ភ្នំពេញ៖ កម្មវិធីតាំងពិព័រណ៍ និងដាក់ដេញថ្លៃស្នាដៃសិល្បៈសហសម័យខ្នាតធំពុំធ្លាប់មាន ដែលមានក្រុមសិល្បករ និងក្រុមសិល្បការិនី ទាំងជនជាតិខ្មែរ និងបរទេស សរុបចំនួនប្រមាណជាង ៨០ រូប ត្រូវបានបើកសម្ពោធ ដើម្បីប្រមូលថវិកាសម្រាប់ទ្រទ្រង់កម្មវិធីរបស់គម្រោងសិល្បៈស-ស នៅឯវិចិត្រសាល Factory Phnom Penh កាលពីរសៀលថ្ងៃទី ១៤ ខែវិច្ឆិកា និងបន្តរហូតដល់ថ្ងៃទី ៤ ខែ ធ្នូ ឆ្នាំ ២០២០។
បើយោងទៅតាមសេចក្តីប្រកាសព័ត៌មានបានឲ្យដឹងពីការរៀបចំកម្មវិធីនេះថា៖ «កម្មវិធីពិព័រណ៍ និងដាក់ដេញថ្លៃស្នាដៃសិល្បៈសហសម័យនេះ ត្រូវបានចូលរួមជាសប្បុរសពីសំណាក់សិល្បករ និងវិចិត្រសាលរបស់គេ ទាំងនៅកម្ពុជា និងក្រៅប្រទេស។ ស្នាដៃដោយសិល្បករខ្មែរ និងសិល្បករមកពីតំបន់អាស៊ីអាគ្នេយ៍ល្បីឈ្មោះចំនួនជាង ៤០ ស្នាដៃ នឹងមានសម្រាប់ការដាក់ដេញថ្លៃតាមអនឡាញ។ នៅក្នុងនោះមានស្នាដៃរបស់សិល្បករខ្មែរសំខាន់ៗដូចជា ពេជ្រ សុភាព, លាង ស៊ីកន, ខ្វៃ សំណាង, ទិត្យ កន្និដ្ឋា, នាក់ សុផល, ថន សុខ និងសិល្បករអាស៊ីល្បីៗ ដូចជា ភីណារី សានពិតាក់ (ថៃ) មីត ចៃអ៊ីន (ថៃ) អ៊ូដាម ចាន់ងូ-យិន (វៀតណាម) ង៉ា ឡេ (មីយ៉ាន់ម៉ា) ក្រុមបាគូដាប៉ាន់ (ឥណ្ឌូនេស៊ី) និង ហ៊្សូ ចាវៃ (តែវ៉ាន់)។ លើសពីនេះ ក៏មានស្នាដៃដោយក្រុមសិល្បករនៅកម្ពុជាចំនួនជាង ៣០ ស្នាដៃទៀតដែលអាចជាវបានដោយផ្ទាល់នៅកន្លែងតាំងពិព័រណ៍។ គម្រោងសិល្បៈស-ស សូមថ្លែងអំណរគុណយ៉ាងជ្រាលជ្រៅចំពោះទឹកចិត្តសប្បុរសរបស់ក្រុមសិល្បករ និងវិចិត្រករដែលបានចូលរួមទាំងអស់។ យើងក៏សូមថ្លែងអំណរគុណដល់វិចិត្រសាល Factory Phnom Penh ដែលបានផ្តល់ទីតាំងសម្រាប់ពិធីតាំងពិព័រណ៍នេះ ហើយក៏ថ្លែងអំណរគុណជាពិសេសដល់លោក ម៉ុក រដ្ឋា ដែលបានឧបត្ថម្ភដល់កម្មវិធីនេះផងដែរ»។
