី បានប្រាប់ ភ្នំពេញ ប៉ុស្តិ៍ ឲ្យដឹងពីគោលបំណងនៃការរៀបចំកម្មវិធីនេះឡើងថា៖ «ទី ១ ចង់បង្កើនវប្បធម៌ក្នុងការអានសៀវភៅរបស់យុវជននៅក្នុងទីក្រុងភ្នំពេញសម្រាប់អ្នកចូលចិត្តអានសៀវភៅ គាត់អាចមកជួបជុំគ្នា អាចនិយាយថាសៀវភៅគាត់និយាយពីអ្វី គាត់អាចដូរសៀវភៅគ្នាបាន ដោយសារនៅស្រុកខ្មែរយើង ពិបាកក្នុងការរកទិញសៀវភៅ ព្រោះសៀវភៅថ្លៃ ហើយយើងអត់សូវមានអ្នកចែកចាយសៀវភៅ អ៊ីចឹងអ្នកដែលអានសៀវភៅហើយគាត់អាចចែករំលែកសៀវភៅឲ្យទៅអ្នកដទៃអានបាន»។
ទាក់ទងនឹងការអានសៀវភៅនេះ អតីតនិស្សិតព័ត៌មានវិទ្យាខាងលើបានរំឭកថា កាលពីលោកសិក្សានៅអនុវិទ្យាល័យក្នុងខេត្តកំពង់ស្ពឺលោកពុំមានសៀវភៅអានច្រើននោះឡើយដោយហេតុថាសាលាមិនមានបណ្ណាល័យតម្កល់សៀវភៅសម្រាប់សិស្ស។ សូម្បីតែរបៀបអានសៀវភៅក៏លោកមិនចេះផងរហូតទាល់តែលោកបានបន្តការសិក្សាផ្នែក IT នៅសាកលវិទ្យាល័យភូមិន្ទភ្នំពេញទើបលោកបានអានសៀវភៅច្រើន។
ម្យ៉ាងទៀតអំឡុងពេលសិក្សា គ្រូបន្ទុកថ្នាក់ភាសាអង់គ្លេសបានឲ្យសិស្សទាំងអស់អានមេរៀន និងសង្ខេបន័យយកមកប្រាប់មិត្តភក្តិពីម្នាក់ទៅម្នាក់។ តាំងពីនោះមកទើបលោកមានទម្លាប់អានសៀវភៅ និងយល់ពីរបៀបនៃការអានសៀវភៅ។
ជាមួយបទពិសោធដែលនាំឲ្យមានការស្រឡាញ់អំណានកម្មវិធីរបស់លោកក៏ស្វាគមន៍ការចូលរួមដោយសេរីទាំងអ្នកមានសៀវភៅ និងមិនមានសៀវភៅនាំមកជាមួយ។
មកដល់ពេលនេះ Workspace1 មានសៀវភៅជាភាសាខ្មែរប្រមាណជាង ២ កេស និងមានសៀវភៅជាបរទេសប្រមាណជាង ៤០០ ក្បាលសម្រាប់ធ្វើការដោះដូរជាមួយអ្នកចូលរួម ប៉ុន្តែសៀវភៅបរទេសគឺអាចប្តូរតែជាមួយសៀវភៅបរទេសប្រភេទជារឿងនិទាន ឬប្រលោមលោក។
ទន្ទឹមនឹងនេះលោក ឃី កូបី ក៏បានបង្ហាញពីភាពខុសគ្នាមុនពេល និងក្រោយពេលដែលលោកចាប់ផ្តើមអានសៀវភៅថា៖ «ពេលដែលយើងអានសៀវភៅមានន័យថាយើងមានពេលទំនេរសម្រាប់ខ្លួនឯង ហើយចាប់ផ្តើមចេះគិតមានន័យថាដូចជាកញ្ចក់ឆ្លុះបញ្ចាំងមកជីវិតយើងផ្ទាល់ខ្លួន និងសង្គម។ អ៊ីចឹងយើងចាប់ផ្តើមមើលឃើញថាអ្វីខ្លះជាផលវិជ្ជមាន និងអ្វីខ្លះជាផលអវិជ្ជមាន និងអ្វីដែលយើងគួរតែយកមកអនុវត្តក្នុងជីវិតរស់នៅ។ អ៊ីចឹងការអានធ្វើឲ្យមនុស្សចេះគិត»។
អ្នកដែលចង់ចូលរួមដូរសៀវភៅបង្កើតមិត្តកម្មវិធីនេះនឹងធ្វើឡើងនៅវេលាម៉ោង ១០ ព្រឹក ដល់ ១២ ថ្ងៃត្រង់ នៅ WS1 by Factory Phnom Penh ដោយចុះតាម Link នៅហ្វេសប៊ុក «ជួបគ្នាដូរសៀវភៅ Book Exchange Meet-Up»៕