ភ្នំពេញ៖ បណ្តុំរូប និងគំនូរជាច្រើនរបស់សិល្បករថតរូប និងវិចិត្រករចម្រុះជាតិសាសន៍ និងមានជាតិខ្មែរចំនួន ១៣ រូប ក្នុងចំណោមចំនួនសរុប ៤០ រូប នឹងត្រូវបានយកទៅដាក់តាំងបង្ហាញនៅទីតាំងចំនួន ១១ កន្លែងផ្សេងគ្នានៅក្នុងរាជធានីភ្នំពេញ និងខេត្តសៀមរាប នាឱកាសប្រារព្ធកម្មវិធីមហោស្រពរូបថតភ្នំពេញឆ្នាំនេះ សម្ពោធចាប់ពីថ្ងៃទី ២៤ ខែ តុលា បន្តរហូតដល់ថ្ងៃទី ២៤ ខែ វិច្ឆិកា ឆ្នាំ ២០១៩។
សម្រាប់កម្មវិធីមហោស្រពរូបថតភ្នំពេញឆ្នាំ ២០១៩ នេះ គឺជាការប្រារព្ធខួបលើកទី ១០ ផងដែរ នៃកម្មវិធីមហោស្រពរូបថតភ្នំពេញ ដែលនឹងត្រូវសម្ពោធ នៅថ្ងៃទី ២៤ ខែ តុលា ឆ្នាំ ២០១៩ នៅវិទ្យាសា្ថនបារាំងនៅកម្ពុជា ដែលជាដៃគូសំខាន់នៃគម្រោងនេះ។
លោក សុវណ្ណ ភីឡុង ជានាយករងនៃសមាគមរូបថតភ្នំពេញ ថ្លែងនាថ្ងៃធ្វើសន្និសីទសារព័ត៌មានស្តីពីការត្រៀមបើកមហោស្រពរូបថតភ្នំពេញឆ្នាំនេះ និងទីតាំងពិព័រណ៍ ក៏ដូចជាលក្ខណពិសេសនៃការប្រារព្ធសម្រាប់ខួប ១០ ឆ្នាំ កាលពីចុងសប្តាហ៍កន្លងមកនោះថា៖ «មហោស្រពនេះ នឹងរៀបចំដំណើរកម្សាន្តតាមរ៉ឺម៉កកង់ ៣ សម្រាប់ភ្ញៀវដែលចង់ស្វែងរកទីតាំងផ្សេងៗនៃមហោស្រពនេះ ជាមួយនឹងការអមពីសិល្បករ ខណៈមានទីតាំង ១១ កន្លែង ដែលនឹងចូលរួមតាំងបង្ហាញនៅឆ្នាំនេះមានដូចជា ជញ្ជាំងស្ថានទូតបារាំង វិទ្យាស្ថានបារាំងនៅកម្ពុជា ជញ្ជាំងនៃប្រតិភូសហភាពអឺរ៉ុបប្រចាំកម្ពុជា វិទ្យាល័យព្រះស៊ីសុវត្ថិ នៅអនុវិទ្យាល័យចតុមុខ កោះពេជ្រ វិចិត្រសាល Java Creative Cafe វិចិត្រសាលបណ្ណាគារ Independence Monument វិចិត្រសាល La Plantation វិចិត្រសាល Future Factory វិចិត្រសាល Sra''Art Gallery និងវិចិត្រសាល Bophana Center។ ខណៈឆ្នាំនេះ ក៏ជាលើកទី ១ ហើយមហោស្រពរូបថតភ្នំពេញនឹងបើកតាំងពិព័រណ៍វិចិត្រសាល បាទ្យាសារេម (Batia Sarem) នៅថ្ងៃទី ២ ខែ វិច្ឆិកា នៅឯខេត្តសៀមរាប»។