ប្រភពខាងលើ បន្តឲ្យដឹងទៀតថា៖ «កម្មវិធីតាំងពិព័រណ៍ និងដាក់ដេញថ្លៃស្នាដៃសិល្បៈសហសម័យនេះ គឺប្រារព្ធធ្វើឡើង ដើម្បីប្រមែប្រមូលថវិកាសម្រាប់ទ្រទ្រង់កម្មវិធីរបស់គម្រោងសិល្បៈស-ស។ ថវិកាដែលប្រមូលបាននឹងយកទៅផ្គត់ផ្គង់គម្រោងសិល្បៈស-ស និងសិល្បករដែលចូលរួម។ ការដេញថ្លៃ និងការជាវស្នាដៃសិល្បៈទាំងនេះនឹងជួយឱ្យគម្រោងសិល្បៈស-ស អាចបន្តកម្មវិធីរបស់ខ្លួននៅក្នុងឆ្នាំ ២០២១ បានក្នុងនោះមានកម្មវិធីសិក្សាអប់រំសិល្បៈ កម្មវិធីតាំងពិព័រណ៍ និងកម្មវិធីសាធារណៈ ដែលជាប្រយោជន៍បានទៅដល់ការរីកចម្រើននៃសហគមន៍សិល្បៈសហសម័យនៅកម្ពុជា»។
ចំពោះការដេញថ្លៃស្នាដៃសិល្បៈអនឡាញនោះ អាចចូល givergy.us/sasa2020 ដែលមានកាលបរិច្ឆេទនៃការដាក់ដេញថ្លៃ គឺចាប់ថ្ងៃទី ១៤ ខែវិច្ឆិកា បន្តដល់ថ្ងៃទី ៤ ខែ ធ្នូ ឆ្នាំ ២០២០ ខណៈព័ត៌មានបន្ថែមចូលតាមសារអេឡិចត្រូនិក lyna@sasaart.info ឬ sna@sasaart.info ឬតាមទូរស័ព្ទ ០៩២ ៩៦១ ៩៧៤/០១២ ៤២២ ០៦២។ ចំណែកពិព័រណ៍ស្នាដៃសិល្បៈសហសម័យនៅ Factory Phnom Penh ចាប់ផ្តើមពីថ្ងៃទី ១៤ ខែវិច្ឆិកា បន្តរហូតដល់ថ្ងៃទី ២១ ខែ វិច្ឆិកា ឆ្នាំ ២០២០។
គួរបញ្ជាក់ដែរថា គម្រោងសិល្បៈស-ស គឺជាគម្រោងមិនមែនដើម្បីប្រាក់ចំណេញឡើយ ដែលបានដំណើរការដោយក្រុមសិល្បករខ្មែរ និងផ្តោតលើការងារដកពិសោធន៍នៅក្នុងវិស័យសិល្បៈសហសម័យ។ គម្រោងនេះ ផ្តួចផ្តើមឡើងនៅឆ្នាំ ២០១០ ដោយសិល្បករមួយក្រុមឈ្មោះថា «ស្ទាវសិល្បៈ»។ បន្ទាប់ពីចំណាយពេលអស់ ៧ ឆ្នាំ ធ្វើការពីអគារស្នាក់នៅជាប្រវត្តិសាស្ត្រហៅថា «ប៊ុលឌិងស» មក យើងបានផ្លាស់មកនៅទីតាំងថ្មីនៅក្នុងឆ្នាំ ២០១៧។ នៅទីតាំងថ្មី គម្រោងសិល្បៈស-ស បានបង្វែរមកពង្រឹងការងារជាមួយសិល្បករក្មេងៗ និងនិស្សិតទើបបញ្ចប់ការសិក្សា ខណៈបន្តកសាងទំនាក់ទំនងកាន់តែជិតស្និទ្ធជាមួយសិល្បករនៅអាស៊ី តាមរយៈកម្មវិធីសិក្សាអប់រំសិល្បៈ កម្មវិធីពិព័រណ៍ កម្មវិធីសាធារណៈ កម្មវិធីនិវាសដ្ឋានសិល្បៈពិសោធន៍ និងកម្មវិធីសហការពិសេសៗផ្សេងៗទៀត៕