ក្រុងវ៉ាស៊ីងតោន៖ កម្មវិធីទូរស័ព្ទស្វែងរកស្នេហ៍របស់អាមេរិក Bumble ដែលភាគីស្ដ្រីជាចលនាផ្ដួចផ្ដើមរបស់ស្ដ្រី ទទួលបានការគាំទ្រអ្នករស់នៅប្លុក Wall Street ពេលវាត្រូវបានដាក់ឱ្យដំណើរការកាលពីថ្ងៃសុក្រ ជាមួយតម្លៃក្រុមហ៊ុន ១៣ ពាន់លានដុល្លារ។
កម្មវិធីទូរស័ព្ទស្វែងរកស្នេហ៍ទទួលបានជោគជ័យតាំងពីវិបត្ដិកូវីដចាប់ផ្ដើម ហើយអ្នកនៅលីវពិបាកស្វែងរកឱកាសចេញក្រៅ។ ក្រុមហ៊ុនល្បីល្បាញមួយ Match ជាម្ចាស់កម្មវិធី App Tinder និង Meetic គូប្រជែង Bumble បានកើនប្រជាប្រិយភាពលើស ៥ ដងនៅ Wall Street តាំងពីខែមិនា និងការផ្ទុះឡើងនៃវិបត្ដិកូវីដនៅសហរដ្ឋអាមេរិក។
ក្រុមហ៊ុន Bumble Inc ដែលមានទាំងកម្មវិធី Badoo និង Bumble ត្រូវបានដាក់ដំណើរការក្នុងឆ្នាំ ២០១៤ ដោយអ្នកស្រី វ៉ៃនី វូហ្វ ហ៊ើដ អាយុ ៣១ ឆ្នាំ អតីតប្រធានផ្នែកទីផ្សារនៅ Tinder។
អ្នកស្រីចចង់ឱ្យ Bumble ក្លាយជាវេទិកាបណ្ដាញសង្គមសកល ជាលើកដំបូងសម្រាប់ស្ដ្រី និងបំណងផ្ដល់សេវាកម្មស្នេហា តែក៏ផ្ដោតលើបញ្ហាមិត្ដភាព និងកិច្ចការជំនាញ ក៏ដូចជាផ្ដល់នូវអ្វីដែលអ្នកស្រីនិយាយថា ជាតម្លៃសម្រាប់ស្ដ្រីក្នុងការបង្កើតចំណងទាក់ទងតាមចិត្ដចង់ផងដែរ។
មួយឆ្នាំបន្ទាប់ពីការបើកសម្ពោធ កម្មវិធីទូរស័ព្ទនេះមានអ្នកប្រើប្រាស់ ១៥ លាននាក់ និងការផ្គូរផ្គងស្នេហា ៨០ លានជំនួប។ នៅឆ្នាំ ២០២០ Bumble មានអ្នកប្រើប្រាស់ប្រចាំខែប្រមាណ ៥៤ ដង និងមានអ្នកបង់ថ្លៃសេវាកម្ម ២,៤លាននាក់ តាមរយៈការប្រើប្រាស់ Bumble និង Badoo។ នេះបើយោងតាម Bloomberg។
កម្មវិធីទូរស័ព្ទទាំងពីរ ដែលទទួលបានមូលនិធិវិនិយោគពី Blackstone ក្នុងឆ្នាំ ២០១៩ បានជួលមនុស្ស ៦០០ នាក់ ក្នុងទីក្រុងអូស្ទីន រដ្ឋតិចសាស់ និងមានការិយាល័យនៅតាមទីក្រុងនានាក្នុងតំបន់អឺរ៉ុប។
ជាមួយទស្សនៈបែបសេរី និងស្ដ្រីនិយម ដែលមានតែនារីៗត្រូវបានអនុញ្ញាតឱ្យចាប់ផ្ដើមបើកបេះដូង Bumble បានទទួលជោគជ័យក្នុងចំណោមយុវវ័យ វ័យខ្ទង់ចន្លោះ ២០ ទៅ ៣០ ឆ្នាំ និងវ័យកណ្ដាល។
យោងតាមការផ្សព្វផ្សាយបានបង្ហាញថា៖ «Bumble លើសពីកម្មវិធីទូរស័ព្ទ គឺជាចលនាស្ដ្រីមួយ។ Bumble ជាអ្វីដែលយើងអាចស្វែងយល់ពីរបៀបបង្កើត និងរក្សាសម្ព័ន្ធប្រកបដោយភាពរឹងមាំ។ វាបង្ហាញពីរបៀបដែលបេក្ខភាពស្វែងរកស្នេហ៍បង្កើតភាពទាក់ទាញក្នុងជំនួបដំបូង»។
ក្នុងឆ្នាំ២០១៩ ក្រុមហ៊ុនបានជួលអ្នកតំណាងល្បីៗ ដូចជា តារាតេន្ននីស សេរ៉េណា វីលៀម ដែលលើកទឹកចិត្ដស្ដ្រីក្នុងយុទ្ធនាការផ្សព្វផ្សាយដើម្បីហ៊ានចូលមករកដៃគូ មិនថាជាគូគាប់ជីវិត មិត្ដភាព ឬការងារនោះទេ។
សារដ៏សំខាន់គឺថា វាជាវេទិការស្ដ្រី ដែលមានបទបញ្ជាផ្ទៃក្នុង និងល័ក្ខខណ្ឌរបស់ពួកគេផងដែរ។ Bumble ដែលនៅតែមានពណ៌ក្រហមរយៈពេល ៩ ខែដំបូងនៃឆ្នាំ ២០២០ ជាមួយចំណូល ៨៤ លានដុល្លារ តែបានកើនឡើងដល់ ៣៧៦ លានដុល្លារ បំណងប្រើប្រាស់ផ្នែកខ្លះនៃមូលនិធិដើម្បីសងបំណុល៕ AFP/HR