ភ្នំពេញៈ យូរៗម្តងមហាជនឃើញការលើកជាមតិយោបល់នៅក្នុងគោលបំណងការពារ និងអភិរក្សតម្លៃនៃសិល្បៈ និងអ្នកសិល្បៈផងដែរពីសំណាក់កវីទំនុកច្រៀង បទភ្លេង និងតារាចម្រៀងប្រុសលេចមុខម្តងម្កាលនៅផលិតកម្មហង្សមាសលោក សួន ពិសិដ្ឋ គួរឲ្យចាប់អារម្មណ៍សាជាថ្មីម្តងទៀត។
កវីទំនុកច្រៀងល្បីឈ្មោះនៅផលិតកម្មហង្សមាស ដែលធ្លាប់បានធ្វើឲ្យមហាជនបានស្គាល់មុខមាត់ពិត និងសំនៀងខ្លួនឯងតាមរយៈការបកស្រាយបទចម្រៀងទោលរបស់លោកមានចំណងជើងថា «រាំកេវ» នោះបានបង្ហើសារដ៏វែងអន្លាយមួយក្នុងន័យសេចក្តីត្រង់ចេញពីចិត្តជាសំណូមពរដោយទទូចចង់ឲ្យមានច្បាប់មួយដែលការពារ និងអភិរក្សនូវគុណតម្លៃសិល្បៈក្នុងប្រទេសខ្មែរ ពេលបច្ចុប្បន្ននេះថា៖ «ជាថ្មីម្តងទៀតស្តីអំពីច្បាប់គាំពារកម្មសិទ្ធិបញ្ញាស្នាដៃសិល្បៈដូចជាប្រទេសដែលអភិវឌ្ឍន៍ និងប្រទេសជិតខាង ដែលបានអនុវត្តនូវ CMO បង្កើតដោយអង្គការច្បាប់កម្មសិទ្ធិបញ្ញាពិភពលោក (WIO)»។
មូលហេតុបន្ថែមដែលនាំឲ្យកវីទំនុកច្រៀងល្បីមួយរូបនៅទ្រនំផលិតកម្មធំហង្សមាស និងបច្ចុប្បន្ននេះ លោក សួន ពិសិដ្ឋ ក៏ជាសមាជិកម្នាក់នៃគណៈកម្មការនៃកម្មវិធីប្រកួតចម្រៀងសម័យនៅទូរទស្សន៍បាយ័នជាមួយនឹងតារាចម្រៀងប្រុសម្នាក់ទៀតគឺលោក ហេង ពិទូ និងតារាចម្រៀងស្រីកញ្ញា អេដា នោះ មិនបានបកស្រាយលម្អិតប្រាប់នោះឡើយ បើទោះបីជាភ្នំពេញប៉ុស្តិ៍បានសាកសួរលោកតាមរយៈសារ Messenger ហ្វេសប៊ុកផ្ទាល់ខ្លួនក៏ដោយនៅតែមិនមានការឆ្លើយតបវិញនោះទេ។
តែកវីទំនុកច្រៀង និងបទភ្លេង មានបទពិសោធច្រើន នៅក្នុងវិស័យសិល្បៈចម្រៀងមានប្រមាណ ២ ទសវត្សរ៍ និងជាស្វាមីរបស់ម្ចាស់ហាងបាយឈ្មោះ «ផ្ទះបាយម៉ាក់យាយអេនណា» ផងដែរនោះ ក៏បានបន្តនូវសារតាមបណ្តាញសង្គមហ្វេសប៊ុកផ្ទាល់ខ្លួនទៀតថា៖ «ខ្ញុំបាទក្នុងនាមជាសិល្បករខ្មែរមួយរូបដែលបានចូលរួមបម្រើសិល្បៈខ្មែរ និងវប្បធម៌ជាតិខ្មែរអស់រយៈពេល ២០ ឆ្នាំ កន្លងមក! ដូចជាសិល្បករទាំងអស់ទូទាំងប្រទេសផងដែរ ក៏ជាម្ចាស់ស្នាដៃម្នាក់នៃបទ «មោទនភាពជាខ្មែរ» សូមអភ័យទោស ក៏សូមជម្រាបសួរត្រង់ៗដល់គណៈរដ្ឋមន្ត្រី និងក្រសួងដែលពាក់ព័ន្ធ ថាតើដល់ឆ្នាំណា ពេលណា នាទីណាទើបលោកអនុវត្តទាំងស្រុងឲ្យមានប្រសិទ្ធភាពទូទាំងប្រទេសទៅលើច្បាប់គាំពារកម្មសិទ្ធិបញ្ញាស្នាដៃសិល្បៈ ដើម្បីជួយទៅសម្រួលធានាបានដល់ជីវភាពការរស់នៅរបស់សិល្បករ ធនធានមនុស្ស ទាំងអស់ឲ្យលោកមានជីវភាពល្អសមរម្យ ដើម្បីផ្ដល់បាននូវលទ្ធភាពជូនដល់គាត់ទាំងអស់គ្នាមានទឹកចិត្តកម្លាំងចិត្តរួមឆន្ទៈនៅក្នុងការបន្តបង្កើតស្នាដៃរឹតតែអស្ចារ្យសម្រាប់សិល្បៈវប្បធម៌ និងបានពាំនាំអ្វីជាប្រយោជន៍ដើម្បីជាតិរួមកិត្តិយសដល់ប្រទេសជាតិខ្មែរយើង»។
លោក សួន ពិសិដ្ឋ បន្តទៀតថា៖ «អ្នកដែលជាម្ចាស់ស្នាដៃ នឹងធានាបាននូវភាពថ្លៃថ្នូរ ក្រមសីលធម៌ គាំពារនូវសិទ្ធិនៃស្នាដៃបញ្ញាញាណរបស់សិល្បករខ្មែរ អ្នកនិពន្ធ អត្ថបទរឿង អ្នកនិពន្ធទំនុកច្រៀង អ្នកនិពន្ធបទភ្លេង អ្នកចម្រៀង តន្ដ្រីករ អ្នកដឹកនាំសម្ដែង អ្នកសម្ដែង និងផលិតករ?..។ បណ្តាំចាស់ទុំថា វប្បធម៌រលត់ជាតិរលាយ វប្បធម៌ពណ្ណរាយជាតិថ្កើងថ្កាន»៕