​កម្មវិធី​ភាពយន្ដ និង​សិល្បៈ​​នៃ​ទន្លេ​មេគង្គ​លើក​ទី ​២ ​​ប្រារព្ធ​​ធ្វើ​​នៅ​មជ្ឈមណ្ឌល​សហប្រតិបត្តិការ​កម្ពុជា-កូរ៉េ​ ខែ​ក្រោយ​

យុវជនស្ម័គ្រចិត្តនៃក្រុមមេគង្គយុវទូត ក្នុងពេលប្រារព្ធកម្មវិធីភាពយន្ត និងសិល្បៈនៃទន្លេមេគង្គលើកទី១ ដែលបានធ្វើកាលពីខែមិថុនា ឆ្នាំ ២០១៩ កន្លងមក។ រូបថត សហការី

ភ្នំពេញ៖ ដោយសារមានគោលដៅចង់ផ្សព្វផ្សាយបន្ថែមលើការអភិរក្ស និងថែទាំនូវធនធានរបស់ទន្លេមេគង្គ ក៏ដូចជាបង្ហាញដល់សាធារណជនឲ្យបានស្គាល់ពីក្រុមមេគង្គយុវទូតឆ្នើម ដែលបានធ្វើការស្ម័គ្រចិត្ត សម្រាប់គម្រោងទន្លេមេគង្គ ដែលរៀបចំដោយអេកូយុវទូត ក្រោមការជួយគាំទ្រ ដោយជំនួយពីប្រជាពលរដ្ឋអាមេរិក (USAID) និងគម្រោងអច្ឆរិយភាពនៃទន្លេមេគង្គ (Wonders of the Mekong) នឹងរៀបចំធ្វើកម្មវិធីភាពយន្ដ និងសិល្បៈនៃទន្លេមេគង្គលើកទី ២ នៅថ្ងៃទី ៧ ខែ ធ្នូ ឆ្នាំ ២០១៩។

កញ្ញា វិន ពុទ្ធាលី ជាមន្រ្តីទំនាក់ទំនងព័ត៌មាននៃកម្មវិធីភាពយន្ដ និងសិល្បៈនៃទន្លេមេគង្គ បានឲ្យដឹងពីមូលហេតុនៃការរៀបចំលើកទី ២ នៅក្នុងឆ្នាំតែមួយ គឺឆ្នាំ ២០១៩ និងកម្មវិធីសំខាន់ថា៖ «ហេតុផលនាំឲ្យយើងរៀបចំលើកទី ២ នេះ គឺដោយសារចង់បន្ថែមនូវការផ្សព្វ ឲ្យកាន់តែច្បាស់ពីការអភិរក្សនៃធនធានធម្មជាតិរបស់ទន្លេមេគង្គឲ្យស្គាល់ពីតម្លៃសំខាន់របស់ទន្លេមេគង្គ។ ជាពិសេសនោះ គឺចង់បង្ហាញក្រុមយុវជនស្ម័គ្រចិត្តនៃក្រុមមេគង្គយុវទូតឆ្នើមរបស់យើងដែលសម្រេចគម្រោង ពួកគាត់ផងដែរ ក្រោយពីបញ្ចប់គម្រោងមក»។

ពពួកសត្វស្លាបដ៏កម្រដែលរស់នៅតាមតំបន់នៃទន្លេមេគង្គកម្ពុជា។ រូបថត សហការី

កញ្ញា វិន ពុទ្ធាលី បន្តថា៖ «យើងមានកម្មវិធីសំខាន់ៗជាច្រើន សម្រាប់ឱកាសនៃការប្រារព្ធកម្មវិធីភាពយន្ដ និងសិល្បៈនៃទន្លេមេគង្គលើកទី ២ នៅថ្ងៃទី ៧ ខែ ធ្នូ ឆ្នាំ ២០១៩ នោះផងដែរ គឺនៅពេលព្រឹកមានការតាំងពិព័រណ៍ការងារវិស័យអភិរក្សពីអង្គការសង្គមស៊ីវិល ការចាក់បញ្ចាំងវីដេអូបង្ហាញវត្តមាន បុគ្គលឆ្នើមក្នុងការងារអភិរក្សទន្លេមេគង្គ ការបញ្ចាំងខ្សែភាពយន្តរឿង «A Cambodian Nature Film» និងនៅពេលរសៀលមានការតាំងពិព័រណ៍ការងារវិស័យអភិរក្សពីអង្គការសង្គមស៊ីវិល ការសម្តែងរបាំស្រមោលរឿង «ម្ចាស់ជលសា» កិច្ចពិភាក្សាវិទ្យាសាស្រ្ត និងការប្រគំតន្រ្តីដោយក្រុមតូច (SWSB) និងក្រុម Peace Choong ដែលរៀបចំធ្វើនៅក្នុងមជ្ឈមណ្ឌលសហប្រតិបត្តិការកម្ពុជា-កូរ៉េ (CKCC)»។

មេគង្គយុវទូត គឺជាក្រុមយុវជនមកពីបណ្ដាសាលាផ្សេងៗ នៅក្នុងទីក្រុងភ្នំពេញ ហើយចាប់អារម្មណ៍មេគង្គយុវទូតបានឆ្លងកាត់ការជ្រើសរើស ហើយទទួលបានវគ្គបណ្ដុះបណ្ដាល ដំណើរទស្សនកិច្ចសិក្សាតាមដងទន្លេមេគង្គ ការរៀបចំផ្សព្វផ្សាយទៅតាមកម្មវិធីសាធារណៈ និងការធ្វើគម្រោងច្នៃប្រឌិតថ្មី ដើម្បីជាមធ្យោបាយក្នុងការអប់រំផ្សព្វផ្សាយបន្ត។

ក្រុមយុវជនអេកូយុវទូត រៀបចំកម្មវិធី «ដំណើរផ្សងព្រេងរបស់មេគង្គយុវទូត» ដើម្បីផ្សព្វផ្សាយគម្រោងស្នាដៃទាំង ៧ ក្នុងន័យរំឮកគុណទន្លេ និងបង្កើនការយល់ដឹងដល់ប្រជាពលរដ្ឋក្នុងការការពារ និងអភិរក្សទន្លេឲ្យមាននិរន្តភាព៕

ជីវិតកម្សាន្ត

ព័ត៌មានថ្មីៗ

វីដេអូ