ក្រុងកាន: ពីបុរាណកាល មនុស្សប្រើយុទ្ធសាស្ត្រចែចង់គ្នា ផ្ដើមពីការស្គាល់ឈ្មោះ និងឆ្លងកាត់ដំណាក់កាលជាច្រើនមុននឹងឡើងគ្រែ។ ប៉ុន្ដែនៅរជ្ជកាលដ៏ទំនើប ជាមួយកម្មវិធីទូរស័ព្ទរកដៃគូដូចជា Tinder សូម្បីតែកម្មវិធីតាមទូរទស្សន៍ក៏ជ្រួលជ្រើមរៀបចំឱកាសនេះផងដែរ។
កម្មវិធីណាត់ជួបស្នេហ៍ថ្មីនេះជួយមនុស្សសហស្សវត្សរ៍ថ្មីដ៏មមាញឹកមិនឲ្យខ្ជះខ្ជាយពេលវេលាតាមស្វែងរកស្នេហាបានលឿនបំផុត។ កម្មវិធីទូរទស្សន៍ «រួមមេត្រី» ឬ «Making Love» ដ៏គួរឲ្យភ្ញាក់ផ្អើលនៅ MIPCOM ជាទីផ្សារទូរទស្សន៍ធំបំផុតក្នុងលោកនៅទីក្រុងកាន ប្រទេសបារាំង បានអនុញ្ញាតឲ្យបេក្ខជនបេក្ខនារី អាចឡើងគ្រែជាមួយគ្នា មុនសម្រេចចិត្ដថាតើគួរស្រឡាញ់ និងយកគ្នាជាគូអនាគតឬក៏អត់?
ក្រុមអ្នកផលិតជនជាតិបារាំង WeMake បានឲ្យដឹងថា ខ្លួនបានពាំនាំការផ្គូផ្គងបែបវិទ្យាសាស្ដ្រ ដើម្បីបង្កើតជាសំណួរចាក់ដោតមួយថា «តើការរួមភេទអាចជំរុញរូបអ្នកឲ្យចេះស្រឡាញ់គ្នាឬទេ?»។
ពួកគេបង្កើតកម្មវិធី ដែលកំពុងត្រូវបានដាក់លក់នៅ MIPCOM ទន្ទឹមនឹងការពិសោធជាបឋមជុំវិញសេចក្ដីស្រឡាញ់របស់អ្នកចូលរួម។
ក្រុមអ្នកផលិត បានឲ្យដឹងថា៖ «នៅពីក្រោយទ្វារបន្ទប់គេង កាមេរ៉ាបានផ្ដិតយកគ្រប់សកម្មភាព និងគ្រប់កាយវិការដ៏រោលរាលទាំងអស់របស់ដៃគូរួមគ្រែថ្មីថ្មោង មុននឹងកាត់ប្លង់ដល់ប្រតិបត្តិការសិចចប់»។
អ្នកចូលរួមខ្លះប្រញាប់រត់ចូលបន្ទប់ទឹក ដើម្បីសាកសួរអ្នកទស្សនាពីទេពកោសល្យ និងសមត្ថភាពរបស់ដៃគូ។ វីដេអូឃ្លីបខ្លីៗពីកម្មវិធីបានបង្ហាញថា៖ «យើងនឹងតាមដានគូស្នេហ៍ទាំងនេះប៉ុន្មានសប្ដាហ៍ដើម្បីឲ្យប្រាកដថា តើពួកគេនៅតែជាមិត្ដរួមដំណេក ឬពួកគេសម្រេចស្វែងយល់ចិត្ដគ្នា និងបណ្ដុះពន្លកមនោសញ្ចេតនាស្នេហាជាផ្លូវការ»។
ថ្វីដ្បិតតែក្រុមអ្នកផលិតកម្មវិធីនេះជាជនជាតិបារាំងយ៉ាងណាក៏ដោយ ក៏ក្រុមអ្នកចូលរួមថតកម្មវិធីទូរទស្សន៍ស្វែងរកដៃគូស្នេហ៍នេះ សុទ្ធតែជាជនជាតិអង់គ្លេស។
ទម្រង់ស្រដៀងៗនឹងកម្មវិធីស្វែងរកដៃគូដ៏ចម្លែកមួយនេះនឹងត្រូវបានផលិតចាក់បញ្ចាំងតាមកញ្ចក់ទូរទស្សន៍នានានៅជុំវិញពិភពលោករយៈពេលប៉ុន្មានឆ្នាំទៅមុខទៀត។ អ្នកស្រី វើជីនៀរ មូសេល័រ នៃទីភ្នាក់ងារ The Wit បានឲ្យដឹងថា វិធីណាត់ជួបសម័យថ្មីនេះមិនស័ក្ដិសមសម្រាប់អ្នកកំណាញ់ខ្លួនឡើយ។
កម្មវិធីមួយផ្សេងទៀត «ស្វែងរកខ្លួនប្រាណខ្ញុំ» ឬ «Find My Body» បានអនុញ្ញាតឲ្យអ្នកចូលរួមទស្សន៍ទាយផ្នែកនៃរាងកាយណាជាកម្មសិទ្ធិរបស់បុគ្គលណាម្នាក់ ដោយអ្នកឈ្នះអាចនាំយកបុគ្គលនោះទៅដើរលេងជាមួយនឹងបានប្រាក់រង្វាន់ថែមទៀត៕