The Phnom Penh Post Search

Search form




Logo of Phnom Penh Post newspaper Phnom Penh Post - កម្មវិធី​រៀន​ធ្វើ​ម្ហូប​សម្រាប់​ភ្ញៀវ​ទេសចរ​ទៅ​លេង​សៀម​រាប​អង្គរ​




កម្មវិធី​រៀន​ធ្វើ​ម្ហូប​សម្រាប់​ភ្ញៀវ​ទេសចរ​ទៅ​លេង​សៀម​រាប​អង្គរ​

Content image - Phnom Penh Post
សកម្មភាព​រៀន​ចម្អិន​ម្ហូប​ដោយ​មាន​ការ​បង្ហាត់​បង្ហាញ​ពី​សំណាក់​ចុងភៅ​ជំនាញ។ រស់ សម្បត្តិ

កម្មវិធី​រៀន​ធ្វើ​ម្ហូប​សម្រាប់​ភ្ញៀវ​ទេសចរ​ទៅ​លេង​សៀម​រាប​អង្គរ​

សៀមរាប: សម្រាប់​ភ្ញៀវ​ភាគ​ច្រើន​ដែល​ទៅលេង​ទឹកដី​សៀមរាប​ ក្រៅពីការ​ដើរ​លេង​តាម​ប្រាសាទ និង​ភ្នំគូ​លែន នៅ​ទឹកដី​ទីក្រុង​នេះ​ក៏​មាន​សកម្មភាព​កម្សាន្ត​ផ្សេងទៀត​ដែល​ភ្ញៀវ​មិនបាន​ដឹង ដូចជា​ការ​រៀន​ធ្វើ​ម្ហូប ដោយ​មាន​ការ​បង្រៀនពី​ចុងភៅ​ចំណាន​ប្រចាំ​សណ្ឋាគារ​នីមួយ​ៗ។

ក្នុង​ចំណោម​សណ្ឋាគារ​ទាំង​នោះ សណ្ឋាគារ មរតក​អង្គរ (Angkor Heritage Boutique Hotel) ក៏មាន​បន្ថែម​នូវ​សេវាកម្ម​រៀន​ធ្វើម្ហូប​ដល់​ភ្ញៀវ​ទាំងអស់​ដែល​ចង់​សាកល្បង​ធ្វើម្ហូប​ដោយ​ខ្លួនឯង ជាមួយ និង​ចុងភៅ​ជំនាញ​ផងដែរ។

Content image - Phnom Penh Post
គ្រឿង​ផ្សំត្រូ​វបាន​រៀបចំ​សម្រាប់​ភ្ញៀវ​យ៉ាង​រៀប​រយ។ ឈឹម ស្រីនាង

លោក Kelly Chandara សហ​ស្ថាប​និក Asia Initiative Corporation (AIC) ដែល​ក្រុម​គ្រប់គ្រង​សណ្ឋាគារ​មរតក​អង្គរ បាន​និយាយ​ថា៖ «យើង​បើកថ្នាក់​បង្រៀន​ធ្វើ​ម្ហូបនេះ​ឡើង​គឺ​ចង់​បង្ហាញ​ដល់​ភ្ញៀវ​បរទេស​ដែល​គាត់​មកលេង​ខេត្តសៀមរាប បាន​ភ្លក្សនៅ​រស​ជាតិម្ហូប​ខ្មែរពិតៗ ក៏ដូចជា​ការ​ផ្លាស់ប្តូរ​នូវរសជាតិ​របស់​ពួកគាត់​មក​ភ្លក្ស​រស​ជាតិ​ម្ហូបខ្មែរ ជា​ពិសេស គឺ​រៀនធ្វើ​ដោយ​ខ្លួនឯង​ផ្ទាល់​តែម្តង​នូវ​របៀប​ជ្រើសរើស​បន្លែ គ្រឿងផ្សំ ព្រមទាំង របៀប​ធ្វើត្រូវ​តាម​ក្បួនខ្នាត​ច្បាស់​លាស់​ផងដែរ»។

Content image - Phnom Penh Post
ម្ហូប​ចម្អិនរួច​អាច​ទទួល​ទាន​ជាមួយ​មិត្ដភក្ដិ​បង​ប្អូន។ ឈឹម ស្រីនាង

លោក​បាន​បន្តទៀត​ថា៖ «ថ្នាក់​បង្រៀន​ធ្វើម្ហូប​នេះ​គឺ​មិនមែន​សំដៅ​ទៅលើ​តែភ្ញៀវ​បរទេស​នោះទេ សូម្បីតែ​ភ្ញៀវខ្មែរ នៅពេល​ដែល​គាត់​មកលេង​ខេត្ត​សៀមរាប ហើយ​ចង់រៀន​ធ្វើម្ហូប​ខ្មែរ ឬមួយ​ក៏ម្ហូប​ប្រចាំ​ខេត្ត​សៀមរាប គឺយើង​ស្វាគមន៍​​ទទួល​បង្រៀន​ផង​ដែរ។ ដូចជា​ភ្ញៀវ​ខ្មែរខ្លះ​គាត់​មកពី​ក្រៅប្រទេស​គឺគាត់​ចង់​ដឹង ចង់​ភ្លក្ស​ និងធ្វើ​ម្ហូបខ្មែរ​ដោយ​ផ្ទាល់ដៃ អ៊ីចឹង​ហើយ​ខាង​សណ្ឋាគារ​របស់ខ្ញុំ​គឺបើក​ថ្នាក់​បង្រៀន​ធ្វើ​ម្ហូបនេះ​ឡើង ដោយ​ឲ្យភ្ញៀវ​គាត់រៀន​ធ្វើ ចិតបន្លែ ផ្សំ​គ្រឿង និង​របៀប​មើល​សាច់ឲ្យ​ត្រូវតាម​ស្តង់ដារ​នៃ​ការធ្វើ​ម្ហូប»។

សម្រាប់​ភ្ញៀវ​ដែល​មិនបាន​ស្នាក់នៅ​សណ្ឋាគារ​មរតក​អង្គរ គាត់ក៏​អាចមក​រៀន​ធ្វើម្ហូប​នេះ​ទីនេះ​បាន​ ដោយ​គាត់​គ្រាន់តែ​ធ្វើការ​កក់​ឲ្យបាន​មួយថ្ងៃ​មុន ដើម្បី​ឲ្យ​ខាង​សណ្ឋាគារ​អាច​រៀបចំ​ទុក​ជាមុន។

តម្លៃ​ក្នុង​ការធ្វើ​ម្ហូបនេះ​គឺម្នាក់ ៣០ ដុល្លារ​ និង​សម្រាប់​ពីរ​នាក់​ត្រឹមតែ ៥០ ដុល្លារ​ប៉ុណ្ណោះ។ ជាមួយ​រយៈពេល ២ ម៉ោង ភ្ញៀវ​អាច​ជ្រើសរើស​ធ្វើម្ហូប​ខ្មែរ ឬម្ហូប​អឺរ៉ុប​សម្រាប់​ចម្អិន​ញ៉ាំ​ជាមួយ​មិត្តភក្ដិ​ក៏បាន។

សណ្ឋាគារ​មរតក​អង្គរ​ស្ថិត​នៅ​ផ្លូវជាតិ​លេខ ៦ សង្កាត់​ស្លក្រាម​ ក្រុង​សៀមរាប៕

អត្ថបទគួរចាប់អារម្មណ៍