The Phnom Penh Post Search

Search form




Logo of Phnom Penh Post newspaper Phnom Penh Post - កម្មវិធី K-Film Contest ចែក​រង្វាន់​ជយ​លាភី​រដូវ​កាល​ដំបូង




កម្មវិធី K-Film Contest ចែក​រង្វាន់​ជយ​លាភី​រដូវ​កាល​ដំបូង

Content image - Phnom Penh Post
ក្រុម​ម្ចាស់​ជយ​លាភីថត​រូប​ជាមួយ​លោក ជុន មីហូ នាពេល​ប្រគល់​រង្វាន់​នៅ​ក្នុង​កម្ម​វិធី​ K-Film Contest ។ ហុង មិនា

កម្មវិធី K-Film Contest ចែក​រង្វាន់​ជយ​លាភី​រដូវ​កាល​ដំបូង

ភ្នំពេញៈ កម្ម​វិធី​ប្រកួត​ប្រជែង​ខ្សែ​ភាព​យន្ដ​ខ្នាត​ខ្លី​ K-Film Contest​ ដែល​រៀបចំ​ដំបូង​នៅ​ប្រទេស​កម្ពុជា​ដោយ​ក្រុមហ៊ុន​ Kotra បាន​រក​ឃើញនូវ​ម្ចាស់​ជយ​លាភី​ហើយ! ខណៈ​​ការ​ប្រគល់​រង្វាន់​ដល់​ផលិត​ករ​ជយលាភី ​៨ រូប​ ធ្វើ​នៅ​ឯ​បន្ទប់​ WIT Plaza នៃ​អគារ ​PGCT កាល​ពី​ថ្ងៃ​ព្រហស្បតិ៍​ ទី ១៧ ​ខែ​ធ្នូ ឆ្នាំ ២០១៥ កន្លង​មក។​

កម្ម​វិធី​ប្រកួត​នេះ​ត្រូវ​បាន​បែងចែក​ជា​ពីរ​ប្រភេទ​គឺ​ 29 Seconds Film Competition ដែល​កំណត់​រយៈពេល​មិន​ឲ្យ​លើស ២៩ វិនាទី​ និង CSR Film Competition ដែល​កំណត់​រយៈពេល​ក្រោម ៥ នាទី​។

លោក ជុន មីហូ​ (Jon Miho) អគ្គនាយក​នៃ​ក្រុម​ហ៊ុន Kotra មាន​ប្រសាសន៍នា​ឱកាស​ប្រគល់​រង្វាន់​ថា៖ «កម្ម​វិធី​ K-Film Contest ​ប្រារព្ធ​ឡើង​ក្នុង​គោល​បំណង​ជួយ​​ផ្សព្វផ្សាយ និងស្ទួយ​វិស័យ​ឧស្សាហ​កម្មភាព​យន្ត​ខ្មែរ​តាម​រយៈ​ស្នាដៃ​ផលិត​រឿង​ខ្លីៗ​របស់​ផលិត​ករខ្មែរ​សម័យ​ក្រោយ។ ម្យ៉ាង​ទៀតយើង​ក៏​ចង់រួម​ចំណែក​សកម្ម​ភាព​ល្អ​​ៗនៅ​សង្គម​ខ្មែរ​»។​

រឿង​«អតីតកាល​ដ៏​រីក​រាយ​ ឬ My good memories with my mum» បាន​ទទួល​រង្វាន់​ធំ Grand Award ជាមួយ​នឹង​រង្វាន់​ម៉ាស៊ីន​ថត​ម៉ាក GOPRO hero 4 Black មួយ​គ្រឿងរបស់​ផលិត​ករ សំ​ សុផានិច្ច​ ខណៈ​រង្វាន់​អ្នកដឹកនាំឆ្នើម​បាន​ទៅ​ផលិត​ករ​ ឈិន ឡុង​ ម្ចាស់​រឿង «វិថី ឬ Street» ​បាន​រង្វាន់​ម៉ាស៊ីន​ថត​ម៉ាក Nikon J1។

Content image - Phnom Penh Post
សកម្មភាព​នា​ពេល​ទស្សនា​ភាព​យន្ដ​​ខ្នាតខ្លី​ដែល​ទទួល​ជយ​លាភី​។ ហុង មិនា

ចំណែក​រឿង ​«ពេលវេលា ឬThe Time» ជា​វណ្ណ​កម្ម​របស់លោក​ ជា សុផានិត ​រង្វាន់​ផ្នែក​ Excellence Award ទទួល​បានម៉ាស៊ីន​ថត​ម៉ាក ​Canon IXUS 160 មួយគ្រឿង ខណៈ​រឿង ​«Imperfect» ជា​វណ្ណកម្ម​ផលិត​ករ​ស្រី កញ្ញា ស៊ុយ ចក្រីយ៉ា ដោយ​ភាព​យន្ត​ទាំង​នេះ​​នៅ​ផ្នែក​ 29 Seconds Film Competition។​

ចំណែកឯ​រឿង«ក្តី​សង្ឃឹម និង​ក្តី​ស្រឡាញ់ ឬ Hope and Love» របស់​ផលិត​ករ​ រៀម ចំរើន ទទួល​បាន​រង្វាន់ធំ​ Grand Award ​មាន​ទឹក​ប្រាក់​ចំនួន​ ៥០០ ​ដុល្លារ ហើយ​រឿង «Hanwha's CSR activity in Kratie»​ របស់​ផលិត​ករ សួង សុភក្តិ​ ជាប់​រង្វាន់​ផ្នែក​ដឹកនាំឆ្នើម​ជា​មួយ​នឹង​ប្រាក់ ៤០០ ​ដុល្លារ និង​រង្វាន់​ផ្នែក​ Excellence Award មាន​ពីរ​រឿងគឺ «Angkor Heavy's CSR activity» របស់​ផលិត​ករ ផុន រៀម និង​រឿង «Technology Sharing Seminar» ​របស់​ផលិត​ករ​ស្រី កញ្ញា ស៊ុម មុនីកែវ ដោយម្នាក់ៗ​​ទទួល​បាន​រង្វាន់​ជា​ទឹក​ប្រាក់​ ៣០០ ​ដុល្លារ។

​រៀម ចំរើន ម្ចាស់​រឿង «ក្តី​សង្ឃឹម និង​ក្តី​ស្រឡាញ់» បាន​ឲ្យ​ដឹង​ពី​ដំណើរ​រឿង​​ថា៖ «រឿង​របស់​ខ្ញុំ​ចង់​បង្ហាញអំ​ពី​ទឹក​ចិត្ត​ស្រឡាញ់​ដ៏​ធំធេង​នៃ​អ្នក​ម្តាយ​ចំពោះ​កូន​ និងក្តី​សង្ឃឹម​ធំ​បំផុត​នា​ពេលកូន​ប្រុសរបស់​គាត់​​ត្រូវ​បាន​​ទទួល​ការ​ព្យាបាល​វះ​កាត់​ជំងឺ​បេះដូង​ឥត​គិត​ថ្លៃ​ពី​ខាង​មន្ទីរ​ពេទ្យ​កូរ៉េ​មួយ​ឈ្មោះ Herbron Hospital ដែល​មាន​សេវា​កម្ម​ជួយ​ព្យាបាល​ជំងឺ​ដល់​ជន​ក្រីក្រ​នៅក្នុង​ប្រទេស​​កម្ពុជា»៕​

អត្ថបទគួរចាប់អារម្មណ៍