លោកបន្តថា៖ «សម្រាប់ខួបលើកទី ១០ នៃការប្រារព្ធមហោស្រពរូបថតភ្នំពេញឆ្នាំនេះ យើងក៏ព្យាយាមរៀបចំឲ្យមានលក្ខណពិសេសនៃចំនួន ១០ ផងដែរ។ យើងនឹងជ្រើសរើសស្នាដៃសិល្បករសហសម័យខ្មែរ ១០ រូប សម្រាប់ការតាំងពិព័រណ៍នៅខាងក្រៅ គឺដាក់នៅជញ្ជាំងរបងស្ថានទូតបារាំងដែលមានស្នាដៃ លោក ម៉ក់ រ៉េមីស្សា លោក ឃុន វណ្ណៈ លោក គឹម ហាក់ កញ្ញា នាក់ សុផល លោក ផា លីណា រូបលោកផ្ទាល់ (សុវណ្ណ ភីឡុង) លោក លីម សុខចាន់លីណា លោក តាំង ឈិនសុធី លោក ខ្វៃ សំណាង និងលោក ទីទិត្យ។ យើងក៏ជ្រើសរើសស្នាដៃសិល្បករអឺរ៉ុប ១០ រូប សម្រាប់ដាក់តាំងខាងក្រៅដូចគ្នា គឺនៅតាមជញ្ជាំងរបងប្រតិភូសហភាពអឺរ៉ុបប្រចាំប្រទេស កម្ពុជា ដោយមានសិល្បករដូចជា Isabel Munoz (អេស្ប៉ាញ) Martin Kollar (ស្លូវ៉ាគី) Elina Brotheru (ហ្វាំងឡង់) ក្រុម Put Put (ស្វ៊ីស និងដាណឺម៉ាក) JH Engstrom (ស៊ុយអ៊ែត) Eva Leitolf (អាល្លឺម៉ង់) Rud Van Empel (ហូឡង់) Weronika Gesicka (ប៉ូឡូញ) SMITH (បារាំង) និង John Vink (ប៊ែលហ្ស៊ិក)»។
នាឱកាសប្រារព្ធមហោស្រពរូបថតភ្នំពេញខួបលើកទី ១០ នេះ ក្រោមភាពជាដៃគូថ្មី ជាមួយប្រតិភូសហភាពអឺរ៉ុប ដែលបានអនុញ្ញាតឲ្យមានការតាំងពិព័រណ៍រូបថតមួយចំនួននៅតាមជញ្ជាំងរបងខាងក្រៅទីស្នាក់កណ្តាល នៃប្រតិភូសហភាពអឺរ៉ុប។ ហើយសិល្បករអឺរ៉ុបចំនួន ១០ ប្រទេស ដែលធ្លាប់ចូលរួមតាំងពិព័រណ៍នេះកន្លងមកនឹងផ្តល់រូបថតម្នាក់ ១ ផ្ទាំង ដែលឆ្លុះបញ្ចាំងអំពីកង្វល់របស់ពួកគេ ជុំវិញបញ្ហាបម្រែបម្រួលអាកាសធាតុ និងបរិស្ថាន។ ក្នុងក្របខ័ណ្ឌនៃកិច្ចសហប្រតិបត្តិការដដែលនេះ អនុវត្តគម្រោង Intersection ដែលក្នុងនោះមានសិល្បករអឺរ៉ុប ៥ រូប និងខ្មែរចំនួន ៥ រូប នឹងធ្វើការរួមគ្នា។
មហោស្រពឆ្នាំនេះក៏ទទួលបានការគាំទ្រពីក្រសួងវប្បធម៌ និងវិចិត្រសិល្បៈ ក្រសួងអប់រំយុវជន និងកីឡា ជាពិសេសគឺអាចប្រព្រឹត្តទៅបានដោយមានការគាំទ្រសប្បុរសជន លោក Zhong Weixing សមុច្ច័យសិល្បករ និងស្ថាបនិកនៃសារមន្ទីរ Chengdu Contemporary Image៕