.jpg)
ភ្នំពេញៈ តារាចម្រៀងទ្រព្យស្ដុក និង កាន់តំណែងធំដុំនៅទ្រនំថោន លោក ករុណា ពេជ្រ ថ្មីៗនេះ បានប្រកាសលក់ផ្ទះវីឡាដ៏ស្កឹមស្កៃ ដើម្បីបន្តដំណើរនាំឪពុករបស់លោក ស្វែងរកការព្យាបាលនៅក្រៅប្រទេស ក្រោយពីអ្នកមានគុណបានធ្លាក់ខ្លួនឈឺធ្ងន់ជាច្រើនខែ តាំងពីវេលាចុងឆ្នាំសកល ឆ្លងដល់រដូវចូលឆ្នាំប្រពៃណីខ្មែរ។
ភ្ជាប់ជាមួយរូបថតមើលថែឪពុក ជាមួយទិដ្ឋភាពទាំងក្នុង និងក្រៅផ្ទះវីឡាដ៏ស្កឹមស្កៃ លោក ករុណា ពេជ្រ បានបរិយាយសារយ៉ាងដូច្នេះថា៖ «ជួយ Like, Share យកតែបុណ្យ មួយផងណា... កូនមកដល់ផ្ទះវិញហើយ ប៉ា...!!! ផ្ទះធំពេក ហើយប៉ាឈឺទៀត ... កូននឹងនាំប៉ាទៅព្យាបាលបន្តនៅក្រៅប្រទេសឆាប់ៗនេះ...»។
ក្នុងសារដដែលនោះ លោកក៏បានប្រកាសភ្លាមៗដែរថា៖ «កុំឲ្យសៅហ្មង ខ្ញុំសូមប្រកាសលក់ផ្ទះវីឡាទោល ហើយកែងផ្លូវ ខាងមុខតែម្តង... ដែលមានទីតាំងនៅបុរីពិភពថ្មី សំរោងអណ្តែត ៣ ផ្ទះលេខ ២ ( E0,E1,E2 ) , ផ្លូវ A ... ទល់មុខសួនច្បារធំ ២ មានទីធ្លាធំទូលាយ នៅមុខផ្ទះ.... ចំណាយពេលតែ ៥ នាទី ដល់ផ្សារ Makro និង ផ្សារទំនើប អ៊ីអន ពីរ។ ទំហំដី : ទទឹងមុខ ១៨,៤០ m រីកទទឹងក្រោយ ១៩,៤០m និង បណ្តោយ ៣៣,៤០ m។ សូមផ្ញើសារក្នុងប្រអប់សម្រាប់តម្លៃ»។
តបនឹងសារខាងលើនេះ មានប្រិយមិត្តចូលរួមផ្ញើសារជូនពរឲ្យឪពុករបស់លោក ករុណា ពេជ្រ ឆាប់ជាសះស្បើយ និងខ្លះទៀតក៏ជជីកសួរលម្អិតពីតម្លៃផ្ទះវីឡាដ៏ស្កឹមស្កៃនោះដែរ។
គួររំឭកផងដែរថា ឪពុករបស់តារាចម្រៀងទ្រព្យស្ដុក លោក ករុណា ពេជ្រ មានជំងឺលើសឈាម និងដាច់សរសៃខួរក្បាល កាលដើមឆ្នាំ ២០១៨។
ក្រោយពីវះកាត់ កាលពីថ្ងៃទី ៤ ខែមករា និងសម្រាកព្យាបាលជាច្រើននៅមន្ទីរពេទ្យជប៉ុនដ៏ល្បីនៅកម្ពុជា លោក ករុណា ពេជ្រ បាននាំអ្នកមានគុណមកមើលថែនៅផ្ទះ។
ក្រៅពីជំនួយផ្នែកវេជ្ជសាស្ត្រ លោក ករុណា ពេជ្រ ក៏ធ្លាប់ដើរបែរបន់អារក្សអ្នកតា ទេវតា និងបារមីស័ក្ដិសិទ្ធិសុំឲ្យឪពុកលោកបានជាសះស្បើយផងដែរដើម្បីឲ្យអ្នកមានគុណ បាននៅមើលឃើញ លោករៀបការ។
លោក ករុណា ពេជ្រ ដែលមានគូដណ្ដឹងជានិស្សិតសិក្សានៅបរទេសនោះ ក៏ធ្លាប់បានប្រាប់ ភ្នំពេញ ប៉ុស្ដិ៍ ផងដែរថា៖ «ខ្ញុំមានគូខ្ញុំហើយ ហើយខ្ញុំក៏មានគម្រោងរៀបការនៅឆ្នាំ ២០១៨ នេះ តាំងពីយូរហើយ ហើយគម្រោងនេះក៏នៅតែបន្ត ទាំងសប្បាយចិត្តដែរបើបានឪពុកឆ្លងផុតវះកាត់។ តែគ្រាន់ថា ដំណឹងនេះខ្ញុំមិនទាន់បង្ហាញវេលាជាក់លាក់»៕
