.jpg)
រូបតំណាង: កាណាដាបន្ធូរបន្ថយបម្រាមព្រំដែនដល់គូស្នេហ៍ឆ្លងសញ្ជាតិ។ រូបថត AFP
ក្រុងអូតាវ៉ា៖ ស្ថានភាពព្រំដែនប្រទេសកាណាដា ត្រូវបានបន្ធូរបន្ថយ ដើម្បីអនុញ្ញាតឲ្យនិស្សិតបរទេស ព្រមទាំងពលរដ្ឋសញ្ជាតិដទៃ ដែលកំពុងមានទំនាក់ទំនងស្នេហាជាមួយពលរដ្ឋកាណាដា។ នេះបើយោងតាមសេចក្ដីប្រកាសរបស់ក្រសួងអន្ដោប្រវេសន៍ កាលពីថ្ងៃសុក្រ។
បម្រាមលើការចេញចូលព្រំដែនដោយមិនចាំបាច់នៅតែបន្ដរឹតបន្ដឹងរហូតដល់ដំណាច់ខែតុលា ខណៈប្រទេសនេះកំពុងទទួលរងនូវការកើនឡើងនៃអ្នកជំងឺកូវីដ។
ប៉ុន្ដែក្រុងអូតាវា បានផ្ដល់សញ្ញាមកថា ខ្លួននឹងធ្វើការសម្របសម្រួលឲ្យកាន់តែងាយស្រួលថែមទៀត។
រដ្ឋមន្ដ្រីអន្ដោប្រវេសន៍ ម៉ាកូ មេនឌីស៊ីណូ បានប្រាប់ក្រុមអ្នកសារព័ត៌មានថា៖ «យើងទទួលស្គាល់ថា ការរឹតបន្តឹងចំពោះការធ្វើដំណើរមិនគួរផ្ដាច់ទំនាក់ទំនងស្នេហាពលរដ្ឋណាម្នាក់ឡើយ។ ក្នុងគ្រាដ៏លំបាកនេះ យើងដឹងថា ការលំបាកទាំងនោះជាអ្វីដែលយើងត្រូវយកចិត្ដទុកដាក់»។
បណ្ដាញផ្សព្វផ្សាយកាណាដា បានរាយការណ៍អំពីការបំពានឆ្លងព្រំដែនដោយពលរដ្ឋអាមេរិកដែលជាប់ជំពាក់នឹងរឿងស្នេហា រួមទាំងបុរសម្នាក់ដែលបំពានបម្រាមកូវីដ ខំស្កាត់មកជួបមិត្ដស្រីកាណាដា នៅខេត្តអាល់បែតា និងដើរលេងថែមទៀត។ លោកត្រូវបានពិន័យ និងបង្គាប់ឲ្យចាកចេញពីប្រទេសភ្លាមៗ។
ក្នុងករណីមួយផ្សេងទៀត ពលរដ្ឋអាមេរិកម្នាក់បានជិះទូកក្ដោងឆ្លងកាត់ឆ្នេរសមុទ្រប៉ាស៊ីហ្វិកស្កាត់មកជួបមិត្ដស្រីកាណាដា។ អ្នកទាំង ២ ត្រូវបានរារាំងដោយឆ្មាំឆ្នេរ ហើយវិលទៅកាន់ប្រទេសទីទៃរៀងៗខ្លួន។
គូស្នេហ៍ជាច្រើនក៏ត្រូវបានប្រទះឃើញនាំគ្នាឈរម្ខាងម្នាក់នៃព្រំដែនប្រទេសរៀងៗខ្លួនដែរ៕ AFP/HR
